Maako 9 - Baibo Busansulushi Bwa Libuku Ili

¹ Jesu wakatolelela kubaambila ayi, “Ntoomulwiita calushinisho ayi mpobali bamwi pano peenka, beshi bakabule kufwa kabatana kubona Bweene bwakwe Lesa kabwisa ankusu.”

Mubili wakwe Jesu mbowakasanduka

² Ndipakeenda nshiku shosanwe abomwi, Jesu wakatola Pita, Jemusi alimwi aJoni kukalundu kalaamfu, akutanta peculu beenkabo. Mpomunyaawo mubili wakwe Jesu wakasanduka akutalika kuboneka bumbi mumeenso abo.

³ Mpeeke shakufwala shakwe shakatubabo tuu, cakwaamba ayi taaku muntu nabi womwi mucishi ca panshi weenga washitubya boobo.

⁴ Lyalo bashikwiiya abo bakabona Elija alimwi aMose kabaamba aJesu.

⁵ Ndyaakabona boobo, Pita wakaambila Jesu ayi, “Nkambo, cabota abuumbi kwaamba ayi tuli waano. Atuyake nkunka shotatwe, imwi ibe yanu, imwi yakwe Mose alimwi ayakwe Elija.”

⁶ Mukwiinga bashikwiiya aba bakaloonda abuumbi, Pita taakalinga kwishi ancaakalinga kwaamba.

⁷ Mpomunyaawo kwakaboneka likumbi lyakabafwekelela. Lyalo mulikumbi mweenka umo, mwakanyumfwika liswi lyakwaamba ayi, “Uyu ngoMwanaangu ngoonsuni, amumunyumfwile!”

⁸ Mpeeke bashikwiiya abo bakacebooka, lyalo taaku ngobakabonaawo aumwi, sombibo Jesu eenka.

⁹ Ono ndibakalinga kuseluka kuswa pakalundu, Jesu wakabaambila ayi, “Ishi nshemwabona mutakalwiiti muntu nabi womwi kushikila MwanaaMuntu akabuke kuswa kubafu.”

¹⁰ Aboobo, bakalama maswi aya ngaakabaambila, sombi bakalinga kwiipushanya ayi, “Anu kubuka kubafu uku Jesu nkwaamba kulaambanshi?”

¹¹ Mpomunyaawo bakamwiipusha Jesu ayi, “Nceebonshi bafundishi ba Milawo ncebaambila ayi Elija ngweshi akataangune kwisa?”

¹² Lyalo Jesu wakabakumbula ayi, “Ncancinencine, Elija ngweshi akataangune kwisa kwaamba ayi akaboteshe shintu shoonse. Ino kulilembetwe buyani ayi MwanaaMuntu ulyeelete kupenshekwa abuumbi alimwi akusuulwa?

¹³ Sombi nebo ntoomulwiita ayi Elija wakesa kale alimwi bantu bamwi bakacita cili coonse ncebakalinga kuyanda kuli nguwe, kweelana ambokulembetwe.”

Jesu mbwaakashilika mwanike musankwa wakalinga kucite shikaswa

¹⁴ Jesu abashikwiiya bakwe botatwe abo ndibakashika kwakacaala bashikwiiya bamwi, bakabona bantu baanji baanji kababashingulukite, abafundishi ba Milawo abo bakalinga kupikishanya abashikwiiya.

¹⁵ Ndibakabona Jesu, bantu boonse bakakankamana abuumbi, mpeeke bakamucicilila kuya mukumwaansha.

¹⁶ Mpomunyaawo Jesu wakeepusha bashikwiiya bakwe ayi, “Anu mutoopikishanyanshi abaaba bantu?”

¹⁷ Lyalo musankwa umwi wakalinga mulikoto lya bantu wakamukumbula ayi, “Nkambo, nebo ndaleta mwanaangu musankwa kuli ndimwe mukwiinga ulicite shikaswa umupa kutaamba.

¹⁸ Kulilabo koonse nkweenga wamucatila, ulamuwaala panshi. Lyalo ulatalika kuswa lyoofu kumulomo akulumanya meeno. Awalo mubili ulaboolabo nta. Ono ndalinga ndasenga bashikwiiya banu aba ayi bamukuushe, sombi baalilwa.”

¹⁹ Lyalo Jesu wakakumbula ayi, “Mwebo nobantu nomutacite lushomo! Anu nkale anu ciindi cilaamfu buyani? Anu nindilile ciindi cilaamfu buyani kwaamba ayi mushome? Amumulete kokuno.”

²⁰ Ncakwiila bakamutola kuli Jesu. Shikaswa ndyaakabonabo Jesu, wakamunyukumuna mwanike musankwa uyo. Lyalo wakawita panshi akutalika kwaalabangana. Mpeeke lyoofu lyakatalika kuswa kumulomo.

²¹ Jesu wakeepusha baishi mwaana ayi, “Anu bwakamutalika lili bulwashi ubu?” Abalo baishi bakakumbula ayi, “Bwakamutalikabo kaacili mwanike,

²² alimwi shikaswa uyu liinji liinji wakalinga kumuwaala mumulilo nabi mumaanshi kwaamba ayi amucaye. Sombi na kacikonsheka, amutunyumfwile nkumbu mutucafweeko.”

²³ Mpomunyaawo Jesu wakamwaambila ayi, “Ceebonshi utokwaamba ayi, ‘Na kacikonsheka?’ Shintu shoonse shilakonsheka kumuntu ucite lushomo.”

²⁴ Mpeeke baishi mwaana ulya bakaponsomoka akwaamba ayi, “Ndashoma, sombi ntoosenga ayi muncaafwe ayi nshome cancinencine!”

²⁵ Lyalo Jesu ndyaakabona ayi batooya cifulilaako bantu, wakakalalila shikaswa uyo ayi, “Webo oshikaswa, nookasha kunyumfwa akwaamba, ntookulwiita ayi uswe mumusankwa uyu alimwi utakaboolimo lyobilo.”

²⁶ Ndyaakamana koolobesha shikaswa, wakamunyukumuna cankusu, mpeeke wakaswaamo. Mpomunyaawo mwaana uyo wakaboolabo anga ngumuntu ufwite, lyalo bantu baanji bakatalika kwaamba ayi, “Wafwa ono!”

²⁷ Sombi Jesu wakamucata palyaansa ayi anyamuke. Lyalo wakeemikana.

²⁸ Ono Jesu ndyaakenjila muŋanda, bashikwiiya bakwe bakamwiipusha kulubasu ayi, “Ino swebo twaalilwa buyani kukusha shikaswa ulya?”

²⁹ Jesu wakabakumbula ayi, “Taakuuwo acimwi nceenga cakusha shikaswa wa mushobo uyu, sombibo kupaila kweenka.”

Jesu mbwaakaamba shalufu lwakwe alimwi

³⁰ Jesu abashikwiiya bakwe ndibakaswaako uko, bakaya mukwiinda mucishi ca Galili. Sombi lakwe Jesu taakalinga kusuni ayi bantu beshibe nkwaabete

³¹ mukwiinga wakalinga kwiisha bashikwiiya bakwe. Wakalinga kubalwiita ayi, “MwanaaMuntu ulaakwaabwa mumaansa a bantu abo beshi bakamucaaye. Nakubi boobo pabushiku bwatatu ulaakubuka alimwi kuswa kubafu.”

³² Sombi bashikwiiya bakwe tabakwe kunyumfwisha cikani ncaakalinga kwaamba, sombi bakaloonda kumwiipusha.

Ngani munene pakati kesu?

³³ Jesu abashikwiiya bakwe bakashika kuKapenaumu. Ndibakenjila muŋanda, Jesu wakeepusha bashikwiiya bakwe ayi, “Mwalinga kupikishanyanshi munshila?”

³⁴ Sombi balo bakoomunabo tontolo, mukwiinga munshila bakalinga kupikishanya makani akwishiba munene pakati kabo.

³⁵ Mpomunyaawo Jesu wakekala panshi akwiita bashikwiiya bakwe bali likumi abobilo. Lyalo wakabaambila ayi, “Uyo woonse utooyanda kuba mutanjilili ulyeelete kuliceesha, akuba musebenshi wa boonse.”

³⁶ Lyalo Jesu wakabwesa mwanike akumwiimika pakati kabo. Wakamufukata akubaambila ayi,

³⁷ “Uyo woonse utambula mwanike wa mbuli wooyu muliina lyangu, ulatambula ndime. Uyo woonse utambula ndime, taakwe kutambulabo ndime, sombi watambula awooyo wakantuma.”

Uyo woonse utatupikishi uli kulubasu lwesu

³⁸ Mpeeke Joni wakaamba ayi, “Bafundishi, twakabona muntu umwi wakalinga kukusha bashikaswa muliina lyanu, ono twakamukasha ceebo teshi wa mulikoto lyesu.”

³⁹ Sombi Jesu wakamwaambila ayi, “Kutamukasha, mukwiinga taaku muntu ucita caankamiko muliina lyangu, weenga watalika kuncobola alimwi paciindi ceenka ico.

⁴⁰ Paceebo ceeco uyo woonse utatupikishi, uli kulubasu lwesu.

⁴¹ Anu ntomulwiitilisha ayi uyo woonse umupa maanshi akunwa mukwiinga muli bakwe Klistu, ncakwiila uyo teshi akabule cilambu.”

Shintu shitulengesha kubisha

⁴² “Uyo woonse weenga walengesha womwi wabaaba banike baniini bashoma muli ndime ayi abishe, inga cabota kumwaangilila libwe linene lyakupelelaawo munshingo akumuwaala mulweenge.

⁴³ Aboobo, na lyaansa lyako lyakulengesha ayi ubishe, litimbuleeko. Mukwiinga ncibotu kwaamba ayi ukenjile mubuumi butamaani alyaansa lyomwi, kwiinda kuya mukuwaalwa mumulilo utamaani amaansa obilo. [

⁴⁴ Umo ‘mwalo mapila eshi kubalya mwaatafwi alimwi awalo mulilo mootashimiki.’]

⁴⁵ Na mweendo wako wakulengesha ayi ubishe, utimbuleeko. Mukwiinga ncibotu kwinjila mubuumi butamaani kooli mulema, kwiinda kuya mukuwaalwa mumulilo utamaani amyeendo yobilo. [

⁴⁶ Umo ‘mwalo mapila eshi kubalya mwaatafwi, awalo mulilo mootashimiki.’]

⁴⁷ Na liinso lyako lyakulengesha ayi ubishe, liloboleemo. Mukwiinga ncibotu kwinjila muBweene bwakwe Lesa aliinso lyomwi, kwiinda kuya mukuwaalwa mumulilo utamaani ameenso obilo.

⁴⁸ Umo ‘mwalo mapila eshi kubalya mwaatafwi, awalo mulilo mootashimiki.’

⁴⁹ “Kweelana ambuli cakulya mbocilungwa mwiinyo, abalo bantu balaakuboteshekwa amulilo.

⁵⁰ “Mwiinyo ngubotu, sombi na mwiinyo wasambalala, inga mwacita buyani kwaamba ayi ube kabotu alimwi? Amube bweenka mbuli mwiinyo alimwi mwikale muluumuno ababyaanu.”