Matalikilo 10 - Baibo Busansulushi Bwa Libuku Ili

Bamulunyungu lwa bana bakwe Nowa basankwa

¹ Ici ncikani capali Shemu, Amu alimwi aJafeti bana bakwe Nowa. Aba botatwe bakaba abana basankwa muyoba ndiwakamana.

² Bana bakwe Jafeti basankwa bakalinga Goma, Magogu, Medayi, Jafani, Tubali, Mesheki alimwi aTailasi.

³ Bamulunyungu lwakwe Goma bakalinga Ashikenasi, Lifati alimwi aTogama.

⁴ Bamulunyungu lwakwe Jafani bakalinga Elisha, Sipeeni, Saipulasi, aLodisi.

⁵ Aba bakalinga mbobamashali bakulukulu ba bantu abo bekala muya loombe lwa lweenge apansumbu. Mbobantu bomwi bamulunyungu lwakwe Jafeti bekala mumishobo ipusenepusene ashishi. Bamwi abamwi balaamba mumulaka wabo.

⁶ Bana bakwe Amu basankwa bakalinga Kushi, Ijipiti, Libya aKenani.

⁷ Bamulunyungu lwakwe Kushi bakalinga Seba, Afila, Sabita, Laama aSabiteka. Bamulunyungu lwakwe Laama bakalinga Seba alimwi aDedani.

⁸ Kushi wakashala mwaana musankwa wiitwa ayi Nimulodi uyo wakaba shikulwana mutaanshi wakalinga kwiindaawo cishi coonse.

⁹ Nimulodi wakalinga mufwimi wiindaawo kwiinda mulucafwo lwa Mwaami Lesa. Nceceeco bantu ncebacitile mwaambo wakwaamba ayi, “Lesa aakulengeshe kuba mufwimi wiindaawo mbuli Nimulodi!”

¹⁰ Pakutaanguna buleelo bwakwe bwakalinga kusenkanya Babiloni, Eleki, alimwi aAkadi, shoonse shotatwe kashili muBabiloniya.

¹¹ Kuswa mumusena ulya wakaya kuAsilya akuyaka ndabala inene ya Ninife, Lewoboti Ili, Kala,

¹² alimwi aLeseni, iyo ili pakati ka Ninife andabala inene iindaawo ya Kala.

¹³ Bamulunyungu lwakwe Ijipiti bakalinga mbantu ba muLidiya, Anamu, Leabu, Nafutu,

¹⁴ Patilusi, Kasulu, alimwi aKileti mushali mukulukulu wa bene Filisiti.

¹⁵ Bana bakwe Kenani basankwa nguSidoni munenebantu, aEti.

¹⁶ Alimwi Kenani wakalinga mushali mukulukulu wa bene Jebusi, bene Amo, bene Gegashi,

¹⁷ bene Ifi, bene Aki, bene Sini

¹⁸ bene Afadi, bene Semali, abene Amati. Mishobo ipusenepusene ya bene Kenani yakapalangana cakusenya manyinsa acishi cabo

¹⁹ kutalikila kuSidoni kuya cakumalenge kushika kuGela pafwaafwi aGasa, kuya cakwicwe nkwiinda kuSodoma, Gomola, Adima, aSiboimi pafwaafwi aLasha.

²⁰ Aba mbobamulunyungu lwakwe Amu, bashiite mumishobo ipusenepusene ashishi. Bamwi abamwi balaamba mumulaka wabo.

²¹ Shemu munenebantu kuli Jafeti, wakalinga ngomushali mukulukulu wa baEbulu boonse.

²² Bana bakwe Shemu basankwa bakalinga Elamu, Ashuwa, Apakishadi, Ludi alimwi aAlamu.

²³ Bamulunyungu lwakwe Alamu mbantu bene Usi, Ulu, Geta, alimwi aMesheki.

²⁴ Apakishadi wakalinga ishi Shela, uyo wakalinga ishi Eba.

²⁵ Eba wakashala baana basankwa bobilo. Umwi wakalinga kwiitwa ayi Pelegi ceebo muciindi cakwe bantu ba mucishi ca panshi bakalinga kupanseene. Umwi wakalinga kwiitwa ayi Jokutani.

²⁶ Bamulunyungu lwakwe Jokutani mbantu bene Alimodadi, Shelefu, Aasamafeti, Jela,

²⁷ Adolamu, Usali, Dikila,

²⁸ Obali, Abimaeli, Sheba,

²⁹ Ofa, Afila alimwi aJobabi. Boonse bakalinga bamulunyungu lwakwe Jokutani.

³⁰ Musena ngobakalinga kwikalaamo wakalinga kutalikila kuMesha kushika kuSefali mushishi sha tulundu kwicwe.

³¹ Boonse abo mbamulunyungu lwakwe Shemu bashiite mumishobo ipusenepusene ashishi alimwi bamwi abamwi balaamba mumilaka yabo.

³² Alimwi boonse aba mbamulunyungu lwakwe Nowa mushobo amushobo, kweelana alunyungu lwa nguwo. Muyoba ndiwakamana mishobo yoonse ya pacishi ca panshi yakaswa kubana bakwe Nowa basankwa.