Luka 4 - Baibo Busansulushi Bwa Libuku Ili

Kusunkwa kwakwe Jesu

¹ Jesu wakaswaako kuMulonga wa Joodani kaaswite Mushimu Usalashi uyo wakamutanjilila kuya muluyanga.

² Umo muluyanga wakekalaamo nshiku makumi one kaasunkwa aMubiibi, sombi akaya mulomo. Lyalo nshiku makumi one ndishakamana wakafwa nsala.

³ Lyalo Mubiibi uyo wakamwaambila ayi, “Na uli Mwanaakwe Lesa, ambila libwe ili lisanduke cakulya.”

⁴ Sombi Jesu wakakumbula ayi, “Cililembetwe muMalembo akwe Lesa ayi, ‘Muntu taabi abuumi mukulyabo kweenka.’ ”

⁵ Kuswawaawo Mubiibi uyo wakamutola peculu lya kalundu kalaamfu akumutondesha malelo oonse a mucishi ca panshi muciindi ciniinibo.

⁶ Lyalo wakaambila Jesu ayi, “Buleelo boonse ubu ntookupa alimwi abubotu bwa mbubo, mukwiinga boonse bwakapekwa kuli ndime. Ndicite nkusu shakupa muntu oonse ngoonsuni.

⁷ Nkokwaamba ayi na webo ufukame akunambila, boonse buleelo ubu butooba bwaako.”

⁸ Sombi Jesu wakamukumbula ayi, “Cililembetwe muMalembo akwe Lesa ayi, ‘Ulyeelete kulambila Mwaami Lesa wako alimwi akusebenselabo nguwe.’ ”

⁹ Kuswawaawo Mubiibi wakatola Jesu kuJelusalemu akumubika pakansunswa ka Ŋanda yakwe Lesa. Mpeeke wakaambila Jesu ayi, “Na uli Mwanaakwe Lesa liwaale panshi

¹⁰ mukwiinga cililembetwe muMalembo akwe Lesa ayi, ‘Lesa ulaakutuma baanjelo bakwe kwaamba ayi bakakubaake,’

¹¹ alimwi ayi, ‘Balaakukubaka kwaamba ayi utacisi cimpanta cako kulibwe.’ ”

¹² Jesu wakamukumbula ayi, “Cililembetwe muMalembo akwe Lesa ayi, ‘Utasunki Mwaami Lesa, Lesa wako.’ ”

¹³ Mubiibi uyo ndyaakamana kusunka Jesu munshila shoonse, wakamushiya akuyeeya kumusunka ciindi cimwi.

Jesu mbwaakatalika ncito yakwe muGalili

¹⁴ Jesu wakaboolela kuGalili Mushimu Usalashi kauli anguwe. Wakaya mpuwo mucishi coonse cilya.

¹⁵ Wakalinga kwiisha mushoonde sha baJuda akulumbwa kubantu boonse.

Jesu mbwaakakakwa kuNasaleti

¹⁶ Jesu wakashika kuNasaleti uko nkwaakakulila. Mpeeke kweelana ambwaakalinga kushibite, pabushiku bwakookesha bwa Cibelu wakaya kucoonde ca baJuda. Wakanyamuka kwaamba ayi abelenge Malembo akwe Lesa kubantu.

¹⁷ Mpeeke wakapekwa ayi abelenge maswi akwe Lesa akalemba Isaya mulaluki mukulukulu. Lyalo wakacalula pakalinga kulembetwe ayi,

¹⁸ “Mushimu wa Mwaami Lesa uli pali ndime, mukwiinga wansala kwaamba ayi nshimikile Makani Abotu kubakandu. Wantuma kwaamba ayi ŋambilishe lwaanguluko kubaabo baangitwe akucita kwaamba ayi boofu balashe akulubula baabo bapenshekwa.

¹⁹ Wantuma akwaambilisha ayi uno ngomwaaka Lesa ngweshi akapulushisheemo bantu bakwe.”

²⁰ Mpomunyaawo wakacala libuku akulipa musebenshi wa mucoonde ca baJuda akwikala panshi. Mpeeke boonse bakalinga mucoonde bakamulangishisha.

²¹ Lyalo wakabaambila ayi, “Sunu malembo aya acitika cancinencine kweelana ambomwaanyumfwa kaabelengwa.”

²² Boonse bantu bakamusuminisha cakukondwa alimwi bakakankamana ambwaakaamba makani cabusongo. Balo bakatalika kwaamba ayi, “Sa te ngomwanaakwe Josefu uyu?”

²³ Mpomunyaawo wakabaambila ayi, “Mulaakuŋambila kashimpi aka ayi, ‘Omushiliki lishilike omwiine,’ alimwi mulaakuŋambilaawo ayi, ‘Nshiwakacita kuKapenaumu nshitwakanyumfwa, shicite akwalo kuno kucishi cine mishaanu.’ ”

²⁴ Wakabaambila alimwi ayi, “Ncakwiila ntoomwaambila ayi taakuuwo mulaluki ulemekwa mucishi cine mishaabo.

²⁵ “Ono amunyumfwe, kwakalinga bamukalubinje banakashi baanji mulya muIsilaeli munshiku shakwe Elija mulaluki mukulukulu, ndikwakabula mfula myaaka yotatwe amyeenshi yosanwe awomwi, kwakaba nsala inene mucishi coonse.

²⁶ Elija taakwe kutumwa kumuntu uli woonse mucishi ca Isilaeli, sombibo kumukalubinje wa kuSaleputa mucishi ca Sidoni.

²⁷ Mbweeke ubo kwakalinga bakalinga kuciswa manata baanji muIsilaeli munshiku shakwe Elisha mulaluki mukulukulu. Ono sombi Naamani wa kuSilya eenkabo ngowakasalashikwa akuba kabotu.”

²⁸ Ingayi banyumfwe boobo, bantu boonse bakalinga mucoonde ca baJuda bakakalala.

²⁹ Mpeeke banyamuka akutaanya Jesu kumukusha mundabala ilya, kuswawaawo bakamutola peculu lya kalundu pakalinga kuyakitwe ndabala yabo, kabasuni kwaamba ayi bamuwaale panshi.

³⁰ Sombi lakwe wakeenda pakati ka bantu akunooya mwiine eenka.

Jesu mbwaakakusha shikaswa mumuntu kuKapenaumu

³¹ Mpomunyaawo wakaya kuKapenaumu ndabala ya mucishi ca Galili. Uko wakalinga kwiisha bantu pabushiku bwakookesha bwa Cibelu.

³² Boonse bakakankamana abuumbi ndibakanyumfwa kwiisha kwakwe, mukwiinga maswi akwe akalinga abulemu ankusu.

³³ Mucoonde ca baJuda mulya mwakalinga muntu wakalinga kucite shikaswa wakoolobesha aliswi linene ayi,

³⁴ “Anu twamucitanshi mwebo nobaJesu ba kuNasaleti? Sa mwesa mukutunyonyoola? Ndimwishi ndimwe wooyo Usalalite uswa kuli Lesa!”

³⁵ Lyalo Jesu wakakalalila shikaswa ayi, “Umuna swa muli nguwe!” Shikaswa wakamuwisha panshi pakati ka bantu akuswa muli nguwe cakutamucisaawo.

³⁶ Bantu boonse bakakankamana akwiipushanya ayi, “Anu ngomaswinshi aya? Ncakwiila lakwe ulaambila bashikaswa cankusu abalo balamunyumfwila baswaamo!”

³⁷ Aboobo mpuwo yakwe yakanyumfwika kumisena yoonse yakalinga kushingulukite cishi cilya.

Jesu mbwaakashilika bantu baanji

³⁸ Lyalo Jesu wakaswaamo mucoonde ca baJuda akuya kuŋanda yakwe Simoni. Bapongoshi bakwe Simoni banakashi bakalinga balwashi cimpwita. Mpeeke bantu bakasenga Jesu ayi abashilike.

³⁹ Mpomunyaawo wakaya weemikana kulubasu lwa bulo akwaambila cimpwita ayi ciswe. Ciindi ceenka ico cimpwita cakamana. Bapongoshi abo bakabuka akutalika kutabataba akubapa shakulya.

⁴⁰ Lisuba ndilyakalinga kwipila abo bakalinga kucite babyaabo bakalinga kuciswa malwashi apusenepusene, bakabaleta kuli Jesu. Wakabacata maansa boonse balwashi, mpeeke bakaba kabotu.

⁴¹ Bashikaswa bakaswa mubantu baanji kaboolobesha ayi, “Ndiwe Mwanaakwe Lesa!” Sombi lakwe wakabakalalila akubakasha kwaamba mukwiinga balo bakalinga kumwishi ayi ngoUsalitwe wakwe Lesa.

Jesu mbwaakashimikila mucishi ca Judeya

⁴² Ndibwakaca Jesu wakanyamuka waya kumusena kwatakalinga kwikala bantu. Bantu bakatalika kumuyandoola, ndibakamucana bakeelesha kumusenga camaansa obilo kwaamba ayi atayi kumwi.

⁴³ Sombi lakwe wakabakumbula ayi, “Ndyeelete kushimikila Makani Abotu a Bweene bwakwe Lesa kumandabala amwi akwalo mukwiinga ncendakeshita.”

⁴⁴ Aboobo wakaya bushimikila mushoonde sha baJuda sha muJudeya moonse.