Matalikilo 47 - Baibo Busansulushi Bwa Libuku Ili

¹ Mpeeke Josefu wakabwesa bamakwabo bali bosanwe akuya kumwaami Falawo, akumwaambila ayi, “Bata abamakwesu besa kuswa kuKenani amatanga ambelele, mpongo aŋombe, alimwi ashintu shabo shimwi shoonse. Bashikila kumusena wa Gosheni.”

² Kuswawaawo wakatondesha mwaami bamakwabo bosanwe.

³ Mpomunyaawo mwaami wakabeepusha ayi, “Mulacitanshi mubuumi bwanu?” Bakakumbula ayi, “Tuli beembeshi bweenka bwakalinga bashali besu bakulukulu nkambo.

⁴ Twesa mukwikala mucishi cino ceebo mucishi ca Kenani nsala yakomena abuumbi cakwaamba ayi taaku abwiisu bwa shifubwa shesu. Twaseenga mutusuminishe kwikala mumusena wa Gosheni.”

⁵ Lyalo mwaami wakaambila Josefu ayi, “Bulya ono baiso abamakwanu mbobesa,

⁶ cishi ca Ijipiti ncabo. Basuminishe bekale mumusena wa Gosheni, musena wiindaawo kubota mucishi cino. Alimwi na pali basankwa bakonsha kulama shifubwa, ubape bweendeleshi bwa shifubwa shangu.”

⁷ Lyalo Josefu wakaleta Jakobo baishi, akubatondesha kumwaami. Jakobo wakapa coolwe mwaami.

⁸ Mpeeke mwaami wakamwiipusha ayi, “Ulicite myaaka yongaye?”

⁹ Jakobo wakakumbula ayi, “Buumi bwangu bwakutekala pantu pomwi bwatola myaaka ili 130. Myaaka iyo yanceyela alimwi yalinga iyumu, buteshi bwakalinga kulaampa myaaka ya bashali bangu bakulukulu mukutekala pantu pomwi kwabo.”

¹⁰ Jakobo wakapa mwaami coolwe cakumulasha akumushiya.

¹¹ Mpeeke Josefu wakekalika baishi abamakwabo muIjipiti, akubapa musena kulubasu lwakalinga kwiindaawo kubota mucishi ico. Musena uyo wakalinga kufwaafwi andabala inene ya Lamesesi, bweenka bwakaamba Falawo.

¹² Josefu wakapa shakulya baishi, bamakwabo, alimwi abamwi boonse bamuŋanda ya baishi kubikaako awooyo wakalinga mwanike paboonse.

Nsala

¹³ Nsala yakakomena cakwaamba ayi taaku akwakalinga cakulya. Aboobo bene Ijipiti abene Kenani bakalefuka kunsala.

¹⁴ Bantu ndibakalinga kuula witi, Josefu wakalinga kubwesa maali oonse mucishi ca Ijipiti aKenani akwaatola kuŋanda ya mwaami Falawo.

¹⁵ Maali oonse muIjipiti amuKenani ndyaakamana, bene Ijipiti bakaya kuli Josefu akwaamba ayi, “Amutupe shakulya, mutatuleeki ayi tufwe, amuciteewo comwi, swebo maali esu oonse amana.”

¹⁶ Josefu wakabakumbula ayi, “Amulete shifubwa shanu tushintane ashakulya na maali anu amana.”

¹⁷ Aboobo bakaleta shifubwa shabo kuli Josefu alakwe wakabapa shakulya mukushintana amaaki, mbelele, mpongo, ŋombe, ambongolo shabo. Mwaaka uyo wakabapa shakulya mukushintana ashifubwa shabo shoonse.

¹⁸ Mwaaka wakaboolaawo bakaya kuli nguwe akwaamba ayi, “Nkambo, teshi tushiseewo ayi maali esu oonse amana, ashifubwa shoonse shaba shanu. Taaku acimwi cacaala kumupa kulekabo mibili amyuunda yesu.

¹⁹ Mutatuleeki ayi tufwe. Amuciteewo comwi! Mutaleki myuunda yesu kucaala cisuukila. Amutuule amyuunda yesu mukushinta ashakulya. Tutooba basha ba mwaami Falawo alimwi myuunda yesu itooba yaakwe. Amutupe witi tunoolyaako kwaamba ayi tutafwi, ambuuto tushange mumyuunda yesu.”

²⁰ Josefu wakoolila mwaami myuunda yoonse muIjipiti. Mwine Ijipiti woonse wakakakatishikwa kuulisha muunda wakwe, ceebo nsala yakakomena. Alimwi myuunda yoonse muIjipiti yakaba ya mwaami.

²¹ Josefu wakaalula busha bantu boonse mucishi ca Ijipiti coonse.

²² Myuunda njaatakwe kuulabo, njeeyo yakalinga ya bapailishi. Tebakalinga kweelete kuulisha myuunda yabo ceebo mwaami wakalinga kubapa pakucanina buumi.

²³ Josefu wakaambila bantu ayi, “Mwaboona ndamuula amyuunda yanu yoonse kwaamba ayi mube bakwe Falawo. Ono mbuto njeeyi, mushange mumyuunda yanu.

²⁴ Pakutebula mulyeelete kupa mwaami cipansha comwi ca shosanwe. Shacaala inga mwakushaawo mbuto acakulya canu nobeene abamuŋanda yanu.”

²⁵ Lyalo bakakumbula ayi, “Mwapulusha buumi bwesu. Mwatunyumfwila nkumbu nkambo, alimwi tulisuminite kuba basha ba mwaami.”

²⁶ Aboobo Josefu wakabika mulawo wa cishi ca Ijipiti wakwaamba ayi comwi ca shosanwe pakutebula nca mwaami. Uyu mulawo abobulya ucisebensa. Myuunda yeenka yakalinga ya bapailishi njeitakwebo kuba ya mwaami.

Kusenga kwakwe Jakobo kwakweelaako

²⁷ Bene Isilaeli bakekala mucishi ca Ijipiti mumusena wa Gosheni uko nkobakabilila akuba abaana baanji.

²⁸ Jakobo wakekala myaaka ili likumi ayosanwe ayobilo muIjipiti, kushikila waba amyaaka mwaanda amakumi one amyaaka yosanwe ayobilo ya buumi bwakwe.

²⁹ Ciindi cakufwa ndicakashika pafwaafwi, wakatuma nkombe kuli Josefu mwanaakwe ayi ese. Mpeeke wakamwaambila ayi, “Bika maansa ako pakati ka mabelo angu, ushomeshe cakulumbila ayi teshi ukambike muIjipiti.

³⁰ Ndisuni kubikwa kwakabikwa bamashali bangu bakulukulu. Mukanyamune kunkusha muIjipiti akumbika kooko nkobakabikwa.” Mpeeke Josefu wakakumbula ayi, “Ndaakucita bweenka mbomwaamba.”

³¹ Mpomunyaawo Jakobo wakaamba ayi, “Shomesha cakulumbila ayi ulaakucita ubo.” Josefu wakashomesha cakulumbila. Lyalo Jakobo wakalumba kaali pabulo bwakwe.