Matalikilo 9 - Baibo Busansulushi Bwa Libuku Ili

Lesa mbwaakapanga cipangano aNowa

¹ Lesa wakapa coolwe Nowa abana bakwe basankwa akwaamba ayi, “Amushale baana baanji kwaamba ayi bamulunyungu lwako bakekaale koonse koonse mucishi ca panshi.

² Banyama abayuni boonse alimwi answi shoonse shinanookala kashikuloonda. Shoonse shabikwa mumaansaako.

³ Ono inga mwashilya pantu pomwi ashabucisa. Ndamupa shoonse kwaamba ayi munoolya.

⁴ Ncemuteeletebo kulya, ninyama icicite bulowa. Ndamukasha kucita boobo mukwiinga buumi buli mubulowa.

⁵ Na muntu watila bulowa bwa mubye, ulaakupekwa mulandu. Ndaakupa mulandu akucaya munyama uli woonse ucaya muntu.

⁶ Muntu wakalengwa mucikoshanyo cangu, aboobo muntu uli woonse ucaya umwi, alakwe muntunyina ulaakumucaya.

⁷ Ulyeelete kuba abaana baanji kwaamba ayi bamulunyungu lwako bakekaale koonse koonse mucishi ca panshi.”

⁸ Mpeeke Lesa wakaambila Nowa abana bakwe basankwa ayi,

⁹ “Ntoopanga cipangano bulya amwebo, pantu pomwi abamulunyungu lwanu,

¹⁰ ashintu shimwi shoonse shiyoya. Nkokwaamba ayi bayuni abanyama nabi ayi shoonse nshemwakaswaasho mubwaato.

¹¹ Ngaaya maswi a cipangano cangu amwebo, Ndashomesha kwaamba ayi teshi nkanyonyoolewo shintu shiyoya kumaanshi. Muyoba teshi ukanyonyoolewo tubili cishi ca panshi.

¹² Ono mbuli citondesho ca cipangano ici camuyayaya ncentoopanga amwebo pantu pomwi ashimwi shoonse shiyoya,

¹³ ntoobika nkongolo yangu mumakumbi. Citooba citondesho ca cipangano cangu acishi ca panshi.

¹⁴ Kulilabo na mwiculu ndashinkaamo makumbi ankongolo yaboneka,

¹⁵ ndanokwiibaluka kwaamba ayi ndakamushomesha pantu pomwi abanyama ayi teshi nkanyonyoolewo tubili shiyoya kumuyoba.

¹⁶ Na nkongolo yaboneka mumakumbi, ndaakwiibona akwiibaluka cipangano camuyayaya ncendakapanga pakati kangu ashimwi shoonse shiyoya sha pacishi ca panshi.

¹⁷ Ico ncecitondesho ca cipangano ncentoopanga ashintu shoonse shiyoya.”

Nowa abana bakwe basankwa

¹⁸ Bana bakwe Nowa bansankwa abo mbwaakaswaabo mubwaato bunene nguShemu, Amu alimwi aJafeti. Amu wakaba ishi Kenani.

¹⁹ Aba bana bakwe Nowa botatwe mbobamashali bakulukulu ba bantu boonse bali pacishi ca capanshi.

²⁰ Nowa wakalinga mulimi alimwi ngomutaanshi kulima muunda wa minyansa.

²¹ Ono ndyaakanwa waini wa minyansa iyo wakakolwa akoonabo matakosha mutente yakwe.

²² Amu ishi Kenani, ndyaakabona matakosha a baishi wakaya mukulwiita bamakwabo bobilo pansengwe.

²³ Sombi Shemu aJafeti bakabwesa cakufwala, akucibika kumafushi. Lyalo bakenjila mutente mamfuteenuma akumufweka ishiwabo. Tabakwe kulangaako ceebo tebakalinga kusuni kubonena ishiwabo.

²⁴ Nowa ndyaakakololokwa akwishiba cakacita mwanaakwe mwanikebantu kuli nguwe,

²⁵ Wakaamba ayi, “Ndashingana Kenani! Ulaakuba musha kubamakwabo.”

²⁶ Alimwi wakaamba ayi, “Aalumbaishikwe Mwaami, Lesa wakwe Shemu, Kenani aabe musha kuli Shemu!

²⁷ Lesa aakomeneshe buleelo bwakwe Jafeti. Bamulunyungu lwakwe banookala abamulunyungu lwakwe Shemu, alimwi Kenani aabe musha wakwe.”

²⁸ Muyoba ndiwakamana, Nowa wakekala myaaka ili 350.

²⁹ Pantu pomwi wakekala myaaka ili 950, lyalo wakafwa.