Matalikilo 4 - Baibo Busansulushi Bwa Libuku Ili

Kaini aAbelo

¹ Ono Adamu wakakumana aEfa mukaakwe, aboobo wakamita. Wakatumbuka mwaana musankwa. Mpeeke Efa wakaamba ayi, “Ndaba amwaana musankwa kwiinda munkusu shakwe Lesa.” Lyalo wakamupa liina ayi Kaini.

² Pesule wakashala mwaana musankwa aumwi wiitwa ayi Abelo. Abelo wakaba mweembeshi, sombi Kaini wakaba mulimi.

³ Ndipakeenda nshiku, Kaini wakaleta shilimwa akupa cipo kuMwaami Lesa.

⁴ Mpeeke Abelo wakaleta twana twa mbelele tutaanshi kushalwa kushaakwe shimwi, watucaya akubenga mulambu wa shipansha shibotu sha ntuto kuli Lesa. Mwaami Lesa wakamukondwa Abelo akutambula mulambu wakwe.

⁵ Sombi wakakaka Kaini pantu pomwi acipo cakwe. Mpeeke Kaini wakashimba kubukali.

⁶ Mpeeke Mwaami Lesa wakeepusha Kaini ayi, “Ino wakalalanshi? Ino ciwa citooboneka buyani kushundumana?

⁷ Necalinga cakwaamba ayi wacita cintu ciluleme naakwiinga walinga kusangalete. Ono ceebo cakwaamba ayi wacita citaluleme, cibiibi citookupensha mumoyo. Citooyanda kwaamba ayi cikweendeleshe sombi ulyeelete kucikoma.”

⁸ Lyalo Kaini wakaambila mukwabo Abelo ayi, “Tiya mumuunda.” Kabacili mumuunda, Kaini wakabukila mukwabo akumucaya.

⁹ Mwaami Lesa wakeepusha Kaini ayi, “Abelo mukwanu uli kuli?” Lakwe wakakumbula ayi, “Cito! Sa ndime njelete kulama mukwesu.”

¹⁰ Mpeeke Mwaami Lesa wakamwaambila ayi, “Ino wacitilanshi cintu ciyoosha mbuli ceeci? Nyumfwa! Bulowa bwa mukwanu butoolila kuli ndime kuswa mubulongo ayi mbooshe cishole.

¹¹ Ono bulya washinganwa alimwi tookoonshi kutolelela kulima. Mukwiinga bulongo bwatontola bulowa bwa mukwanu ubo inshi mboyacita anga yalakama mukubutambula ndiwalinga kumucaya.

¹² Na ukeeleshe kulima shishango, bulongo taaku nceshi bukakukusheewo. Ulaakunoolibo shikwiingooka utacite musena pacishi ca panshi.”

¹³ Lyalo Kaini wakaambila Mwaami Lesa ayi, “Mulandu uyu wakomenesha ngomwampa, inga nshiukoonshi.

¹⁴ Mutoontanda mucishi cino apameenso anu. Ndaakuba shikwiingooka utacite musena pacishi ca panshi, alimwi uli woonse eshi akancane, ulaakuncaya.”

¹⁵ Sombi Mwaami Lesa wakakumbula ayi, “Sobwe, na muntu wakucaya, ingayi mulandu wakwe ulaakukomena kwiinda waako mankanda osanwe aobilo mukuboosha cishole.” Aboobo Lesa wakabika cishibilo pali Kaini kutondesha woonse weenga wamukumanya kutamucaya.

¹⁶ Mpeeke Kaini wakaswa pameenso akwe Lesa akuya mukwikala kumusena wiitwa ayi Nodi nkokwaamba ayi, “Kwiingooka” uyo uli kwicwe lya Edeni.

Lunyungu lwakwe Kaini

¹⁷ Kaini amukaakwe bakashala mwaana musankwa akumutumba liina lyakwaamba ayi “Enoki”. Kuswawaawo Kaini wakayaka ndabala inene akwiitumba liina lya mwanaakwe musankwa.

¹⁸ Enoki wakashala mwaana musankwa wiitwa ayi Iladi, uyo wakashala Meujaeli ngowakashala Metushaelo ishi Lameki.

¹⁹ Lameki wakalinga kukwete mpali, Ada aSila.

²⁰ Ada wakashala Jabali uyo wakalinga mushali mukulukulu wa baabo boonse bafuba shifubwa akwikala mumatente.

²¹ Mukwabo musankwa wakalinga Jubali mushali mukulukulu wa baabo boonse baimbi abaabo balisha tulumbu amitoolilo.

²² Sila wakashala Tubalikaini uyo wakalinga kupanga shisebensesho kuswa kubulonse alibwe lya sheela shilemulemu. Nankashi yakwe wakalinga Naama.

²³ Lameki wakaambila bamakaakwe ayi, “Ada awebo Sila, amunkutike. Nobamakaangu, amunyumfwe maswi angu. Ndacaya musankwa ceebo wakanguma, ndamucaya cikula bwangu uyo ceebo wakancisa.

²⁴ Na muntu ucaya Kaini ulyeelete kupekwa mulandu unene kwiinda waakwe mankanda osanwe aobilo mukuboosha cishole, ingayi uyo ucaya ndime ulyeelete kupekwa mulandu unene kwiinda waangu mankanda makumi osanwe aobilo alimwi osanwe aobilo mukuboosha cishole.”

Seti aEnoshi

²⁵ Adamu wakakumana amukaakwe alimwi, mpeeke mukaakwe wakashala mwaana musankwa uyo ngwaakatumba ayi Seti. Wakaamba ayi, “Lesa wampa umbi mwaana pamusena wakwe Abelo uyo Kaini ngwaakacaya.”

²⁶ Seti alakwe wakashala mwaana musankwa akumutumba ayi Enoshi. Kuswawaawo bantu bakatalika kubanda liina lya Mwaami Lesa mukulambila kwabo.