Luka 9 - Baibo Busansulushi Bwa Libuku Ili

Jesu mbwaakatuma batumwi bali likumi abobilo

¹ Jesu wakabunganya batumwi bakwe akubapa nkusu shakukusha bashikaswa akushilika malwashi.

² Lyalo Jesu wakabatuma mukushimikila shaBweene bwakwe Lesa akushilika balwashi.

³ Wakabaambila ayi, “Mutanyamuniiwo cintu nacibi comwi mulweendo lwanu, mutabwesi nkooli, coola, cakulya, maali nabi cakufwala ca peculu acimwi.

⁴ Kulilabo muŋanda mweshi bakamutambule kabotu, mukekaale mweenka umo kushikila bushiku bwakuswa mundabala iyo.

⁵ Uko koonse nkweshi bakabule kumutambula, pakuswaamo mundabala iyo, mukalipampe lusuko kumyeendo. Ici cilaakuba citondesho cakwaamba ayi balicite mulandu.”

⁶ Mpeeke batumwi bakeenda mumishi yoonse, kuya cishimikila Makani Abotu akushilika balwashi pali poonse.

Elodi mbwaakapenshekwa mumoyo

⁷ Ono mwaami Elodi, mweendeleshi wa cishi ca Galili, ndyaakanyumfwa shoonse shakacitika, wakapenshekwa mumoyo mukwiinga bantu bamwi bakalinga kwaamba ayi Joni wakabuka kuswa kubafu.

⁸ Bamwi bakalinga kwaamba ayi nguElija waboneka alimwi, abalo bamwi ayi ngumulaluki womwi wa baabo balaluki bakulukulu wabuka.

⁹ Sombi Elodi wakaamba ayi, “Joni ndakamutimbusha mutwi, ino ngani utoocita shintu ishi nshentoonyumfwa?” Kuswawaawo wakalinga kuyanda kubona Jesu uyo.

Jesu mbwaakapa cakulya bantu bali shuulu shosanwe

¹⁰ Ono ndibakaboolela batumwi abo Jesu mbaakalinga atuma, bakamulwiita shoonse nshebakacita. Mpomunyaawo Jesu wakaya eenka abatumwi bakwe kundabala ya Betisaida.

¹¹ Bantu baanji baanji ndibakanyumfwa bakamukonkela uko nkwaakaya. Jesu wakabatambula, akubaambila shaBweene bwakwe Lesa, akushilika baabo bakalinga kusuni kuba kabotu.

¹² Lisuba ndilyakalinga kuya cipila, bashikwiiya bakwe bali likumi abobilo bakaya kuli Jesu akumulwiita ayi, “Amubaambile bantu baye mumishi amumisena ili pafwaafwi bakalangoole cakulya akwakoona mukwiinga kuno takwikaali bantu.”

¹³ Sombi Jesu wakabaambila ayi, “Mwebo nweenka amubape cakulya.” Bashikwiiya bakakumbula ayi, “Tulicitebo shinkwa wosanwe atuswi tobilo. Ono sa mulisuni kwaamba ayi tuye tuule shakulya shikwana bantu boonse aba?”

¹⁴ (Pakalinga basankwa ndabona shuulu shosanwe.) Lyalo Jesu wakaambila bashikwiiya bakwe ayi, “Amwaambile bantu bekale mumakotomakoto amakumi osanwe osanwe.”

¹⁵ Bashikwiiya bakacita mbweeke ubo.

¹⁶ Lyalo Jesu wakanyamuna shinkwa wosanwe atuswi tobilo uto, wakalanga kwiculu akulumba Lesa, wakomoona akupa bashikwiiya ayi baabile bantu.

¹⁷ Bantu boonse bakalya akukuta. Mpomunyaawo bashikwiiya bakabwesa shoonse shakashiyaako bantu akususha tutundu likumi atobilo.

Pita mbwaakabanda Jesu ayi ngoUsalitwe wakwe Lesa

¹⁸ Bumwi bushiku Jesu kaapaila eenka, bashikwiiya bwakwe abalo bakalingaawo pafwaafwi. Mpeeke wakabeepusha ayi, “Anu bantu balaamba ayi ndime ni?”

¹⁹ Balo bakamukumbula ayi, “Bamwi balaamba ayi ndimwe baJoni Mubombeki, bamwi ayi ndimwe baElija, abalo bamwi ayi muli womwi wa balaluki bakulukulu uyo wakabuka.”

²⁰ Lyalo Jesu wakabeepusha ayi, “Ino mwebo mulaamba ayi ndime ni?” Pita wakakumbula ayi, “Ndimwe Usalitwe wakwe Lesa.”

²¹ Mpomunyaawo Jesu wakakonkomesha bashikwiiya bakwe ayi batalwiiti muntu nabi womwi cikani ici.

Jesu mbwaakaamba shakupenshekwa alufu lwakwe

²² Wakabaambila alimwi ayi, “MwanaaMuntu ulyeelete kupenshekwa abuumbi, akukakwa abamaloba, bamatanjilili ba bapailishi abafundishi ba Milawo. Balaakumucaya, sombi pabushiku bwatatu ulaakubushikwa kuswa kubafu.”

²³ Kuswawaawo wakabaambila boonse ayi, “Na muntu utooyanda kukonkela ndime, ulyeelete kushiya akusuula shintu shoonse shimusangalasha, wanyamuna mucilingano wakwe lyoonse akunkonkela.

²⁴ Mukwiinga uyo woonse usuni kupulusha buumi bwa buntu, ulaakubusowa. Sombi uyo woonse usowa buumi bwakwe ceebo ca ndime, ncakwiila ulaakubucana.

²⁵ Ino mbubotunshi buliimo na muntu waba ashintu shoonse shili mucishi ca panshi cino, sombi buumi bwakwe bwancinencine wabusowa nabi walinyonyoola? Taamuuwo!

²⁶ Paceebo ceeco uyo woonse unyumfwa nsoni ceebo ca ndime amaswi angu, alakwe MwanaaMuntu ulaakumunyumfwila nsoni pakwisa mubulemu bwakwe amubulemu bwa baIshi alimwi abwa baanjelo basalalite.

²⁷ Ncakwiila ntoomwaambila ayi mpobali bamwi pano peenka beshi bakabule kufwa kabatana kubona Bweene bwakwe Lesa.”

Mubili wakwe Jesu mbowakasanduka

²⁸ Ndipakeenda nshiku shosanwe ashotatwe Jesu ndyaakamana kwaamba makani aya, wakatola Pita, Joni alimwi aJemusi pakalundu mukupaila.

²⁹ Mpomunyaawo ndyaakalinga kupaila, ciwa cakwe Jesu cakasanduka ashakufwala shakwe shakaboolabo tuu.

³⁰ Paciindi ceenka ico kwakaboneka basankwa bobilo kabaamba aJesu. Aba bantu bakalinga nguMose aElija.

³¹ Bakaboneka mubulemu bwa kwiculu alimwi kabaamba aJesu palufu ulo ndwaakalinga kuya mukufwita kuJelusalemu kweelana akubamba kwakwe Lesa.

³² Pita abaabo mbaakalingaabo bakanyumfwa tulo, mpeeke ndibakapapuka bakabona bulemu bwakwe Jesu abantu bobilo kabeemfwi anguwe.

³³ Ndibakalinga kukumbulukabo bantu bobilo abo, Pita wakaambila Jesu ayi, “Nkambo, cabota abuumbi kwaamba ayi tuli waano. Atuyake nkunka shotatwe, imwi ibe yaanu, imwi yakwe Mose alimwi ayakwe Elija.” (Pita taakalinga kwishi ncaakalinga kwaamba.)

³⁴ Kaacaambabo, kwakaboneka likumbi lyakabafwekelesha. Bashikwiiya abo bakaloonda likumbi ndilyakabafwekelesha boonse.

³⁵ Lyalo mulikumbi umo mwakanyumfwika liswi lyakwaamba ayi, “Uyu ngoMwanaangu ngundakasala, aboobo amumunyumfwile!”

³⁶ Mpeeke liswi ndilyakacileka kunyumfwika, bashikwiiya bakabonabo Jesu wacaala eenka. Kuswawaawo bakacuumunabo cikani ici, kutalwiitaawo nabi womwi munshiku isho.

Jesu mbwaakashilika mwanike musankwa wakalinga kucite shikaswa

³⁷ Bushiku bwakaboolaawo, ndibakaseluka pakalundu, likoto linene lya bantu lyakacinsha Jesu.

³⁸ Mpomunyaawo, musankwa umwi mulikoto ilyo wakoolobesha ayi, “Nkambo, ndamusenga ayi amunyumfwileko nkumbu mwanaangu mukwiinga ngomwaana eenkabo ngooncite.

³⁹ Ulicite shikaswa ucita na wamucata ulooloma. Ulamunyukumuna kushikila waswa lyoofu kumulomo. Kuswawaawo taamuleeki kushikila walicisa.

⁴⁰ Ono ndalinga ndasenga bashikwiiya banu aba ayi bamukuushe, sombi baalilwa.”

⁴¹ Lyalo Jesu wakakumbula ayi “Mwebo nobantu nomutacite lushomo, nobeshicimpamya, anu nkalaanu ciindi cilaamfu buyani? Anu nindilile ciindi cilaamfu buyani ayi mushome? Amumulete kokuno mwanaanu.”

⁴² Mwaana uyo ndyaakalinga kuya kuli Jesu shikaswa wakamuwaala panshi akumunyukumuna. Sombi Jesu wakakalalila shikaswa akushilika mwaana uyo. Mpeeke wakamuboosha kuli baishi.

Jesu mbwaakaamba shalufu lwakwe alimwi

⁴³ Bantu boonse bakakankamana ndibakabona nkusu shinene shakwe Lesa shakushilika. Mpeeke bantu ndibakalinga kucikankamana shintu isho nshaakacita, Jesu wakaambila bashikwiiya bakwe ayi,

⁴⁴ “Amunyumfwishe makani aya mukwiinga MwanaaMuntu ulaakwaabwa mumaansa a bantu.”

⁴⁵ Sombi tabakwe kwishiba ncaakalinga kwaamba ceebo cakalinga kushisitwe kwaamba ayi batacinyumfwishi. Abalo bakaloonda kumwiipusha.

Ngani munene pakati kesu?

⁴⁶ Mpeeke bashikwiiya bakatalika kupikishanya shakwishiba munene pakati kabo.

⁴⁷ Jesu ndyaakeshiba ncibakalinga kuyeeya mumyoyo, wakabwesa mwaana akumwiimika kulubasu lwakwe.

⁴⁸ Lyalo wakabaambila ayi, “Uyo woonse weenga watambula mwaana wa mbuli wooyu muliina lyangu, ulatambula ndime. Uyo woonse utambula ndime watambula wooyo wakantuma. Mukwiinga uyo ngomusuula pakati kanu ngomunene.”

Uyo woonse utamupikishi uli kulubasu lwanu

⁴⁹ Mpeeke Joni wakaamba ayi, “NoBafundishi, twakabona muntu umwi wakalinga kukusha bashikaswa muliina lyanu, ono twakamukasha ceebo teshi wa mulikoto lyesu.”

⁵⁰ Sombi Jesu wakamwaambila ayi, “Kutamukasha, mukwiinga uyo woonse utamupikishi uli kulubasu lwanu.”

Mushi wa bene Samaliya mbowakakaka Jesu

⁵¹ Lyalo ndicakashika ciindi cakwaamba ayi Jesu atolwe kwiculu, wakayeeya kuya kundabala inene ya Jelusalemu.

⁵² Lyalo wakatuma batumwi kunembo lyakwe abo bakaya mukwinjila mumushi wa bene Samaliya kwaamba ayi bakamubambile musena.

⁵³ Sombi bantu ba mumushi uyo tabakwe kumutambula ceebo wakalinga kuya kuJelusalemu.

⁵⁴ Mpomunyaawo Jemusi aJoni, bashikwiiya bakwe Jesu, ndibakabona bobulya bakaamba ayi, “Nkambo, sa mulisuni kwaamba ayi twiite mulilo kuswa kwiculu ayi wise unyonyoole bantu aba?”

⁵⁵ Sombi Jesu wakacebuka akubakalalila.

⁵⁶ Mpeeke boonse bakanyamuka baya kumushi umwi.

Shakukonkela Jesu

⁵⁷ Ndibakalinga kuya bweenda munshila, muntu umwi wakaambila Jesu ayi, “Ndaakumukonkela kuli koonse nkweshi mukaye.”

⁵⁸ Sombi Jesu wakamukumbula ayi, “Bamwaaba balicite shilingo, alimwi abayuni balicite shiinswa, sombi MwanaaMuntu taacite ampaaona.”

⁵⁹ Wakaambila aumwi ayi, “Nkonkele.” Sombi lakwe muntu uyo wakaamba ayi, “Nkambo, taana mboole nje nkabike bata.”

⁶⁰ Jesu wakakumbula ayi, “Leka bafu bafukile bafunyinaabo, sombi webo koya ukashimikile shaBweene bwakwe Lesa.”

⁶¹ Aumwi muntu wakaamba ayi, “Ntoomukonkela Nkambo, ono taanguna nje nkalaashe kuŋanda yangu.”

⁶² Jesu wakamukumbula ayi, “Muntu woonse utalika kulima aŋombe, mpeeke kaacilanga kwisule, Lesa taacitaakwe ncito muBweene bwakwe.”