Lute 2 - Baibo Busansulushi Bwa Libuku Ili

Lute mbwaakasebensa mumuunda wakwe Bowasi

¹ Naomi wakalinga kucite shikamukowa kulubasu lwakwe Elimeleki, ibaye, wakalinga kwiitwa ayi Bowasi. Bowasi wakalinga mubile alimwi ulemekwa.

² Bumwi bushiku Lute wakaambila Naomi ayi, “Amunsuminishe nje kumyuunda nkabwesoole bale ushiya beshikucesa. Ndishomete ayi ntoocana muntu weshi ansuminishe kuya cibwesa pesule lyakwe.” Mpomunyaawo Naomi wakakumbula ayi, “Ncibotu, koya omwanaangu.”

³ Aboobo Lute wakaya kumyuunda akunooya cibweselela bale wakalinga kucaala pesule lya basebenshi. Mucoolwe muunda uyo ngwaakalingaamo wakacanika ayi ngwakwe Bowasi shikamukowa wakwe Elimeleki.

⁴ Ndipakeenda ciindi, Bowasi wakapola kuswa kuBetileemu akwaansha basebenshi ayi, “Mwaami Lesa aabe amwebo!” Abalo bakakumbula ayi, “Mwaami Lesa aamupe coolwe!”

⁵ Kuswawaawo Bowasi wakeepusha mutanjilili wabo ayi, “Ino ulya cikula bwangu mwanakashi ngani?”

⁶ Musankwa uyo wakakumbula ayi, “Ngumwine Moabu uyo Naomi ngwaakesaakwe kuswa kucishi ncemunya ico.

⁷ Wansenga ayi anoosa cibweselela bale pesule lya basebenshi. Wasebensa kuswa macuunsacuunsa ono bulya wacileka ayi aokesheeko paniini mulya mukatungu.”

⁸ Mpeeke Bowasi wakaambila Lute ayi, “Ono kutika omwanaangu. Ulyeeletebo kubweselela bale mumuunda uno weenkabo, kuleka umwi uli woonse. Kosebensa pantu pomwi abasebenshi bangu banakashi muno.

⁹ Kobabona nkobatoocesela akunooya cibankonkela pesule lyabo. Basankwa bangu ndabalwiita kale ayi batakushuupi. Alimwi kulilabo na wafwa nyotwa, nkuyabo wanwa maanshi munongo njebasusha basankwa balya.”

¹⁰ Lute wakafukaminina Bowasi cakushisha ciwa panshi akwaamba ayi, “Ceebonshi mwalisukama boobo pali ndime? Ceebonshi mwaba ankuumbu sha mushobo uyu kuli ndime nemuswamashi?”

¹¹ Bowasi wakakumbula ayi, “Ndakanyumfwa shoonse nshewakacita kubapongoshi bako kuswabo beebayo ndibakafwa. Ndishi mbowakashiya baiso abanyoko, cishi cine mishaanu alimwi ambowakesa mukwikala pakati ka bantu mbowatakalinga kwishi.

¹² Mwaami Lesa aakupe coolwe pasheesho shoonse nshewakacita. Mwaami Lesa, Lesa wa bene Isilaeli uyo ngowesa mukulishisaako aakupe cilambu cinene!”

¹³ Lute wakakumbula ayi, “Mulicite nkumbu abuumbi, nkambo. Mwanengesha kunyumfwa kabotu abuumbi kwiinda mukubandika anebo muliswi libombu, nakubi kwaamba ayi nsheeleneewo abasebenshi banu.”

¹⁴ Ndibakalinga kulya, Bowasi wakaambila Lute ayi, “Kwesa ubwese shinkwa ubwenge mumusushi.” Mpomunyaawo wakekala abasebenshi. Mpeeke Bowasi wakamutambika ciwaya. Wakalya kushikila wakuta alimwi shakulya shimwi wakashishiyakobo.

¹⁵ Ingayi asweewo kuya mukunoobwesa bale, Bowasi wakaambila basebenshi bakwe ayi, “Amumuleeke anoobwesa nabi mushifufu, kutamulensha nsoni.

¹⁶ Umwi kamusomonona mumile kwaamba ayi anoobwesa. Kutamukalalila sobwe.”

¹⁷ Aboobo Lute wakatolelela kubweselela bale kushika macolesha. Ndyaakalupula wakasusha mpashi makilogilamu ali 10.

¹⁸ Mpeeke wakautola mundabala akutondesha bapongoshi bakwe ngwaakabwesaako. Wakabapa ashakulya nshaakashiyaako ndibakalinga kulya.

¹⁹ Naomi wakeepusha ayi, “Nkuli nkomwakusha bale oonse uyu sunu? Mwalinga kusebensela mumuunda wa baani? Lesa aape coolwe muntu uyo wamucafwa!” Mpomunyaawo Lute wakaambila Naomi ayi walinga kusebensela mumuunda wa musankwa wiitwa ayi Bowasi.

²⁰ Naomi wakaamba ayi, “Lesa aape coolwe Bowasi. Mwaami Lesa ulashomeka kubaabo bacili boomi akubaabo bakafwa kale.” Lyalo wakatolelela kaamba ayi, “Ulya musankwa ngushikamukowa wesu mwiine mwiine alimwi ngowomwi pabaabo beelete kutulama cakuteenda mweela.”

²¹ Lyalo Lute wakaamba ayi, “Ceenda kubota ncakwaamba ayi bandwiita ayi noosebensela pantu pomwi abasebenshi babo banakashi kushikila bakamanishe kucesa.”

²² Naomi wakaambila Lute ayi, “Ee omwanaangu, ncibotu kwaamba ayi unoosebensela pantu pomwi abanakashi abo mumuunda wakwe Bowasi. Ceebo mumuunda wa muntu umwi inga bakushupa.”

²³ Aboobo Lute wakasebensa ambabo akubwesa bale kushikila kuceswa kwa nguwo akwa witi koonse kwamana. Lute wakatolelela kwikala abapongoshi bakwe.