Luka 24 - Baibo Busansulushi Bwa Libuku Ili

Jesu mbwaakabuka kuswa kubafu

¹ Sombi macuunsacuunsa paSondo, banakashi abo bakanyamuna mafuta atununkila kabotu ntobakabamba akuya kucuumbwe.

² Sombi bakacana libwe balikunkulushaawo pamulyango wa cuumbwe.

³ Ndibakenjila mucuumbwe bakacana mutuntu wakwe Jesu taumo.

⁴ Kabacikankamana pacikani ici, kwakaboneka basankwa bobilo bakalinga kufwete shakufwala shimweka kabeemfwi pafwaafwi ambabo.

⁵ Banakashi abo bakaloonda abuumbi akukotamina panshi. Mpeeke basankwa abo bakabeepusha ayi, “Mutoolangwetanshi muntu muumi pakati ka bafu?

⁶ Taamo muno, wabuka kuswa kubafu. Amwiibaluke maswi ngaakamulwiita ndyaakalinga kucili kuGalili

⁷ ayi, ‘MwanaaMuntu ulyeelete kwaabwa mumaansa a bantu beshishibi, kupopwa pamucilingano, akubushikwa kuswa kubafu pabushiku bwatatu.’ ”

⁸ Mpomunyaawo bakeebaluka maswi akwe Jesu.

⁹ Ndibakaswa kucuumbwe, bakalwiita bashikwiiya bali likumi awomwi alimwi abamwi boonse abo bakalinga kukonkela kwiisha kwakwe Jesu, shoonse shakacitika.

¹⁰ Abo banakashi bakalinga Maliya wa kuMagadala, Joana aMaliya banyina Jemusi. Balo abanakashi bamwi mbobakalingaabo, bakaambila batumwi cikani ici.

¹¹ Sombi maswi ayo kubashikwiiya akabonekabo anga nkutamooka, aboobo tabakwe kwaashoma.

¹² Sombi lakwe Pita wakanyamuka akucicila kucuumbwe. Ndyaakasondelaamo wakabonabo shisani sheenka shakalinga kupombeletwemo mutuntu. Wakaboolela kuŋanda kaakankamene pacikani cakacitika.

Lweendo lwakuya kuEmausi

¹³ Bushiku bweenka ubo bashikwiiya bobilo bakalinga kuya kumushi wiitwa ayi Emausi. Kuswa kuEmausi kuya kuJelusalemu pakalingabo mushinso ulaamfu.

¹⁴ Ndibakalinga kuya bakalinga kubandika pasheeshi shoonse shakacitika.

¹⁵ Kabacibandika akwiipushanya makani ayo, Jesu mwiine wakesa pafwaafwi akweendela pantu pomwi ambabo.

¹⁶ Bakamubona, sombi tabakwe kumwishiba.

¹⁷ Mpeeke Jesu wakabeepusha ayi, “Ngamakaninshi ngomutooya cibandika?” Lyalo bakeendililabo kwiimikana ashiinso sha buumba.

¹⁸ Mpomunyaawo umwi wakalinga kwiitwa ayi Kileopasi wakakumbula ayi, “Caboneka anga ndiwebo mweensu weenka muJelusalemu uteshi cakacitika munshiku shamana ishi.”

¹⁹ Jesu wakeepusha alimwi ayi, “Nshintunshi?” Lyalo bakamukumbula ayi, “Isho shakacitika kuli Jesu wa kuNasaleti. Uyo muntu wakalinga mulaluki wakalinga kucita akwaamba shintu shikankamika pameenso akwe Lesa abantu boonse.

²⁰ Sombi bamatanjilili ba bapailishi abaleli besu bakamwaaba ayi acaikwe, kuswawaawo bakamupopa pamucilingano.

²¹ Sombi swebo twakalinga kwiingashite ayi ngweshi akalubule Isilaeli. Ono bulya peenda nshiku shotatwe kuswa ndicakacitika.

²² Ono alimwi banakashi bamwi pakati kesu batukankamika. Balinga bafumina kucuumbwe macuunsacuunsa.

²³ Ono mubili wakwe tabakwe kuucanaamo. Ndibaboola baamba ayi babonabo baanjelo bakwe Lesa abo babalwiita ayi Jesu ngumuumi.

²⁴ Bamwi ba mulikoto lyesu balinga baya kucuumbwe akucana bweenka bwaamba banakashi. Sombi Jesu abalo tabakwe kumubona.”

²⁵ Lyalo Jesu wakabaambila ayi, “Mwebo nobantu baluya nomucelwa kushoma shintu shoonse shakaamba balaluki bakulukulu!

²⁶ Sa tecalinga kweelete ayi Usalitwe apenshekwe mushobo uyo kwaamba ayi enjile mubulemu bwakwe?”

²⁷ Mpeeke wakabasansulwita shoonse shakalembwa muMalembo akwe Lesa pali nguwe, kutalikila kuli Mose kushikila akubalaluki bamwi boonse.

²⁸ Ndibakashika pafwaafwi amushi nkobakalinga kuya, Jesu wakacita anga uciya.

²⁹ Sombi bashikwiiya abo bakamukakatisha akwaamba ayi, “Amwikale aswebo mukwiinga kutooya cishiya.” Aboobo wakenjila akwikalaabo.

³⁰ Ndyaakekalaabo pakulya wakabwesa shinkwa akulumba Lesa. Mpeeke wakaukomoona akubaabila.

³¹ Mpomunyaawo meenso abo akacaluka. Lyalo bakamwishiba. Kuswawaawo wakashiminganabo.

³² Mpeeke bakatalika kwiipushanya ayi, “Sa maswi akwe taalinga kuyasa mumyoyo ndyaalinga kutulwiita Malembo akwe Lesa munshila?”

³³ Mpomunyaawo bakanyamuka akuboolela kuJelusalemu. Uko bakacana bashikwiiya bali likumi awomwi kababungene pantu pomwi abamwibo,

³⁴ kabaamba ayi, “Ncakwiila Mwaami wabuka kuswa kubafu! Walibonekesha kuli Simoni!”

³⁵ Lyalo abalo bashikwiiya bobilo balya, bakasansulula cakacitika munshila ambobakeshiba Mwaami ndyaakakomoona shinkwa.

Jesu mbwaakaboneka kubashikwiiya bakwe

³⁶ Kabacaamba bashikwiiya bobilo abo, Jesu mwiine wakaboneka kuli mbabo boonse akwaamba ayi, “Luumuno lube amwebo!”

³⁷ Sombi bakatilimuka akuloonda mukwiinga bakayeeya ayi babona cipuku.

³⁸ Lakwe wakabaambila ayi, “Ino mutoopenshekwanshi akutonsha mumyoyo yanu?

³⁹ Amubone maansa ashimpanta shangu kwaamba ayi mwishibe ayi ndime cancinencine. Amuncatecate munyumfwe mukwiinga cipuku tacicite mubili ashifuwa bweenka mbuli mbooncite.”

⁴⁰ Ingayi aambe boobo wakababonesha maansa ashimpanta shakwe.

⁴¹ Nakubi boobo tabakwe kushoma mukwiinga bakalinga kusangalete abuumbi alimwi akukankamana. Mpeeke wakabeepusha ayi, “Sa muliciteewo cakulya pano?”

⁴² Mpomunyaawo bakamupa cipansha ca nswi yakuyoka.

⁴³ Wakacitambula akulya boonse kabamubwene.

⁴⁴ Lyalo wakabaambila ayi, “Ishi nsheshintu nshendakalinga kumulwiita ndindakalingaanu. Ndakalinga kwaamba ayi shoonse shilembetwe pali ndime muMilawo yakwe Mose, abalaluki bakulukulu amuKulumbaisha shilyeelete kucitika cancinencine.”

⁴⁵ Mpeeke wakabacalula tulango kwaamba ayi banyumfwishishe Malembo akwe Lesa.

⁴⁶ Wakabaambila ayi, “Mbulya mbocilembetwe muMalembo ayi Usalitwe wakwe Lesa ulyeelete kupenshekwa akubuka kuswa kubafu pabushiku bwatatu.

⁴⁷ Cililembetwe alimwi ayi muliina lyakwe Makani Abotu ashimikilwe kubantu ba mishobo yoonse, kutalikila kuJelusalemu kwaamba ayi basanduke kuswa kushibiibi shabo, Lesa ndyeshi abalekelele.

⁴⁸ Mwebo muli bakamboni ba shintu ishi.

⁴⁹ Anebo ndaakumutumina cipo ico baTa ncebakashomesha, sombi mulyeelete kwikala mundabala inene kushikila mukatambule nkusu kuswa kwiculu.”

Jesu mbwaakatolwa kwiculu

⁵⁰ Lyalo Jesu wakabatanjilila kuswa mundabala inene iyo kushikila kuBetani. Ndibakashika wakanyamuna maansaakwe akubapa coolwe.

⁵¹ Mpeeke kaacibapa coolwe wakapansaana abo, watolwa kwiculu.

⁵² Mpomunyaawo bakamulambila akuboolela kuJelusalemu kabasangalete abuumbi.

⁵³ Ciindi coonse bakalinga kucanika muŊanda yakwe Lesa kabamulumbaisha.