Luka 17 - Baibo Busansulushi Bwa Libuku Ili

Cibiibi

¹ Jesu wakaambila bashikwiiya bakwe ayi, “Shintu shilengesha muntu kubisha shilyeelete kucitika, sombi mapensho kuli wooyo ulengesha ayi shicitike.

² Inga cabota kwaamba ayi uyo muntu aangwe libwe linene lyakupelelaawo munshingo akumuwaala mulweenge, kwiinda kulengesha womwi wa baaba bace bace kubisha.

³ Aboobo amucenjele! Na mukwanu wakubishisha, mwaambile. Na wasumina ayi wabisha, mulekelele.

⁴ Na wakubishisha mankanda osanwe aobilo pabushiku bomwi, alimwi mankanda oonse aya keesa kuli ndiwe akwaamba ayi, ‘Ndabiisha,’ ulyeelete kumulekelela.”

Lushomo

⁵ Lyalo batumwi bakaambila Mwaami Jesu ayi, “Amukomenye lushomo lwesu.”

⁶ Mwaami Jesu wakabakumbula ayi, “Nemwalinga kucite lushomo luli mbuli luseke lwa masitadi, naakwiinga mulakonsha kwaambila cisamu ayi, ‘Shuka apo ulishimpike mulweenge!’ Acalo inga camunyumfwila.

Incito amusebenshi

⁷ “Ino na umwi pakati kanu kaacite musebenshi ulima mumuunda nabi kweembela mbelele, sa inga ndyaakotokabo wamwaambila ayi, ‘Fwambaana kosa ulye cakulya?’

⁸ Sobwe, inga toociti boobo! Sombi ulamwaambila ayi, ‘Ntabatile cakulya, na umanishe ufwale kabotu akundetela cakulya acakunwa. Lyalo awebo ndyeshi ulye akunwa.’

⁹ Ono sa uyo muntu inga walumba musebenshi wakwe ceebo wacita ncaamwaambila? Sobwe.

¹⁰ Bweenka ubo amwebo mbocibete. Na mwacita nshemwakaambilwa, mulyeelete kwaamba ayi, ‘Tuli basebenshi bateelete kulumbwa mukwiinga twacitabo mulimo wesu!’ ”

Jesu mbwaakashilika beshimanata bali likumi

¹¹ Jesu ndyaakalinga kuya kuJelusalemu, wakeenda panyinsa ya Samaliya aGalili.

¹² Ndyaakashikabo mumushi umwi, beshimanata bali likumi bakamukumanya akwiimikana palaale.

¹³ Lyalo bakoolobesha ayi, “NobaJesu, Nkambo amutunyumfwileko nkumbu!”

¹⁴ Jesu ndyaakababona wakabaambila ayi, “Kamuya kubapailishi bakamuboone ayi mwaba kabotu.” Lyalo ndibakalinga kuya bweenda munshila, bakaba kabotu.

¹⁵ Mpomunyaawo womwi pakati kabo ndyaakabona ayi waba kabotu, wakaboolela kuli Jesu kaaya cilumbaisha Lesa aliswi lya peculu.

¹⁶ Mpeeke ashike kuli Jesu, wakafukama kunembo lyakwe akumulumba. Shimanata uyu wakalinga mwine Samaliya.

¹⁷ Mpomunyaawo Jesu wakaamba ayi, “Sa te baba kabotu balinga likumi? Ino bamwi bosanwe abone bali kuli?

¹⁸ Ceebonshi kwaboolabo muswamashi eenka mukulumba Lesa?”

¹⁹ Kuswawaawo, Jesu wakaambila shimanata uyo ayi, “Nyamuka, koya, lushomo lwako lwakushilika.”

Kwisa kwa Bweene bwakwe Lesa

²⁰ BaFalisi bamwi ndibakeepusha Jesu ayi Bweene bwakwe Lesa bulaakwisa lili, wakabakumbula ayi, “Bweene bwakwe Lesa teshi bukese ashitondesho, sobwe.

²¹ Taaku eshi akaambe ayi, ‘Bona, mbuno kuno!’ nabi ayi, ‘Mbulya kulya!’ mukwiinga Bweene bwakwe Lesa buli muli ndimwe.”

²² Lyalo wakaambila bashikwiiya bakwe ayi, “Cilaakushika ciindi ndyeshi mukayande kubona nabibo bushiku bomwi bwa nshiku sha MwanaaMuntu, sombi teshi mukabuboneewo, sobwe.

²³ Kulaakuba bantu beshi bakamwaambile ayi, ‘Amubone ngulya kulya!’ nabi ayi, ‘Nguno kuno!’ Mutakayiiko nabi kubakonkela.

²⁴ Mukwiinga bweenka bubeka mfula mwiculu kuswa kulubasu lumwi kushika kulubasu lumwi, mbweshi kukabe pabushiku bwakwisa MwanaaMuntu.

²⁵ Sombi ulyeelete kutaanguna kupenshekwa abuumbi akukakwa abantu ba cecino ciindi.

²⁶ Bweenka mbokwakalinga munshiku shakwe Nowa mbweshi kukabe amunshiku sha MwanaaMuntu.

²⁷ Munshiku isho bakalinga kulya, kunwa, kweeba alimwi akweebwa kushikila bushiku Nowa ndyaakenjila mubwaato. Lyalo muyoba unene wakesa akubanyonyoola boonse.

²⁸ Cilaakuba bweenka mbocakalinga munshiku shakwe Loti. Bantu bakalinga kulya akunwa, kuula akuulisha, kushanga akuyaka maanda.

²⁹ Sombi bushiku Loti ndyaakaswa muSodoma, mulilo asalufa shakaloka kuswa kwiculu akubanyonyoola boonse.

³⁰ Kulaakuba bweenka ubo pabushiku MwanaaMuntu ndyeshi akayubululwe.

³¹ “Pabushiku ubo, uyo eshi akanooli paciluli ca ŋanda atakaseluki ayi abwese shintu shakwe muŋanda, alakwe uyo eshi akanooli mumuunda taaelete kuboolela kuŋanda.

³² Amwiibaluke muka Loti!

³³ Uyo woonse uyanda kupulusha buumi bwakwe bwa buntu, ulaakubusowa. Sombi uyo ubusowa ceebo ca ndime, ulaakuba abuumi bwancinencine.

³⁴ Ntoomulwiita ayi pabushiku ubo mashiku, bantu bobilo balaakunoolete pabulo bomwi, sombi umwi ulaakutolwa, umwi ulaakucaala.

³⁵ Banakashi bobilo balaakunoopela pantu pomwi, sombi umwi ulaakutolwa, umwi ulaakucaala. [

³⁶ Basankwa bobilo balaakunooli mumuunda, sombi umwi ulaakutolwa, umwi ulaakucaala.]”

³⁷ Bashikwiiya bakamwiipusha ayi, “Nkambo, nkuli nkweshi shikacitikile ishi?” Jesu wakakumbula ayi, “Uko kuli mutuntu, aalo makubi nkweshi akabungane.”