Luka 20 - Baibo Busansulushi Bwa Libuku Ili

Jesu mbobakamwiipusha pabulemu ankusu

¹ Bumwi bushiku Jesu ndyaakalinga kwiisha akushimikila Makani Abotu muŊanda yakwe Lesa, bamatanjilili ba bapailishi, bafundishi ba Milawo alimwi abamaloba ba baJuda bakaya kuli nguwe

² akwiipusha ayi, “Ino ninkusunshi nshoocite shakucita shintu ishi? Wakakupa nkusu shakucita bobulya ngani?”

³ Jesu wakabakumbula ayi, “Anebo ntoomwiipushawo mwiipusho womwi.

⁴ Amundwiite, ino ngani wakapa Joni nkusu shakwaamba ayi anoobombeka? Sa nguLesa na mbantu?”

⁵ Mpeeke bakatalika kupikishanya beene abeene ayi, “Na twaambe ayi, ‘NguLesa,’ lakwe utokwaamba ayi, ‘Ino tamukwe kushomenanshi maswi ngaakalinga kwaamba?’

⁶ Ono na twaambe ayi, ‘Mbantu,’ bantu boonse aba batootuuma mabwe mukwiinga balishi ayi Joni wakalinga mulaluki.”

⁷ Paceebo ceeco bakamukumbula ayi, “Cito na mbaani.”

⁸ Lyalo Jesu wakabaambila ayi, “Anebo anu teshi mulwiite wooyo wakampa nkusu shakucita shintu ishi.”

Cikoshanyo ca balimi bakabweleka muunda wa minyansa

⁹ Mpomunyaawo Jesu wakatalika kubalwiita cikoshanyo ayi, “Kwakalinga musankwa wakalima muunda wa minyansa akuubwelekesha balimi bamwi. Mpeeke wakaya lweendo kucishi cimwi nkwaakekala ciindi cilaamfu. Ndicakashika ciindi cakutebula shisepo, musankwa uyo

¹⁰ wakatuma musebenshi wakwe kubalimi abo kwaamba ayi bakamupeewo shisepo sha mumuunda wakwe. Sombi balimi abo bakacata musebenshi uyo bamuuma akumutanda maansabo.

¹¹ Mwine muunda uyo wakatumaako aumwi musebenshi alakwe bakamuuma, bamusebaanya cilensha nsoni akumutanda maansabo.

¹² Mpeeke wakatumaako aumwi watatu, sombi alakwe bakamupwayoola akumusowela pansengwe lya muunda.

¹³ Lyalo mwine muunda uyo wakaamba ayi, ‘Ntoocita buyani? Anu ntootumakobo mwanaangu ngoonsunishi mpashi lakwe balaakumupa bulemu.’

¹⁴ Sombi balimi abo ndibakamubona, bakatalika kulwiitana ayi, ‘Uyu ngweshi akapyane buboni boonse, atumucaaye kwaamba ayi buboni boonse bukabe bwesu.’

¹⁵ Aboobo bakamukushila pansengwe lya muunda akumucaya.” Mpomunyaawo Jesu wakabeepusha ayi, “Ino nciinshi nceshi akacite mwine muunda kubalimi abo?

¹⁶ Ulaakwisa mukucaya balimi abo akupa bamwi muunda uyo.” Bantu ndibakanyumfwa boobo bakaamba ayi, “Citakacitiki!”

¹⁷ Jesu wakabalangishisha akubeepusha ayi, “Ono malembo aya alaambanshi? ‘Libwe bayaki ndibakakaka, lyakaba ndyelibwe lya mulikonko lya ŋanda.’

¹⁸ Uyo woonse eshi akawiteewo, ulaakutyokooka. Sombi uyo ngweshi likalokele, ulaakusansooka.”

Mwiipusho wa pakupeleka musonko

¹⁹ Bafundishi ba Milawo abamatanjilili ba bapailishi bakalinga kusuni kucata Jesu paciindi ceenka ico mukwiinga bakeshiba ayi Jesu wakalinga kwaamba mbabo mucikoshanyo ca balimi. Sombi bakaloonda bantu bakalingaawo.

²⁰ Aboobo bakalinga kulindila ciindi ceelete kucata Jesu. Bakapa maali bantu bamwi ayi babece kushomeka akubatuma mukusunka Jesu mumiipusho kwaamba ayi aabwe mumaansa a nkuta ya mweendeleshi wa kuLoma.

²¹ Bantu abo bakeepusha Jesu ayi, “Bafundishi, tulishi kwaamba ayi mulaamba akwiisha shiluleme. Tulishi kwaamba ayi mwebo tamusalululi, sombi muleeisha nshila yakwe Lesa calushinisho.

²² Amutulwiite, sa Milawo ilatusuminisha kupa musonko kuli Sisa, muleli munene wa kuLoma, na tau?”

²³ Sombi Jesu wakeshiba kwaamba ayi batokwiipushabo cakubeca. Lyalo wakabaambila ayi,

²⁴ “Amuntondeshe lyaali. Ino mutwi aliina shiliiwo nsha baani?”

²⁵ Bakakumbula ayi, “Nshakwe Sisa, muleli munene wa kuLoma.” Lyalo wakabaambila ayi, “Anu amupe muleli munene wa kuLoma shintu isho shaakwe, alakwe Lesa mumupe shintu shaakwe.”

²⁶ Aboobo bakaalilwa kucana cilubo musheesho nshakaamba pameenso a bantu. Mpeeke bakakankamana ndibakanyumfwa kukumbula kwakwe, lyalo bakoomunabo tontolo.

Mwiipusho wa pakubuka kuswa kubafu

²⁷ BaSaduki bamwi bakesa kuli Jesu. Bantu aba mbobaamba ayi bantu bakafwa teshi bakabukeewo. Mpeeke bakamwiipusha ayi,

²⁸ “NoBafundishi, Mose wakatulembela mulawo wakwaamba ayi, ‘Na muntu wafwa, washiya mukaakwe kaatana kushalilamo mwaana mumukaakwe, mukwabo ulyeelete kweeba mukalubinje kwaamba ayi ashalileko baana mukwabo uyo wakafwa’.

²⁹ Ono kwakalinga basankwa ba mukowa bali bosanwe abobilo. Munenebantu wakeeba, sombi wakafwa kaatana kushalilamo mwaana.

³⁰ Alakwe wabili mbweeke ubo,

³¹ awatatu bweenka, mpeeke kaciyabo kushikila boonse bali bosanwe abobilo bamana kufwa kutashalilaamo mumwanakashi uyo.

³² Kumamanino, mwanakashi uyo wakafwa alakwe.

³³ Ono pabushiku bwakubuka kuswa kubafu, mwanakashi uyo ulaakuba muka ni? Mukwiinga boonse bamukowa bali bosanwe abobilo bakalinga kumweebete.”

³⁴ Jesu wakakumbula ayi, “Bantu ba cecino ciindi baleeba akweebwa.

³⁵ Sombi abo beelete kubushikwa kuswa kubafu akwikala muciindi citoosa, teshi bakanokweebana.

³⁶ Ceebo teshi bakafweewo balaakuba anga mbaanjelo. Balaakuba bana bakwe Lesa mukwiinga balaakubushikwa kuswa kubafu.

³⁷ Pacikani ca cikupu cakalinga kunyaka, alakwe Mose wakatondesha ayi bafu balaakubushikwa mukwiinga wakabanda Lesa ayi, ‘NguLesa wakwe Abulaamu, wakwe Isaki alimwi awakwe Jakobo.’

³⁸ Nkokwaamba ayi teshi Lesa wa bafu, sombi nguLesa wa boomi, kuli nguwe boonse mboomi.”

³⁹ Bafundishi ba Milawo bamwi bakakumbula ayi, “Mwaamba kabotu Bafundishi!”

⁴⁰ Kuswawaawo bakalinga kuloonda kumwiipusha miipusho.

Mwiipusho wa pamakani a Usalitwe wakwe Lesa

⁴¹ Jesu wakabeepusha ayi, “Ceebonshi bantu balaamba ayi Usalitwe wakwe Lesa wakashalwa mulunyungu lwakwe Defedi?

⁴² Mukwiinga Defedi mwiine mulibuku lya Kulumbaisha wakaamba ayi, ‘Mwaami Lesa wakaambila Mwaami wangu ayi, Kala kulyaansa lyangu lyalulyo,

⁴³ kushikila nkaalule balwani bako kwaamba ayi babe mpopakulyata myeendo yako.’

⁴⁴ Na Defedi mwiine wakamwiita ayi ‘Mwaami’, ino Usalitwe wakwe Lesa inga washalwa buyani mulunyungu lwakwe alimwi?”

Jesu mbwaakaambila bantu ayi bacenjele abafundishi ba Milawo

⁴⁵ Bantu boonse kabanyumfwite Jesu wakaambila bashikwiiya bakwe ayi,

⁴⁶ “Amucenjele abafundishi ba Milawo abo basuni kuya bweendaana kabafwete mingaanjo akwaanshikwa cabulemu mumishika. Balisuni kwikala pashuuna shibotu mushoonde shabo amisena ya bulemu mumibala.

⁴⁷ Aba bantu mbobabwesa buboni bwa bamukalubinje banakashi akubeca kupaila mipailo ilaamfulaamfu kwaamba ayi bantu bababoone. Aba bantu ncakwiila Lesa ulaakuboombolosha cankusu.”