Malaki 2 - Baibo Busansulushi Bwa Libuku Ili

¹ Mpeeke Mwaami Lesa Shinkusu shoonse wakaambila bapailishi ayi, “Mulawo ngontoomupa ngooyu,

² mulyeelete kunoolemeka liina lyangu mumicito yanu. Na munoobula kunyumfwila, ndaakumushingana pantu pomwi ashintu isho nshemutambula ayi shinoomucafwa. Ncakwiila ndashishingana kale mukwiinga tamukonkeli mulawo wangu amoyo woonse.

³ Ono ceebo ca ndimwe, ndaakupa mulandu bamulunyungu lwanu. Ndaakumunanika bufumba bwa milambu yanu pameenso, akumutola nkobabusowela.

⁴ Lyalo mulaakwishiba ayi ndamupa mulawo uyu kwaamba ayi cipangano cangu abene Lefi bapailishi, citolelele.

⁵ “Mucipangano cangu, ndakabalasha buumi aluumuno. Ncakwiila shintu isho ndakabapa ayi banoondemeka. Aboobo, munshiku isho bakalinga kundemeka alimwi akunoonda.

⁶ Bakalinga kwiisha shalushinisho, kakutaaku cakubeca nabi comwi. Bakalinga kwikala anebo muluumuno amubululami, alimwi akucafwa baanji ayi basanduke kuswa kushibiibi shabo.

⁷ Ceebo bapailishi balyeelete kunokwiisha lushinisho lwapali Lesa. Paceebo ceeci, bantu balyeelete kunooya kuli mbabo mukwiiya kuyanda kwangu, mukwiinga mbasebenshi bangu nebo neMwaami Lesa Shinkusu shoonse.

⁸ “Sombi mwebo nobapailishi, mwaswa munshila iluleme. Kwiisha kwanu kwalengesha baanji kubisha alimwi mwapwaya cipangano cili pali ndimwe.

⁹ Aboobo, ndalengesha kwaamba ayi bantu boonse banoomunyansha akumuceesha mukwiinga tamukwe kukonkela kuyanda kwangu alimwi mukwiisha kwanu mulasalulula.”

Bantu mbobatakwe kushoma Lesa

¹⁰ Te swebo soonse tulicitebo Ishiwesu womwi? Sa te Lesa womwi wakatulenga soonse? Ino ceebonshi tulapwaya cipangano ico Lesa ncaakabika pakati ka bameeshiwesu bakulukulu kwiinda mukutacita kweelana ambotulashanya?

¹¹ Bene Juda tabakwe kucita kweelana ambobakalasha Lesa. Sombi bakacita cintu cilensha nsoni muJelusalemu amucishi ca Isilaeli coonse. Babisha Ŋanda ya Mwaami Lesa iyo njaasuni ceebo basankwa baleeba banakashi balambila balesa ba mishobo imwi.

¹² Anu ncibotubo kwaamba ayi Mwaami Lesa atanoolanga lyobilo bantu bacita boobo ayi mbene Isilaeli. Mutabasuminishi tubili kuleta milambu kuMwaami Lesa Shinkusu shoonse.

¹³ Cintu cimwi ncemucita nkutontosha cipaililo ca Mwaami Lesa aminsonshi. Mulalila buumpute amibila mukwiinga ono Lesa ulasuula milambu yanu alimwi taitambuli cakukondwa.

¹⁴ Lyalo muleepusha ayi, “Ino nceebonshi?” Mwaami Lesa taitambuli mukwiinga ngokamboni pali ndiwe alimwi amukaako wakubwanike, ceebo tookwe kucita kweelana ambowakamulasha. Wakacita boobo nacibi kwaamba ayi wakalinga mukaako kweelana acipangano ca cikwati.

¹⁵ Sa te Mwaami Lesa ngowakabapaankanya kuba mubili womwi? Mumubili amumuuya mbaakwe. Ino ceebonshi ngumubili womwi? Wakacita boobo ayi mube abaana bamulambila. Paceebo ceeci, amulilaame mubuumi bwanu kwaamba ayi kukabule nabi womwi eshi akabule kucita kweelana ambwaakalasha mukaakwe mutaanshi.

¹⁶ Mwaami Lesa wa bene Isilaeli waamba ayi, “Nebo kulekana ndikupatite abuumbi! Cilancima muntu umwi na wacita cintu cibiibi mbuli ceeco kumukaakwe. Anu amulilaame mubuumi bwanu kwaamba ayi kukabule muntu nabi womwi eshi akabule kucita kweelana ambwaakalasha mukaakwe.”

Bushiku bwakoomboloshekwa buli pafwaafwi

¹⁷ Mwalemya Mwaami Lesa mumyaambo yanu. Sombi mwebo nobantu muleepusha ayi, “Ino twamulemya buyani?” Mwamulemya mukwiinga mulaamba ayi, “Boonse bacita shibiibi bali kabotu pameenso a Mwaami Lesa alimwi ulakondwa muli mbabo.” Alimwi amukwiipusha ayi, “Ino Lesa shibululami uli kuli?”