Matalikilo 5 - Baibo Busansulushi Bwa Libuku Ili

Balunyungu lwakwe Adamu kushika kuli Nowa

¹ Ulu ndolunyungu lwakwe Adamu. Lesa ndyaakalenga Adamu, wakamulenga mucikoshanyo cakwe.

² Wakabalenga musankwa amwanakashi, wabapa coolwe alimwi akubatumba ayi, “Bantu.”

³ Adamu ndyaakaba amyaaka ili 130, wakashala mwaana musankwa uyo wakalingabo mbuli nguwe. Wakamupa liina lya Seti.

⁴ Kuswawaawo Adamu wakekala myaaka imwi ili 800. Adamu wakashala baana abamwi.

⁵ Mpeeke wakafwa kaacite myaaka ili 930.

⁶ Seti ndyaakaba amyaaka ili 105, wakashala mwaana musankwa Enoshi.

⁷ Seti wakekala myaaka aimwi ili 807. Wakashala baana abamwi,

⁸ alimwi wakafwa kaacite myaaka ili 912.

⁹ Enoshi ndyaakaba amyaaka ili 90, wakashala mwaana musankwa Kenani,

¹⁰ Lyalo wakekala myaaka aimwi ili 815. Wakashala baana abamwi,

¹¹ mpeeke wakafwa kaacite myaaka ili 905.

¹² Kenani ndyaakaba amyaaka ili 70 wakashala mwaana musankwa Maalalelo.

¹³ Kuswaawo wakekala amyaaka aimwi ili 840. Wakashala baana abamwi basankwa abanakashi

¹⁴ akufwa kaacite myaaka ili 910.

¹⁵ Maalalelo ndyaakaba amyaaka ili 65, wakashala mwaana musankwa Jaledi.

¹⁶ Lyalo wakekala myaaka aimwi ili 830. Wakashala baana abamwi

¹⁷ akufwa kaacite myaaka ili 895.

¹⁸ Jaledi ndyaakaba amyaaka 162, wakashala mwaana musankwa Enoki.

¹⁹ Mpeeke wakekala myaaka aimwi ili 800. Wakashala baana abamwi

²⁰ akufwa kaacite myaaka ili 962.

²¹ Enoki ndyaakaba amyaaka ili 65, wakashala mwaana musankwa, Metusela.

²² Kuswawaawo wakekala myaaka ili 300 kaaenda mubushicibusa aLesa, alimwi wakashala baana abamwi.

²³ Pantu pomwi, Enoki wakekala myaaka ili 365.

²⁴ Enoki wakeenda mubushicibusa aLesa buumi bwakwe boonse. Mpeeke wakashiminganabo ceebo Lesa wakamutola.

²⁵ Metusela ndyaakaba amyaaka ili 187, wakashala mwaana musankwa wiitwa ayi Lameki.

²⁶ Wakekala myaaka aimwi ili 782, wakashala baana abamwi basankwa abanakashi

²⁷ akufwa kaacite myaaka ili 969.

²⁸ Lameki ndyaakaba amyaaka ili 182, wakashala mwaana musankwa.

²⁹ Mwaana uyo wakamupa liina lya Nowa akwaamba ayi, “Kuswa kubulongo Lesa mbwaakashinganya uyu mwaana ulaakutufuna mukuyuwaana kwesu.”

³⁰ Kuswawaawo Lameki wakekala myaaka ili 595, wakashala abamwi baana

³¹ akufwa kaacite myaaka ili 777.

³² Nowa ndyaakaba amyaaka ili 500 aimwi peculu, wakashala baana basankwa botatwe Shemu, Amu alimwi aJafeti.