Maako 5 - Baibo Busansulushi Bwa Libuku Ili

Jesu mbwaakashilika musankwa wakalinga kucite bashikaswa

¹ Jesu abashikwiiya bakwe bakasubukila kwitala lya Lweenge lwa Galili mucishi ca Gelasa.

² Jesu ndyaakaswabo mubwaato, wakakumana amusankwa uyo wakaswa kushuumbwe wakalinga kucite bashikaswa.

³ Uyu musankwa wakalinga kwikala kushuumbwe alimwi tekwakalinga nabi womwi wakalinga kucikonsha kumwaanga, nabi ancetani.

⁴ Mankanda maanji uyu musankwa wakalinga kwaangwa ncetani kumaansa akumyeendo, sombi wakalinga kusutula akutyoloola nshimbi nshebakalinga kumwaanga kumyeendo. Aboobo taaku wakalinga kumukonsha.

⁵ Lyoonse malumwi amashiku wakalinga kwikala kushuumbwe amutulundu kaolomabo akulinengoola mabwe mwiine.

⁶ Ndyaakabonabo Jesu palaale, wakamucicilila akufukama muliimfwa lyakwe.

⁷ Wakoolobesha aliswi lya peculu ayi, “Ino utooyanda kuncita buyani webo Jesu oMwanaakwe Lesa wa kwiculu Wiindaawo? Ndaseenga muliina lyakwe Lesa ayi utampenshi.”

⁸ Uyu musankwa wakaamba boobo mukwiinga Jesu wakaamba ayi, “Swa mumusankwa uyu, webo oshikaswa!”

⁹ Kuswawaawo Jesu wakamwiipusha ayi, “Ndiwaani liina?” Alakwe wakakumbula ayi, “Ndime Likoto, mukwiinga tuli baanji.”

¹⁰ Lyalo wakakombelela Jesu cankusu ayi atabatandili kucishi cimwi.

¹¹ Ono mweela lya kalundu kwakalinga litanga linene lya nkumba kashilya.

¹² Mpeeke bashikaswa bakasenga Jesu ayi, “Amututandile mulitanga lya nkumba isho kwaamba ayi twinjile muli nshisho.”

¹³ Ncakwiila wakabasuminisha. Abalo bakaswa mumusankwa uyo akwinjila munkumba. Lyalo litanga lyoonse lyakalinga kucite nkumba mpashi shuulu shobilo, lyakoondomokela kunkunamo lya kalundu akuya mulweenge mulyakaya mukulobela.

¹⁴ Lyalo abo bakalinga kweembela nkumba isho, bakacica akuya mukulwiita bantu bakalinga kwikala mundabala amumishi makani aya. Abalo bantu bakayoboloka kwisa mukubona ceeco cakacitika.

¹⁵ Ono ndibakashika kuli Jesu akubona musankwa uyo wakalinga kucite bashikaswa baanji kaashiite, kaafwete amaano kaakwenebo kabotu, bakakankamana abuumbi.

¹⁶ Mpeeke abo bakabona cakacitika kumusankwa uyo wakalinga kucite bashikaswa baanji amakani a nkumba, bakalwiita bantu mbuli mbocakalinga.

¹⁷ Ndibakanyumfwa mbuli mbocakacitika, bakakombelela Jesu ayi aswe mucishi cabo.

¹⁸ Jesu ndyaakalinga kwinjila mubwaato, musankwa wakalinga kucite bashikaswa wakamusenga ayi ayaakwe.

¹⁹ Sombi Jesu lakwe wakamukasha. Wakamwaambilabo ayi, “Koya kumishaanu, ukalwiite beshikamukowa isho nshaakucitila Mwaami Lesa munkumbu shakwe.”

²⁰ Ncakwiila musankwa uyu wakaya mucishi ciitwa ayi Mandabala ali Likumi, kaaya cishimikila sheesho shakamucitila Jesu. Aboobo, bantu boonse bakanyumfwa, bakakankamana abuumbi.

Mwanaakwe Jailosi amwanakashi wakacata cisani cakwe Jesu

²¹ Lyalo Jesu wakasubukila kwitala lya lweenge alimwi. Mpomunyaawo bantu baanji baanji bakashinguluka Jesu muloombe lwa lweenge.

²² Mpeeke kwakesa muntu umwi wiitwa ayi Jailosi, wakalinga mutanjilili umwi wa coonde ca baJuda uko. Ndyaakabona Jesu, wakaya wafukama kunembo lyakwe

²³ akumukombelela ayi, “Mwanaangu mwanakashi waciswa abuumbi. Ntoomusenga kwaamba ayi mwise mubike maansaanu pali nguwe, kwaamba ayi abe kabotu alimwi abe abuumi.”

²⁴ Mpomunyaawo Jesu wakayaakwe alimwi bantu baanji baanji bakamukonkela kabaya cimushaankanya.

²⁵ Pabantu abo, pakalinga mwanakashi wakalinga kuciswa mukunko myaaka likumi ayobilo.

²⁶ Wakeelesha kuya kubashiliki baanji. Uko kwakamaninabo buboni bwakwe boonse kwaamba ayi mpashi ulaba kabotu. Sombi bulwashi bwakalinga kuyabo panembo.

²⁷ Mwanakashi uyo wakanyumfwa mpuwo yakwe Jesu, aboobo wakeenda mubantu akushika kwisule lyakwe, wacata cisani cakwe.

²⁸ Mumoyo wakwe wakalinga kuyeeya ayi, “Na nkumyebo cisani cakwe, ncakwiila ntooba kabotu.”

²⁹ Mpomunyaawo mukunko wakamana alimwi wakanyumfwa ayi waba kabotu mumubili wakwe.

³⁰ Ciindi ceenka ico Jesu wakanyumfwa ayi nkusu shakushilika shaswa muli nguwe. Mpeeke wakapiluluka akwiipusha bantu ayi, “Ngani wancata kucisani?”

³¹ Bashikwiiya bakwe bakamukumbula ayi, “Mwebo mulibwene ayi bantu baanji batoomushaankanya, inga mweepusha buyani ayi ‘Ngani wancata?’ ”

³² Sombi Jesu wakalinga kucilangalanga kwaamba ayi abone wooyo wakamucata.

³³ Mpomunyaawo mwanakashi uyo mukwishiba cakacitika kuli nguwe, wakaya kuli Jesu caboowa akututuma. Wafukama kunembo lyakwe akumulwiita makani oonse calushinisho.

³⁴ Jesu wakamwaambila ayi, “Nankashi, lushomo lwako lwakupulusha kubulwashi. Koya muluumuno, waba kabotu cancinencine.”

³⁵ Jesu kaacaamba, kwakesa bantu bamwi bakaswa kuŋanda ya mutanjilili wa coonde ca baJuda ulya. Mpeeke bakamulwiita ayi, “Mwanaanu wafwa kale, mutoopensheshanshi bafundishi aba?”

³⁶ Sombi Jesu taakwe kubikako maano kusheeshi nshebakalinga kwaamba. Wakaambila mutanjilili wa coonde ayi, “Utaloondi, babo alushomo.”

³⁷ Lyalo taaku aumwi ngwaakasuminisha kuyaakwe, sombibo Pita, Jemusi alimwi aJoni mukwabo Jemusi.

³⁸ Ndibakashika kuŋanda ya mutanjilili wa coonde, Jesu wakacana bantu kabapilingenebo kulila.

³⁹ Mpomunyaawo wakenjila muŋanda akwaambila bantu ayi, “Nceebonshi ncemwapilinganina akulila bobulya? Mulindu uyu taafwite, uliletebo.”

⁴⁰ Ndibakanyumfwa boobo, bantu boonse bakamuweluluka. Aboobo Jesu wakabatandila pansengwe boonse. Wakatolabo baishi abanyina mulindu uyo alimwi abashikwiiya abo botatwe mbaakalingaabo akwinjila mucipinda mwakalinga mutuntu.

⁴¹ Wakacata mulindu uyo palyaansa akwaamba ayi, “Talita kumi,” nkokwaamba ayi, “Kashimbi, ntokwaambila ayi, buka!”

⁴² Mpomunyaawo wakanyamuka akutalika kweenda. (Mulindu uyo wakalinga kucite myaaka likumi ayobilo.) Bantu boonse bakakankamana abuumbi.

⁴³ Lyalo Jesu wakabakonkomesha ayi cikani ici citanyumfwiki kubantu bamwi. Mpeeke wakabaambila ayi mulindu bamupe cakulya.