Maako 16 - Baibo Busansulushi Bwa Libuku Ili

Jesu mbwaakabuka kuswa kubafu

¹ Ndibwakeenda bushiku bwakookesha bwa Cibelu, Maliya wa kuMagadala, Maliya banyina Jemusi alimwi aSalomi bakoola mafuta anunkila ayi bakananike mutuntu wakwe Jesu.

² Macuunsacuunsa paSondo, ndilyakaswabo lisuba, banakashi aba bakaya kucuumbwe.

³ Kabacili munshila bakalinga kwiipushanya ayi, “Ino ngani eshi atupilimwiteko libwe lili pamulyango wa cuumbwe?”

⁴ Bakeepushanya boobo mukwiinga libwe ilyo lyakalinga linene abuumbi. Sombi ndibakalanga kucuumbwe, bakabona ayi libwe balipilimunawo kale.

⁵ Ndibakenjila mucuumbwe, bakabona musankwa kaashite kululyo lwabo, kaafwete cisani cituba. Mpeeke bakaloonda.

⁶ Musankwa uyo wakabaambila ayi, “Mutaloondi. Ndishi kwaamba ayi mutooyandoola Jesu wa kuNasaleti, uyo ngobakapopa pamucilingano. Taamo muno, wabushikwa kale kuswa kubafu. Amubone, pamusena mpowaawa mpobakalinga bamooneka.

⁷ Ono kamuya mukalwiite bashikwiiya bakwe pantu pomwi aPita ayi, ‘Lakwe watanjila kuya kuGalili, uko nkweshi muye mukamubonene, kweelana ambwaakamwaambila.’ ”

⁸ Mpomunyaawo bakaswa mucuumbwe akutalika kucica. Miyeeyo yakapilingana, kabatutumabo. Aboobo taaku muntu nabi womwi ngobakalwiita makani aya munshila, mukwiinga bakalinga kucite boowa. [

Jesu mbwaakaboneka kuli Maliya wa kuMagadala

⁹ Pabushiku butaanshi bwa nsondo macuunsacuunsa, Jesu ndyaakabuka kuswa kubafu, wakataanguna kubonekela kuli Maliya wa kuMagadala uyo ngwaakakusha bashikaswa bosanwe abobilo.

¹⁰ Mpeeke alakwe Maliya wakanyamuka kuya mukulwiita baabo bakalinga kweenda aJesu, abo bakalinga kuungumene kabalila.

¹¹ Sombi balo ndibakanyumfwa ayi Jesu wabuka kuswa kubafu, alimwi ayi Maliya wamubona, tabakwe kushoma.

Jesu mbwaakaboneka kubashikwiiya bobilo

¹² Kuswawaawo, Jesu wakaboneka mumushobo umwi kubashikwiiya bakwe bamwi bobilo, ndibakalinga kuya bweenda munshila iya mumishi.

¹³ Mpeeke bakaboolela kuya mukulwiita babyaabo. Sombi abalo tabakwe kubashoma.

Jesu mbwaakaboneka kubashikwiiya likumi awomwi

¹⁴ Kumamanino, Jesu wakaboneka kubashikwiiya bali likumi awomwi kabalya. Wakabakalalila ceebo cakubula lushomo akuyuma myoyo, mukwiinga tabakwe kushoma baabo bakamubona kaabukite kuswa kubafu.

¹⁵ Lyalo wakabaambila ayi, “Kamuya mucishi coonse, mukashimikile Makani Abotu kubantu boonse.

¹⁶ Uyo woonse ushoma akubombekwa, ulaakupulushikwa. Sombi uyo utashomi, ulaakupekwa mulandu.

¹⁷ Abo bashoma balaakuba ashitondesho ishi: Balaakunookusha bashikaswa muliina lyangu, balaakunokwaamba milaka imwi ipusenepusene.

¹⁸ Na bakabwese nsoka teshi bakalumweewo, nabi na bakanwe musamu ukola, teshi ukabacaaye. Balaakubika maansaabo pabalwashi, abalo balaakuba kabotu.”

Jesu mbwaakatolwa kwiculu

¹⁹ Mwaami Jesu ndyaakamana kwaambaabo, wakatolwa kwiculu akuya mukwikala kululyo lwakwe Lesa.

²⁰ Bashikwiiya bakaya cishimika Makani Abotu koonse koonse. Alakwe Mwaami wakabapa nkusu shakucita shaankamiko, kutondesha bantu ayi maswi akwe ngancinencine.]