Matalikilo 7 - Baibo Busansulushi Bwa Libuku Ili

Shamuyoba

¹ Mwaami Lesa wakaambila Nowa ayi, “Njila mubwaato abamuŋanda yako boonse. Ndacana kwaamba ayi pabantu boonse mucishi ca panshi ndiwe ucitabo shiluleme.

² Nyamuna abanyama basalalite kweelana aMilawo bali bosanwe abobilo bacende ampwishi mweelo ngomunya. Sombi kubatasalalite kweelana aMilawo ubwese bobilo bobilo mucende ampwishi.

³ Nyamuna abayuni basankwa abanakashi bali bosanwe abobilo mumushobo womwi awomwi. Ucite ubo kwaamba ayi banyama abayuni bamushobo womwi awomwi batakaloobi, sombi bakashalane alimwi pacishi ca panshi.

⁴ Na peende nshiku shosanwe ashobilo kuswa sunu ndaakutuma mfula ishi ikaloke kwanshiku shili makumi one malumwi amashiku, kwaamba ayi nyonyoole shintu shoonse shiyoya isho nshindakalenga.”

⁵ Alakwe Nowa wakacita shoonse Lesa nshaakamwaambila.

⁶ Nowa wakalinga kucite myaaka ili 600 muyoba uyo ndiwakashika.

⁷ Mpeeke lakwe amukaakwe, bana bakwe basankwa abamakaabo, bakenjila mubwaato kuloonda muyoba uyo.

⁸ Mucende ampwishi pabanyama ba mushobo womwi awomwi pantu pomwi abayuni, basalalite nabi batasalalite

⁹ bakenjila mubwaato kweelana aLesa mbwaakaambila Nowa.

¹⁰ Ndipakeenda nshiku shosanwe ashobilo muyoba wakesa.

¹¹ Nowa ndyaakaba amyaaka ili 600, pabushiku bwa likumi anshiiku shosanwe ashobilo, mumweenshi wabili, toonse tuntupu twa mashiba anene ali panshi lya nshi twakacaluka. Ashalo shilyango sha miyoba shakacaluka kwiculu.

¹² Lyalo mfuula yakaloka pacishi ca panshi kwa nshiku shili makumi one, malumwi amashiku.

¹³ Pabushiku bweenka ubo, Nowa amukaakwe bakenjila mubwaato pantu pomwi abana bakwe basankwa botatwe, Shemu, Amu, Jafeti alimwi abamakaabo.

¹⁴ Abalo banyama bamushobo womwi awomwi, bafubwa abamuluundu, banene abaniini alimwi abayuni ba mushobo uli woonse, bakayaabo.

¹⁵ Cisankwa acanakashi pamushobo womwi awomwi wa shintu shiyoya shoonse shakenjila mubwaato pantu pomwi aNowa,

¹⁶ kweelana aLesa mbwaakaamba. Lyalo Mwaami Lesa wakacala cisasa Nowa ndyaakenjila mubwaato.

¹⁷ Imfula yakatolelela kwa nshiku shili makumi one, alimwi mbuli maanshi mbwaakalinga kuya cifula bwaato bwakatalika kuseela.

¹⁸ Maanshi akafulilaako, abwalo bwaato bwakalinga kuya ciseela peculu lya maanshi.

¹⁹ Akafula cakwaamba ayi akepisha tulundu twiindaawo kulaampa.

²⁰ Akatolelela kuya cifula tibili ainda patulundu amamita osanwe aobilo kuya mwiculu.

²¹ Shintu shoonse shiyoya pacishi ca panshi shakafwa. Nkokwaamba ayi bayuni, banyama alimwi abantu boonse.

²² Shoonse shakalinga kuyoya pacishi ca panshi shakafwa.

²³ Mwaami Lesa wakanyonyoola shoonse shakalinga kucite buumi pacishi ca panshi, nkokwaamba ayi bantu, banyama, abayuni. Bakacaalakobo nguNowa abaabo mbwaakalingaabo mubwaato.

²⁴ Maanshi akatalika kuya panshi ndipakeenda nshiku shili mwaanda anshiiku makumi osanwe.