Matalikilo 16 - Baibo Busansulushi Bwa Libuku Ili

Aga aIshimaeli

¹ Ono Salai muka Abulamu taakwe kumushalilawo baana. Sombi wakalinga kucite musha mwanakashi mwine Ijipiti wakalinga kwiitwa ayi Aga.

² Aboobo wakaambila Abulamu ayi, “Mwaami Lesa wankasha kwaamba ayi mbe abaana. Kamuya mukumanebo amusha wangu. Mpashi inga wanshalilaako baana.” Abulamu wakasumina cakaamba Salai.

³ Mpeeke Salai wakamupa Aga ayi abe ngokasuwa wakwe. Ici cakacitika Abulamu kaacite myaaka likumi kwikala muKenani.

⁴ Abulamu wakakumana aAga mpeeke wakamita. Aga ndyaakashiba ayi waba alifumo, wakalisumpula akutalika kusebaanya Salai.

⁵ Lyalo Salai wakaambila Abulamu ayi, “Ndimwe mwalengesha kwaamba ayi Aga ansebaanye. Nebo nemwiine ndime ndakamupa kuli ndimwe. Ono kuswabo mbwaakashibila ayi wamita, ulansebaanya. Ncibotu, Lesa mwiine aomboloshe akwishiba ululeme pali ndiswe sobilo, mwebo na nebo!”

⁶ Abulamu wakakumbula ayi, “Aga webo ngumusha wako alimwi ndiwe umweendelesha. Cita cili coonse ncoosuni kuli nguwe.” Lyalo Salai wakalela Aga calunkutwe, mpeeke wakaloboka, waya.

⁷ Ono munjelo wa Mwaami Lesa wakakumanya Aga pakantupu muluyanga, munshila iya kuSheli

⁸ akumwaambila ayi, “Aga omusha wakwe Salai, waswa kuli alimwi utooya kuli?” Wakakumbula ayi, “Ndaloboka kubayoosha bangu.”

⁹ Munjelo wakaamba ayi, “Boola uye ukabe musha wakwe.”

¹⁰ Alimwi wakaamba ayi, “Ndaakukupa bamulunyungu lwako baanji, muntu mbaatakoonshi kubelenga.”

¹¹ Mpeeke munjelo wa Mwaami Lesa wakamwaambila alimwi ayi, “Ono bulya wamiita, ulaakuba amwaana musankwa, ulaakumutumba ayi Ishimaeli ceebo Lesa wanyumfwa mapensho ako.

¹² Sombi mwanaako uyo ulaakunookala anga nimbongolo ya muluundu. Ulaakunoopatite bantu boonse, alakwe bantu boonse balaakunoomupatite. Ulaakunoopatitwe kubamakwabo boonse.”

¹³ Aga wakaliipusha ayi, “Sa ncakwiila ndaboona Lesa akucaala kaandi muumi?” Lyalo Mwaami Lesa uyo wakaamba anguwe wakamutumba ayi, “Lesa Uyo Umbona.”

¹⁴ Nceceeco bantu ncebeetila mukalo uli pakati ka Kadeshi aBeledi ayi, “Mukalo wa Wooyo Muumi Umbona.”

¹⁵ Aga wakashala mwaana wakwe Abulamu akumutumba ayi Ishimaeli.

¹⁶ Paciindi ico Abulamu wakalinga kucite myaaka ili 86.