Maako 12 - Baibo Busansulushi Bwa Libuku Ili

Cikoshanyo ca balimi bakabweleka muunda wa minyansa

¹ Jesu wakatalika kubeeisha mushikoshanyo. Wakabaambila ayi, “Kwakalinga muntu wakalima muunda wa minyansa akuyakilako lushito mweela muunda. Wakakaba cilindi cakutyaninamo minyansa, alimwi akuyaka katungu kalaamfu kakulindililawo muunda. Mpomunyaawo wakoobwelekesha balimi bamwi, lyalo wakaya lweendo kucishi cimwi.

² Ndicakashika ciindi cakutebula shisepo, muntu uyo wakatuma musebenshi wakwe kubalimi ayi bakamupeewo shisepo sha mumuunda wakwe.

³ Sombi balimi abo bakamucata musebenshi uyo, bamuuma akumutanda maansabo.

⁴ Mwine muunda uyo wakatumaako aumwi musebenshi. Alakwe bakamupwaya luuma akumusebaanya cilensha nsoni.

⁵ Wakatumaako musebenshi aumwi watatu. Lakwe uyu bakamucaya. Balimi aba bakacita mushobo ngomunya uyu kubasebenshi baanji. Bamwi bakalinga kubooma, abalo bamwi bakalinga kubacaya.

⁶ Mwine muunda uyu wakacaalabo amuntu womwi wakutuma, mwanaakwe musankwa ngwaakalinga kusunishi. Kumamanino, wakamutuma kubalimi. Wakaamba ayi, ‘Mwanaangu lakwe balaakumupa bulemu.’

⁷ Sombi balimi abo bakatalika kulwiitana ayi, ‘Uyu ngweshi akapyane buboni boonse. Atumucaaye kwaamba ayi buboni boonse bukabe bwesu.’

⁸ Mpomunyaawo bakamucata, bamucaya akuwaala mutuntu pansengwe lya muunda wa minyansa.”

⁹ Mpeeke Jesu wakabeepusha ayi, “Ino mwine muunda wa minyansa uyu ulaakucita buyani? Ncakwiila ulaakwisa mukucaya balimi boonse abo akubweleka bamwi muunda.

¹⁰ Sa tamukwe kubelengawo kale Malembo akwe Lesa akwaamba ayi, ‘Libwe bayaki ndibakakaka lyakaba ndyelibwe lya mulikonko lya ŋanda, libwe lisuniki abuumbi.

¹¹ Mwaami Lesa ngowacita ceeci alimwi ncintu cikankamika abuumbi mumeenso esu?’ ”

¹² Beendeleshi ba baJuda bakeshiba kwaamba ayi Jesu wakalinga kwaamba mbabo mucikoshanyo ncaakabalwiita. Aboobo bakalinga kusuni kwaamba ayi bamucaate. Nakubi boobo bakaloonda likoto lya bantu lyakalingaawo. Mpeeke bakamushiyabo, baswaawo.

Mwiipusho wa pakupeleka musonko

¹³ Lyalo baFalisi bamwi alimwi abantu bakwe Elodi bamwi bakatumwa kwaamba ayi bacate Jesu kwiinda mukwaamba kwakwe.

¹⁴ Ndibakashika, bakeepusha Jesu ayi, “Bafundishi, tulishi kwaamba ayi mwebo mulashomeka alimwi mwebo tamukomwi amiyeeyo ya bantu. Tamusalululi, sombi muleeisha nshila yakwe Lesa calushinisho bweenka mbuli mboibete. Sa Milawo ilatusuminisha kupa musonko kuli Sisa muleli munene wa kuLoma, nabi tau?”

¹⁵ Sombi Jesu wakeshiba ayi batokwiipushabo cakubeca. Lyabo wakabeepusha ayi, “Ino mutoonsunkilanshi? Amundetele lyaali ndiboone.”

¹⁶ Abalo bakamupa lyaali lya kuLoma mpeeke wakabeepusha ayi, “Ino mutwi aliina shiliiwo nsha baani?” Bakakumbula ayi, “Nshakwe Sisa, muleli munene wa kuLoma.”

¹⁷ Lyalo Jesu wakabaambila ayi, “Anu amupe muleli munene wa kuLoma shintu isho shaakwe, alakwe Lesa mumupe shintu shaakwe.” Mpeeke bakakankamana ndibakanyumfwa kukumbula kwakwe.

Mwiipusho wa pakubuka kuswa kubafu

¹⁸ BaSaduki bamwi bakesa kuli Jesu. Bantu aba mbobaamba ayi bantu bakafwa teshi bakabukeewo. Mpeeke bakamwiipusha ayi,

¹⁹ “Bafundishi, Mose wakatulembela mulawo wakwaamba ayi, ‘Na muntu wafwa, washiya mukaakwe kaatana kushalilamo mwaana mumukaakwe, mukwabo ulyeelete kweeba mukalubinje kwaamba ayi ashalileko baana mukwabo uyo wakafwa.’

²⁰ Kwakalinga basankwa bamukowa bosanwe abobilo. Munenebantu wakeeba, sombi wakafwa kaatana kushalilamo mwaana mumukaakwe.

²¹ Wabili wakabwesa mwanakashi wakashiya munene wakwe, sombi alakwe wakafwa kwakubula mwaana. Alakwe watatu cakaba ngumushobo womwi

²² kushikila boonse bamukowa bosanwe abobilo abo, bakafwabo kwakubula kushalilamo mwaana. Kumamanino, alakwe mwanakashi wakafwa.

²³ Mukwiinga boonse bamukowa bali bosanwe abobilo bakalinga kumweebete, ono pabushiku bwakubuka kuswa kubafu, mwanakashi uyo ulaakuba muka ni?”

²⁴ Sombi Jesu wakabakumbula ayi, “Mulilubite ceebo tamwishi Malembo akwe Lesa nabi nkusu shakwe?

²⁵ Mukwiinga bantu pakubuka kuswa kubafu teshi bakanokweebana, sombi balaakuba bweenka mbuli baanjelo ba kwiculu.

²⁶ Ono apalo pamakani akubushikwa kuswa kubafu, sa tamuna kubelengaawo mulibuku ndyaakalemba Mose pamakani a cikupu cakalinga kunyaka? Palya Lesa wakaambila Mose ayi, ‘Nebo ndime Lesa wakwe Abulaamu, Lesa wakwe Isaki alimwi aLesa wakwe Jakobo.’

²⁷ Nkokwaamba ayi teshi Lesa wa bafu, nguLesa wa boomi. Anu mulilubite abuumbi.”

Mulawo unene wiinda pamilawo yoonse

²⁸ Mufundishi wa Milawo umwi wakalingaawo ndibakalinga kupikishanya pamakani aya. Ndyaakanyumfwa ayi Jesu wakumbula kabotu baSaduki, alakwe wakasena pafwaafwi akwiipusha Jesu ayi, “Ino ngumulawonshi unene pamilawo yoonse?”

²⁹ Jesu wakakumbula ayi, “Mulawo unene ngooyu, ‘Amunyumfwe mwebo nobene Isilaeli! Mwaami Lesa, Lesa wesu ngoMwaami eenkabo.

³⁰ Suna Mwaami Lesa, Lesa wako amoyo wako woonse, abuumi bwako boonse, amiyeeyo yako yoonse alimwi ankusu shako shoonse.’

³¹ Mulawo unene wabili ngooyu, ‘Suna mubyo bweenka mboolisuni omwiine.’ Taakuuwo aumwi mulawo wiinda pali yeeyi yobilo.”

³² Mpomunyaawo mufundishi wa Milawo uyo wakaambila Jesu ayi, “Ncakwiila mwakumbula kabotu noBafundishi. Mwakumbula calushinisho ndimwaamba ayi Lesa ulibo womwi, taaku Lesa aumwi, sombi nguwe eenkabo.

³³ Paceebo ceeco, kusuna Lesa amoyo woonse, amiyeeyo yoonse, ankusu shoonse alimwi akusuna mubyo bweenka mbuli mboolisuni omwiine, kukonkela milawo iyi yobilo, ncibotu abuumbi kwiinda kutola shipo shakutenta nabi shipo shimwi shoonse kuli Lesa.”

³⁴ Jesu ndyaakabona ayi wakumbula camaano, wakaambila mufundishi wa Milawo ayi, “Webo toobete kulaale aBweene bwakwe Lesa.” Lyalo kuswawaawo, boonse bakalinga kuloonda kumwiipusha.

Mwiipusho wa pamakani a Usalitwe wakwe Lesa

³⁵ Jesu ndyaakalinga kwiisha muŊanda yakwe Lesa, wakeepusha ayi, “Ino bafundishi ba Milawo balaambilanshi ayi Usalitwe wakwe Lesa wakashalwa mulunyungu lwakwe Defedi?

³⁶ Defedi mwiine ndyaakatanjililwa aMushimu Usalashi wakaamba ayi, ‘Mwaami Lesa wakaambila Mwaami wangu ayi, kala kulyaansa lyangu lyalulyo, kushikila nkaalule balwani bako kwaamba ayi babe mpopakulyata myeendo yako.’

³⁷ Na Defedi mwiine wakamwiita ayi ‘Mwaami’, ino Usalitwe wakwe Lesa inga washalwa buyani mulunyungu lwakwe alimwi?” Bantu baanji baanji bakakondwa abuumbi ndibakanyumfwa kwiisha kwakwe.

Jesu mbwaakaambila bantu ayi bacenjele abafundishi ba Milawo

³⁸ Pakubeeisha Jesu wakaamba ayi, “Amucenjele abafundishi ba Milawo abo basuni kuya bweendaana kabafwete mingaanjo alimwi akwaanshikwa cabulemu mumishika.

³⁹ Balisuni akwikala pashuuna shibotu mushoonde shabo amumisena ya bulemu mumibala.

⁴⁰ Aba bantu mbobabwesa buboni bwa bamukalubinje banakashi, akubeca kupaila mipailo ilaamfulaamfu kwaamba ayi bantu bababoone. Ncakwiila, Lesa ulaakuboombolosha cankusu.”

Cipo ca mwanakashi mukalubinje

⁴¹ Jesu ndyaakekala pafwaafwi amoomo bantu mobabika shipo muŊanda yakwe Lesa, wakalinga kulangilishabo bantu mbobakalinga kubika maali mucakubikaamo ca mumo. Bantu baanji babile bakalinga kubikamo maali aanji.

⁴² Lyalo kwakesa mwanakashi umwi mukalubinje mukandu, akubikamo tumaali twa mukuba tobilo.

⁴³ Mpomunyaawo Jesu wakeeta bashikwiiya bakwe akubaambila ayi, “Ntoomulwiita calushinisho ayi, uyu mukalubinje mukandu wabikamo maali aanji kwiinda baabo boonse babika.

⁴⁴ Mukwiinga boonse balikukusha pamaali aanji ngobacite. Sombi lakwe mubukandu bwakwe, wabikamo maali oonse ngaalinga kucite, ayo akalinga muŋanda yakwe.”