Maako 11 - Baibo Busansulushi Bwa Libuku Ili

Jesu mbwaakenjila cabulemu muJelusalemu

¹ Ndibakashika pafwaafwi akuJelusalemu, bakashika mumandabala a Betifagi alimwi aBetani, mweela Kalundu ka Olifi. Jesu wakatuma bashikwiiya bakwe bamwi bobilo

² akubaambila ayi, “Amuye mumushi ulya ngomutoobona. Mwashikabo, mulacana mwanaambongolo kaangitwe ngobatana kutantawo kale bantu. Muye mumwaangulule, mumulete kokuno.

³ Ono na umwi muntu amwiipushe ayi, ‘Ino mutoocitilanshi bobulya?’ Mwebo mumukumbule ayi, ‘Mwaami ulicitaakwe ncito alimwi utoomuboosha onoonobo.’ ”

⁴ Ncakwiila bashikwiiya abo bakaya akucana mwanaambongolo kaangitwe pamulyango mweela nshila. Lyalo bakatalika kumwaangulula.

⁵ Bamwi bantu bakalinga kwiimfwi munshila bakabeepusha ayi, “Mutokwaangulwitanshi mwanaambongolo uyo?”

⁶ Mpomunyaawo bashikwiiya abo bakabalwiita bweenka mbwaakabaambila Jesu. Mpeeke bantu abo bakabalekabo kabaangulula.

⁷ Lyalo bakamutola kuli Jesu mwanaambongolo uyo. Ndibakashika, bakayala shakufwala shabo sha peculu pambongolo. Mpeeke Jesu wakatantaawo.

⁸ Mpomunyaawo bantu baanji bakayala shakufwala shabo sha peculu munshila, abalo bamwi bakayala shikupu nshebakatyola kushisamu shaalinga mumyuunda.

⁹ Mpeeke bantu bakalinga panembo abaabo bakalinga pesule bakatalika koolobesha ayi, “Aalumbaishikwe Lesa! Aape coolwe kuli wooyo utoosa muliina lya Mwaami!

¹⁰ Lesa aape coolwe buleelo bwakwe ishiwesu Defedi ubo butoosa! Aalumbaishikwe Lesa kwiculu lya maculu!”

¹¹ Jesu ndyaakashika muJelusalemu, wakaya mukwinjila muŋanda yakwe Lesa, wakacenceenta akubona shintu shoonse. Mukwiinga lyakalinga macolesha, Jesu wakaswaamo akuya kuBetani abashikwiiya bakwe bali likumi abobilo.

Jesu mbwaakashingana cisamu ca mukuyu

¹² Bushiku bwakaboolaawo ndibakalinga kuswa kuBetani, Jesu wakanyumfwa nsala.

¹³ Mpeeke wakabona mukuyu palaale kakuswite amatewu. Lyalo wakaya mukubonaamo ayi mpashi inga wacanaamo nkuyu. Sombi ndyaakashika mucisamu, wakacana taamu. Kwakalinga kuswitebo matewu mukwiinga tecakalinga ciindi ca nkuyu.

¹⁴ Mpomunyaawo Jesu wakaambila mukuyu uyu ayi, “Taaku muntu nabi womwi eshi akalyeko nkuyu kuli ndiwe alimwi.” Abalo bashikwiiya bakwe bakaanyumfwa maswi aya.

Jesu mbwaakatanda beshimakwebo muŊanda yakwe Lesa

¹⁵ Jesu abashikwiiya bakwe ndibakashika muJelusalemu, Jesu wakenjila muŊanda yakwe Lesa akutalika kutandamo boonse abo bakalinga kuulisha akuula. Wakapinoona matebulu a bantu beshikushinta maali ashuuna sha beshikuulisha mpolobe.

¹⁶ Mpeeke wakakasha bantu boonse kunokwiinda mulubansa lwa Ŋanda yakwe Lesa, kabayumwite cimwi cintu camakwebo.

¹⁷ Lyalo wakatalika kwiisha bantu ayi, “Sa muMalembo akwe Lesa tamulembetwe ayi, ‘Ŋanda yangu ilaakwiitwa ayi ŋanda yakupaililaamo mishobo yoonse?’ Sombi mwayaalula yaba momwakuyubila beepi.”

¹⁸ Bamatanjilili ba bapailishi alimwi abafundishi ba Milawo ndibakanyumfwa makani aya, bakatalika kulangoola nshila yakucailamo Jesu. Sombi bakalinga kumuloonda, mukwiinga bantu baanji boonse bakalinga kukankamana akwiisha kwakwe.

¹⁹ Ndipakashiyashiya, Jesu abashikwiiya bakwe bakaswa mundabala inene ya Jelusalemu.

Ciiyo ca cisamu ca mukuyu

²⁰ Ndibakalinga kuya bweenda macuunsacuunsa munshila, bakabona cisamu ca mukuyu cilya kucana cayuma, kuyumina kumwi amiyanda yoonse.

²¹ Mpeeke Pita wakeebaluka cakacitika, lyalo wakaambila Jesu ayi, “Nkambo, amubone cisamu ca mukuyu cilya ncemwakashingana cayuma!”

²² Jesu wakabakumbula ayi, “Amushome muli Lesa.

²³ Ntoomulwiita calushinisho ayi na muntu waambila kalundu aka ayi, ‘Swaawo apo mpoobete, uye uliwaale mulweenge.’ Na waamba cakutatonsha mumoyo akushoma kwaamba ayi ico ncaamba citoocitika, ncakwiila cilaakucitika.

²⁴ Paceebo ceeco, ntoomulwiita calushinisho ayi, cintu cili coonse nceenga mwaseenga Lesa kwiinda mumipailo, kamushoma kwaamba ayi mwacitambula kale, lyalo mulaakucitambula cancinencine.

²⁵ Lyoonse ndimwiimikana ayi mupaile, kamulekelela boonse abo bamucitile milandu kwaamba ayi alakwe Ishiwanu uli kwiculu amulekelele shibiibi shanu. [

²⁶ Sombi mwebo na mwabula kulekelela bamwi, alakwe Ishiwanu uli kwiculu teshi akamulekelele shibiibi shanu.”]

Jesu mbobakamwiipusha pankusu shakwe

²⁷ Bakaboolela muJelusalemu. Ono Jesu ndyaakalinga kweendeenda muŊanda yakwe Lesa, bamatanjilili ba bapailishi, bafundishi ba Milawo alimwi abamaloba ba baJuda bakesa kuli nguwe

²⁸ akumwiipusha ayi, “Ino ninkusunshi nshoocite shakucita shintu ishi? Wakakupa nkusu shakucita bobulya ngani?”

²⁹ Alakwe Jesu wakabakumbula ayi, “Anebo ntoomwiipushawo mwiipusho womwi. Na munkumbule, anebo ndyeshi mulwiite wooyo wakampa nkusu shilengesha kwaamba ayi noocita shintu ishi.

³⁰ Ino ngani wakapa Joni nkusu shakwaamba ayi anoobombeka? Sa nguLesa na mbantu?”

³¹ Mpeeke bakatalika kupikishanya beene abeene ayi, “Na twaambe ayi ‘NguLesa,’ lakwe utokwaamba ayi, ‘Tamukwe kushomenanshi maswi ngaakalinga kwaamba?’

³² alimwi inga tatwaambi ayi, ‘Mbantu’.” (Bakaloonda kwaamba boobo mukwiinga bantu boonse bakalinga kwishi ayi Joni Mubombeki wakalinga mulaluki wancinencine.)

³³ Paceebo ceeco bakamukumbula ayi, “Cito na mbaani.” Lyalo Jesu wakabaambila ayi, “Anebo anu teshi mulwiite wooyo wakampa nkusu shakucita shintu ishi.”