Luka 2 - Baibo Busansulushi Bwa Libuku Ili

Jesu mbwaakashalwa

¹ Munshiku isho Sisa Agasitasi, muleli munene wa kuLoma, wakabika mulawo wakwaamba ayi bantu boonse bali mubuleelo bwa Loma balembwe.

² Uku kwakalinga nkokulembesha kutaanshi kwakacitika Kwilinyasi ndyaakalinga mweendeleshi mucishi ca Silya.

³ Boonse bakaya mukulembesha umwi aumwi kumishaabo nkwaakashalilwa.

⁴ Josefu alakwe wakanyamuka kuswa kuNasaleti mucishi ca Galili kuya kundabala yakwe Defedi iyo yakalinga kwiitwa ayi Betileemu, mucishi ca Judeya, mukwiinga wakalinga ngwa mulunyungu lwakwe Defedi.

⁵ Wakaya pantu pomwi aMaliya uyo ngwaakalinga kumamikite kwaamba ayi baye bakalembwe, ciindi ici Maliya wakalinga kumitite.

⁶ Kabacili kooko nshiku shakupulukaamo shakashikila.

⁷ Wakapulukaamo mwaana wakwiiya musankwa. Wakamupetelesha mushisani akumooneka mulinkubala lyakalinga kulitaamo ŋombe mukwiinga temwakalinga musena muŋanda ya beensu.

Baanjelo bakeshibisha beembeshi

⁸ Kulya kweenka kucishi kwakalinga beembeshi bakalinga kulindilila mbelele shabo mashiku.

⁹ Mpeeke munjelo wa Mwaami Lesa wakaboneka kuli mbabo, lyalo bakaloonda abuumbi mukwiinga mpobakalinga kushiite pakaboolabo tuu kubulemu bwakwe Lesa.

¹⁰ Munjelo wakabaambila ayi, “Mutaloondi mukwiinga ndaleta makani abotu eshi akasangalashe bantu boonse.

¹¹ Sunu mundabala yakwe Defedi mwashalwa Mupulushi wanu uyo ngoKlistu Mwaami.

¹² Ono nceeci citondesho, mutooya mucane kateta upeteleshetwe mushisani alimwi ulilete mulinkubala mulita ŋombe.”

¹³ Paciindi ceenka ico kwakaboneka baanjelo baanji baanji ba kwiculu pantu pomwi amunjelo ulya, kabalumbaisha Lesa kabaamba ayi,

¹⁴ “Bulemu kuli Lesa kwiculu lya maculu, alimwi akube luumuno panshi pali baabo boonse bamukondelesha!”

¹⁵ Ndibakaswaawo baanjelo akuboolela kwiculu, beembeshi bakalyaamboosha ayi, “Katiya tushikeeko kuBetileemu tukabone cacitika ico Mwaami Lesa ncaatwishibisha.”

¹⁶ Bakaya cakufwambaana, bacana Maliya aJosefu alimwi amwaana kaalete mulinkubala mulita ŋombe.

¹⁷ Beembeshi ndibakamubona, bakakonkolola shoonse nshibakaambilwa kumunjelo pamwaana uyo.

¹⁸ Mpeeke boonse ndibakacinyumfwa cikani ici cakaamba beembeshi bakakankamana abuumbi.

¹⁹ Maliya wakabika shintu shoonse ishi mumoyo wakwe akunooshiyeeya.

²⁰ Beembeshi balya bakaboolela kabaya cilemeka akulumbaisha Lesa pasheesho shoonse nshibakanyumfwa akubona. Cakaba bweenka mbuli munjelo mbwaakabalwiita.

Jesu mbwaakatumbwa liina

²¹ Lyalo ndipakeenda nshiku shosanwe ashotatwe mwaana ulya wakapalulwa akutumbwa ayi Jesu, liina lyakaamba munjelo kaatana kumitwa.

Jesu mbwaakatolwa kuŊanda yakwe Lesa

²² Ciindi cakwaamba ayi bakasalashikwe kweelana aMilawo yakwe Mose ndicakashika, bakatola mwaana kuJelusalemu kwaamba ayi bakamutondeshe kuMwaami Lesa.

²³ Ici cakacitika kweelana ambocilembetwe muMilawo ya Mwaami Lesa kwaamba ayi, “Woonse mwaana musankwa wakwiiya ulyeelete kupekwa kuMwaami Lesa.”

²⁴ Bakaya mukupa acipo ca twaana tobilo twa mpolobe nabi nkulimba shobilo kweelana ambocilembetwe mumulawo wa Mwaami.

²⁵ Ono muJelusalemu mwakalinga muntu wakalinga kwiitwa ayi Simyoni. Wakalinga muntu usalalite ulemeka Lesa alimwi wakalinga kulangila kupulushikwa kwa bene Isilaeli. Mushimu Usalashi wakalinga pali nguwe.

²⁶ Mushimu Usalashi uyu wakalinga wamuyubulwita kale ayi teshi akafwe kaatana kubona Usalitwe wakwe Lesa.

²⁷ Mushimu Usalashi wakamutanjilila Simyoni kuya kuŋanda yakwe Lesa. Bashali bakwe Jesu bakamwinjisha ayi bamucite kweelana aMilawo.

²⁸ Mpeeke Simyoni wakatambula mwaana akumufukata pamaansa akulumbaisha Lesa ayi,

²⁹ “NoBaami, ncakwiila mwaciita mbuli mbomwakanshomesha nemusebenshi wanu. Ono amundeeke mfwe muluumuno.

³⁰ Mukwiinga lupulusho lwanu ndalubona ameenso angu,

³¹ lupulusho ulo ndumwabambila pameenso a bantu boonse.

³² Uyu ngomumuni wakwaamba ayi baswamashi bakunsengwe balashe akubona lusuno lwanu akwalo kubantu banu baIsilaeli ngooleta bulemu.”

³³ Bashali bakakankamana ndibakanyumfwa maswi akaamba Simyoni pamwaana uyo.

³⁴ Mpeeke Simyoni wakabapa coolwe akulwiita Maliya banyina Jesu ayi, “Uyu mwaana wasalwa aLesa kwaamba ayi awishe akubusha baanji pakati ka bene Isilaeli. Ulaakuba citondesho cakuswa kuli Lesa ico baanji nceshi bakakake.

³⁵ Ulaakuyubulula miyeeyo yabo ishishitwe. Ono awebo buumba bulaakukucata anga wayaswa mupeeni kumoyo.”

³⁶ Kwakalinga mulaluki aumwi mwanakashi wiitwa ayi Ana. Wakalinga mwanaakwe Faniwelo wa mulunyungu lwakwe Asha. Wakalinga mucembele alimwi wakekala abeebaye myaaka yosanwe ayobilobo.

³⁷ Paciindi ico wakalinga kucite myaaka makumi osanwe aotatwe alimwi ayone. Ciindi coonse ici wakalinga kuya kuŋanda yakwe Lesa. Wakalinga kupaila kuli Lesa mashiku amalumwi alimwi wakalinga kuba aciindi cakulikasha kulya.

³⁸ Ceenka ici ciindi Jesu ndyaakatolwa, Ana wakashika walumba Lesa akwaamba makani pamwaana uyo kuli baabo boonse bakalinga kulindilila kupulushikwa kwa Jelusalemu.

Mbobakaboolela kuNasaleti

³⁹ Ono Josefu aMaliya ndibakamanisha kucita shoonse kweelana aMilawo ya Mwaami Lesa, bakaboolela kumishaabo kuNasaleti mucishi ca Galili.

⁴⁰ Lyalo mwaana wakakomena akuba ankusu alimwi wakaba musongo abuumbi. Aboobo coolwe cakwe Lesa cakalinga pali nguwe.

Jesu pakati ka bafundishi ba Milawo

⁴¹ Bashali bakwe Jesu bakalinga kuya kuJelusalemu lyoonse pamwaaka pabushiku bwa Pasika bwakwiibaluka kusotokela.

⁴² Jesu ndyaakaba amyaaka likumi ayobilo, bashali bakaya mukusekelela kweelana ambuli mbobakalinga kushibite.

⁴³ Ndikwakamana kusekelela bakatalika kuboolela kuNasaleti kabateshi kwaamba ayi Jesu wacaala kwisule kuJelusalemu.

⁴⁴ Balo bashali bakwe bakalinga kuyeeya ayi uli mulikoto lya bantu mbobakalinga kuyaabo nshila yomwi. Bakeenda mushinso wakatola bushiku bomwi. Ndibakabona kwaamba ayi taapo bakatalika kumuyandoola pabamakwababo ababyaabo.

⁴⁵ Ndibakacana ayi taapo, bakaboolela kuJelusalemu kunooya cimulangoola.

⁴⁶ Bakesa mukumucana ndipakeenda nshiku shotatwe muŋanda yakwe Lesa kaashite pakati ka bafundishi ba Milawo, kaabakutika akunoobeepusha miipusho.

⁴⁷ Bantu boonse bakakankamana ndibakanyumfwa kukumbula kwakwe kwabusongo.

⁴⁸ Bashali bakwe ndibakamubona bakacatabo pamilomo. Lyalo banyina bakaamba ayi, “Omwanaangu ino watupensheshanshi bobulya? Bona nebo abaiso twalinga kwisa cikulangoola katulisukeme abuumbi.”

⁴⁹ Jesu wakabakumbula ayi, “Ino mwalikunangwetanshi? Sa temwalinga kwishi kwaamba ayi ndyeelete kuba muŋanda ya baTa?”

⁵⁰ Sombi tabakwe kwishiba ncaakaamba.

⁵¹ Lyalo wakanyamuka akuyaabo kuNasaleti alimwi wakalinga kubanyumfwila. Maliya wakasunga shintu ishi shoonse mumoyo wakwe.

⁵² Jesu wakakula muciimo amubusongo alimwi wakaba mwaana ukondelesha Lesa abantu boonse.