Luka 11 - Baibo Busansulushi Bwa Libuku Ili

Jesu mbwaakeeisha bwakupaila

¹ Bumwi bushiku Jesu wakalinga kupaila kumusena umwi. Ndyaakamanisha, umwi shikwiiya wakwe wakamwaambila ayi, “Nkambo, amutwiishe bwakupaila bweenka mbuli Joni mbwaakeeisha bashikwiiya bakwe.”

² Jesu wakabaambila ayi, “Pakupaila munokwaamba ayi, ‘Ta, alilemekwe liina lyanu. Abwise Bweene bwanu.

³ Amutupe lyoonse shakulya nshetubula.

⁴ Amutulekelele shibiibi shesu bweenka mbotulekelela batubishisha. Mutatwinjishi mumasunko.’ ”

⁵ Lyalo wakabaambila alimwi ayi, “Ino na umwi peenka pano waya kuŋanda ya mubye pakati ka mashiku akwaamba ayi, ‘Mwana, mbwelekeeko shinkwa wotatwe

⁶ mukwiinga ndapolelwa mweensu uli palweendo. Ono nshicite cakumupa ayi alye!’

⁷ Ono na mubyo wakumbwitabo mukati ayi, ‘Utanshuupi! Kumulyango twacalaako kale alimwi nebo abana bangu toona kale. Inga nshikoonshi kubuka ayi nkupe coonse ncoosuni.’

⁸ Ntoomulwiita ayi, nabi akabule kubuka akukupa shinkwa mukwiinga wa cibusa anguwe, ulaakubuka akukupa coonse ncoosuni mukwiinga wakakatila kumusenga.

⁹ “Paceebo ceeco ndamwaambila ayi, amusenge mulaakupekwa, amulangoole mulaakucana alimwi mukonkoonshe mulaakucalwitwa.

¹⁰ Ceebo uyo woonse usenga ulapekwa, awooyo ulangoola ulacana, alakwe ukonkoonsha ulacalwitwa.

¹¹ Sa kuli mushali musankwa pakati kanu weenga wapa mwanaakwe nsoka na wasenga nswi?

¹² Nabi na wasenga liyi, sa inga wamupa ntalaŋongo?

¹³ Ono na mwebo, nobantu nobeshishibi, kamwishi kupa bana banu shipo shibotu, ino lakwe Ishiwanu wa kwiculu inga waalilwa buyani kupa Mushimu Usalashi kubaabo bamusenga?”

Jesu aBilusebulu

¹⁴ Jesu wakalinga kukusha shikaswa wakalinga kukasha musankwa umwi kwaamba. Shikaswa ndyaakaswaamo, muntu uyo wakatalika kwaamba. Mpeeke bantu boonse bakalingaawo bakakankamana.

¹⁵ Sombi bamwi bakaamba ayi, “Ulakusha bashikaswa mukwiinga Bilusebulu, mwaami wa bashikaswa, ngoomupa nkusu.”

¹⁶ Ciindi ceenka ico bamwi bakeelesha kusunka Jesu ayi abatondeshe citondesho kuswa kwiculu cakubonesha ayi Lesa ngowakamutuma.

¹⁷ Sombi Jesu wakalinga kwishi miyeeyo yabo, lyalo wakabaambila ayi, “Buleelo boonse bweenga bwabukilana akutalika kulwana, buleelo ubo bulamwaika. Na bantu ba muŋanda yomwi babukilana, iyo ŋanda ilawa.

¹⁸ Ino na Satana lakwe watalika kulilwana, sa inga buleelo bwakwe bwayuma? Sobwe! Mukwiinga mwebo mulaamba ayi, nguBilusebulu umpa nkusu shakukusha bashikaswa.

¹⁹ Ino na nebo ndakusha bashikaswa munkusu shakwe Bilusebulu, ino abo bakonkela ndimwe balabakusha munkusu shakwe ni? Paceebo ceeco, balaakumushinina akutondesha ayi mulilubite.

²⁰ Teshi Bilusebulu, sombi nguLesa uyo umpa nkusu shakukusha bashikaswa. Nkokwaamba ayi Bweene bwakwe Lesa buli pali ndimwe.

²¹ “Na muntu ushimpite kaalama ŋanda yakwe kaalibambite ashakulwanisha shoonse, buboni bwakwe inga tabwiipikwi.

²² Sombi umwi umwiindaawo nkusu na wesa mukumulwana, wamukoma, ulamunyaya shakulwanisha shakwe nshaacinkitemo manungo akwaabanya bantu buboni ubo mbwaaipa.

²³ “Uyo woonse utabete kulubasu lwangu ngumulwani wangu alimwi uyo utooboli pantu pomwi anebo ulapalanganya.

Shikaswa mbwaaboolela mumuntu

²⁴ “Na shikaswa waswa mumuntu, ulaya bweenda muluundu kuyandoola kwakookeshesha. Na kwabula kucanika, ulaamba ayi, ‘Ntooboolela mumuntu wangu mondakaswa.’

²⁵ Ono na waboola ulacana muntu uyo ulibo kabotu.

²⁶ Lyalo ulaya mukuletelaawo abamwi bali bosanwe abobilo babiibi kwiinda pali nguwe. Mpeeke balenjila akwikala mumuntu uyo. Aboobo bwikaalo bwa muntu uyo bulabica kwiinda bwakutaanguna.”

Kukondwa kwancinencine

²⁷ Jesu ndyaakamana kwaamba boobo, walutundu umwi mulikoto wakoolobesha ayi, “Ulicite coolwe mwanakashi wakamushala akumuyamwisha!”

²⁸ Sombi Jesu wakakumbula ayi, “Ee, sombi bacite coolwe cinene mbaabo banyumfwa maswi akwe Lesa akucita mbwaamba!”

Bantu mbobakayanda citondesho

²⁹ Bantu ndibakalinga kuya cifula, Jesu wakatalika kwaamba ayi, “Bantu ba cecino ciindi mbabiibi. Balisuni kubona citondesho cakuswa kwiculu, ono taaku nceshi batondeshekwe, sombibo citondesho cakwe Jona.

³⁰ Ceebo bweenka Jona mbwaakaba citondesho kubene Ninife, alakwe MwanaaMuntu mbweshi akabe citondesho kubantu ba cecino ciindi.

³¹ Pabushiku bwakoomboloshekwa mwaami mwanakashi wa kumalenge ulaakumushinina ceebo wakaswa kweela cishi kwisa mukunyumfwa busongo bwakwe Solomoni. Sombi pano mpwaali wiinda Solomoni!

³² Pabushiku bwakoomboloshekwa, bene Ninife balaakumushinina ceebo balo bakasanduka kuswa kushibiibi shabo ndyaakabashimikila Jona. Sombi pano mpwaali wiinda Jona!

Mumuni wa mubili

³³ “Taaku muntu unyasha lilampi akulishisa nabi kulifwekelesha nongo, sombi ulalibika peculu kwaamba ayi limunikile boonse batoonjila muŋanda.

³⁴ Meenso anu ngomumuni wa mubili wanu. Na meenso anu kaali kabotu, amubili woonse ulaba mumumuni. Sombi na meenso anu kaatabete kabotu, nkokwaamba ayi mubili woonse ulaba mumunshinshe.

³⁵ Paceebo ceeco amucenjele kwaamba ayi mumuni uli muli ndimwe utabi munshinshe.

³⁶ Aboobo na mubili woonse uli mumumuni cakubula patooshiya napaceyi, mubili woonse unanooli mumumuni bweenka mbuli lilampi mbolikumunikila.”

Jesu mbwaakakalalila baFalisi abafundishi ba Milawo

³⁷ Jesu ndyaakamana kwaamba, muFalisi wakamusenga ayi akalye anguwe. Aboobo Jesu wakaya mukulya.

³⁸ MuFalisi uyo wakakankamana ndyaakabona ayi Jesu wakatalika kulya kaatana kusamba kumaansa kweelana aMulawo wa ciJuda.

³⁹ Mpomunyaawo Mwaami Jesu wakamwaambila ayi, “Ono mwebo nobaFalisi mulasansha pansengwe lya nkomeshi ambale, sombi mumyoyo yanu muliswitebo bulyabi abubi.

⁴⁰ Mwebo nobantu nobaluya! Sa te uyo wakalenga pansengwe ngowakalenga amukati?

⁴¹ Amupe bapengete isho shintu shili munkomeshi ambale, lyalo shoonse shintu shilaakumusalalila.

⁴² “Mapensho kuli ndimwe nobaFalisi! Mukwiinga mulapa kuli Lesa calikumi ca mbewu shinunkila kabotu ashimwi shilengesha kwaamba ayi cakulya cibote alimwi abucisa bwa mushobo uli woonse. Sombi tamuciti shintu shiluleme kubantu nabi kusuna Lesa. Ceebo shintu ishi mwalinga kweelete kunooshicita cakutasuula shimwi.

⁴³ “Mapensho kuli ndimwe nobaFalisi! Mukwiinga mulasala shuuna sha bulemu mushoonde sha baJuda akuyanda kwaanshikwa cabulemu mumisena yakuulishisha.

⁴⁴ Mapensho kuli ndimwe ceebo muli anga nshuumbwe shitaboneki isho bantu nshibeendoobo cakuteshiba ayi mposhili.”

⁴⁵ Mpeeke mufundishi wa Milawo umwi wakamukumbula ayi, “NoBafundishi, mukwaamba boobo aswebo mwatucobola.”

⁴⁶ Jesu wakaamba ayi, “Mapensho akuli ndimwe nobafundishi ba Milawo! Ceebo mulapa bantu mikuli ilemu, sombi mwebo nobeene tamukumiko nabibo cikumo.

⁴⁷ Mapensho kuli ndimwe! Mukwiinga mulayaka shuumbwe shibotu sha balaluki bakulukulu abo beenka bamashali banu bakulukulu mbobakacaya.

⁴⁸ Nkokwaamba ayi ico cakacita bamashali banu bakulukulu mulacisuminisha mukwiinga balo bakabacaya, mwebo mwabayakila shuumbwe.

⁴⁹ Paceebo ceeco Lesa alakwe mubusongo bwakwe wakaamba ayi, ‘Ndaakubatumina balaluki abatumwi, ono bamwi pakati kabo balaakucaikwa abalo bamwi balaakubapensha.’

⁵⁰ Aboobo bantu ba cecino ciindi balaakupekwa mulandu ceebo ca balaluki boonse mbobakacaya kuswa kumatalikilo a cishi,

⁵¹ kuswa kukucaikwa kwakwe Abelo kushikila kukucaikwa kwakwe Sekaliya, uyo wakacailwa pakati lya cipaililo alimwi aMusena Usalalite wa Ŋanda yakwe Lesa. Ee, ntoomulwiita ayi bantu ba cecino ciindi balaakupekwa mulandu pasheeshi shoonse!

⁵² “Mapensho kuli ndimwe nobafundishi ba Milawo! Mwabwesa cakucalwisha kumulyango wa lushibo lwa lupulusho. Ceebo tamukwe kwinjila, aboobo mwakasha baabo balinga kuyanda kwinjila.”

⁵³ Jesu ndyaakaswa muŋanda umo, bafundishi ba Milawo alimwi abaFalisi bakatalika kumutongooka akumwiipusha miipusho iinji ipusenepusene.

⁵⁴ Bakalinga kusuni kumucanina cilubo mumyaambo yakwe.