Maako 8 - Baibo Busansulushi Bwa Libuku Ili

Jesu mbwaakapa cakulya shuulu shone sha bantu

¹ Ndipakeendabo nshiku shiniini abamwi bantu baanji baanji bakabungana kuli Jesu, ndyaakabona ayi bantu aba babula cakulya, wakeeta bashikwiiya bakwe akubaambila ayi,

² “Ndanyumfwila nkumbu bantu aba mukwiinga bekala nshiku shotatwe anebo alimwi bulya tabacite acakulya.

³ Ono na mbaleeke ayi bayebo ansala kumaanda abo, inga bawisuka munshila ceebo bamwi bakaswa kulaale.”

⁴ Mpeeke bashikwiiya bakwe bakamwiipusha ayi, “Ino swebo inga twashicana kuli shakulya muno muluyanga shakupa bantu baanji bobulya?”

⁵ Jesu wakabeepusha ayi, “Ino mulicite shinkwa wongaye?” Abalo bakakumbula ayi, “Tulicite wosanwe awobilo.”

⁶ Mpomunyaawo Jesu wakaambila bantu abo ayi bekale panshi. Lyalo wakabwesa shinkwa uyo wosanwe awobilo, ndyaakamana kulumba Lesa, wakakomoona shinkwa akupa bashikwiiya bakwe kwaamba ayi baabile bantu. Ncakwiila abalo bashikwiiya bakabaabila.

⁷ Bakalinga kucite atuswi tuniininiini tongayebo. Ndyaakamana kulumba Lesa patuswi utu, Jesu wakaambila bashikwiiya bakwe ayi atwalo batwaabile bantu.

⁸ Bantu boonse bakalya akukuta. Ndibakamana kulya, bashikwiiya bakwe bakesusha tutundu tosanwe atobilo twa sheesho nshebakashiyaako.

⁹ Bantu bakalya ndabona bakalinga shuulu shone.

¹⁰ Lyalo Jesu wakaambila bantu ayi banooya kumishaabo. Lakwe wakenjila mubwaato abashikwiiya bakwe akuya kucishi ca Dalamanuta.

BaFalisi mbobakasenga Jesu citondesho ca kuswa kwiculu

¹¹ BaFalisi bamwi bakesa kuli Jesu akutalika kupikishanyaakwe. Bakamusenga cakumweelesha ayi ababoneshe citondesho kwaamba ayi bashome na nkusu nshaacite shilaswa kuli Lesa.

¹² Mpeeke Jesu wakayoyela mubulaamfu akubaambila ayi, “Nceebonshi mwebo nobantu ba cecino ciindi ncemuyandila citondesho? Ntoomulwiita calushinisho ayi taaku citondesho nceshi mucitilwe.”

¹³ Mpomunyaawo wakabashiya, wakenjila mubwaato alimwi akusubukila kwitala lya lweenge.

Cimena ca baFalisi alimwi aca mwaami Elodi

¹⁴ Bashikwiiya bakwe Jesu bakalubaako kunyamuna shinkwa ukwene, bakalinga kucitebo womwi mubwaato.

¹⁵ Lyalo Jesu wakabacenjesha ayi, “Amucenjele acimena ca baFalisi alimwi acakwe Elodi.”

¹⁶ Ono balo bashikwiiya bakwe bakatalika kwaamba ayi, “Ncaambila boobo mukwiinga tatucite shinkwa.”

¹⁷ Mpomunyaawo Jesu wakeshiba ncebakalinga kwaamba, lyalo wakabaambila ayi, “Ceebonshi mutokwaamba pamakani akubula shinkwa? Nkokwaamba ayi abobulya anu tamuna kushoma nabi kunyumfwisha? Sa mitwi yanu icili iyumu?

¹⁸ Meenso mulicite, sa tamuboni? Aalo matwi mulicite, sa tamunyumfwi? Sa ncakwiila tamwiibaluki?

¹⁹ Ndindakakomoona shinkwa wosanwe ayi bantu bali shuulu shosanwe balye, mwakesusha tutundu tongaye twa shinkwa ngobakashiyaako?” Mpeeke bashikwiiya bakwe bakakumbula ayi, “Tutundu likumi atobilo.”

²⁰ “Anu ndindakakomoona shinkwa uli wosanwe awobilo ayi bantu bali shuulu shone balye, ntutundu tongaye twa shinkwa ngobakashiyaako bantu ntomwakesusha?” Abalo bakakumbula ayi, “Twakesusha tutundu tosanwe atobilo.”

²¹ Mpeeke Jesu wakabeepusha ayi, “Sa abobulya tamuna kunyumfwisha?”

Jesu mbwaakashilika musankwa moofu kuBetisaida

²² Jesu abashikwiiya bakwe bakashika kuBetisaida. Mpeeke kwakesa bantu bamwi bakaleta musankwa moofu kuli Jesu akusenga ayi amucaate amaansa.

²³ Mpomunyaawo Jesu wakacata moofu palyaansa akumukusha mumushi. Lyalo wakamushipila mate mumeenso akumucata pameenso. Mpeeke Jesu wakamwiipusha ayi, “Sa kuli ncewabonaawo?”

²⁴ Moofu uyu wakeenamuka akukumbula ayi, “Ntoobona bantu batokweendeenda, sombi batoboneka anga nshisamu.”

²⁵ Mpomunyaawo Jesu wakacata moofu uyo pameenso. Lyalo moofu wakalangishisha. Mpeeke wakaba kabotu alimwi wakatalika kulasha akuboneshesha kabotu shintu shoonse.

²⁶ Lyalo Jesu wakamulwiita ayi aye kumishaabo akumwaambila ayi, “Utabooleli mumushi uyu.”

Pita mbwaakabanda Jesu ayi ngoUsalitwe wakwe Lesa

²⁷ Mpeeke Jesu abashikwiiya bakwe bakaya kumishi ya mucishi ca Sisaliya Filipi. Ndibakalinga kuya munshila, Jesu wakabeepusha ayi, “Anu bantu balaamba ayi nebo ndime ni?”

²⁸ Balo bashikwiiya bakwe bakamukumbula ayi, “Bamwi balaamba ayi ndimwe baJoni Mubombeki, bamwi ayi ndimwe baElija, abalo bamwi balaamba ayi muli womwi wa balaluki bakulukulu.”

²⁹ Lyalo Jesu wakabeepusha ayi, “Ino mwebo, mulaamba ayi ndime ni?” Pita wakakumbula ayi, “Ndimwe Usalitwe wakwe Lesa.”

³⁰ Mpeeke Jesu wakabaambila ayi, “Mutalwiiti muntu nabi womwi shapali ndime.”

Jesu mbwaakashimika shakupenshekwa alimwi ashalufu lwakwe

³¹ Mpomunyaawo Jesu wakatalika kwiisha bashikwiiya bakwe ayi, “MwanaaMuntu ulyeelete kupenshekwa abuumbi alimwi bamaloba, bamatanjilili ba bapailishi alimwi abafundishi ba Milawo balaakumukaka akumucaya. Sombi pabushiku bwatatu, ulaakubuka kuswa kubafu.”

³² Jesu wakabalwiita makani aya cakutashisa. Lyalo Pita wakatola Jesu kulubasu akumukalalila.

³³ Sombi lakwe Jesu wakapiluluka akulanga kwakalinga bashikwiiya bakwe bamwi. Lyalo wakakalalila Pita akwaamba ayi, “Koya kulaale webo Satana ceebo miyeeyo yako taiswi kuli Lesa, sombi njabuntu!”

³⁴ Mpomunyaawo wakeeta bantu baanji, pantu pomwi abashikwiiya bakwe akubalwiita ayi, “Na muntu utooyanda kukonkela ndime, ulyeelete kushiya akusuula shintu shoonse shimusangalasha, akunyamuna mucilingano wakwe. Lyalo ndyeenga wankonkela.

³⁵ Mukwiinga uyo woonse usuni kupulusha buumi bwa buntu, ulaakubusowa. Sombi uyo woonse usowa buumi bwakwe ceebo ca ndime alimwi aceebo ca Makani Abotu, ncakwiila uyo ulaakubucana.

³⁶ Ino mbubotunshi buliimo na muntu waba ashintu shoonse shili mucishi ca panshi, sombi buumi bwakwe bwancinencine wabusowa? Taamuuwo!

³⁷ Nciinshi muntu nceenga walipila kwaamba ayi acane buumi bwancinencine alimwi?

³⁸ Paceebo ceeco uyo woonse unyumfwa nsoni ceebo ca ndime alimwi amaswi angu paciindi cino, mucishi ciswite bantu bamucita shibi, alakwe MwanaaMuntu ulaakumunyumfwila nsoni pakwisa abaanjelo basalalite, mubulemu bwa baIshi.”