Luka 1 - Baibo Busansulushi Bwa Libuku Ili

¹ Nomusunikwi baTeyofilasi, kweelana ambomwishi baanji beelesha camaansa obilo kwaamba ayi balembe shintu isho shakacitika pakati kesu.

² Bakalemba kweelana ambotwakalwiitikwa kubaabo bakabona shintu ishi ameenso kuswa kumatalikilo, abo bakalinga mbobeshikushimikila Makani Abotu.

³ Shintu shoonse ishi ndakashiipushisha kubaabo bashishi mbuli mboshibete kuswa kumatalikilo, aboobo nkambo, ndayeeya kwaamba ayi nshileembe kweelana amboshikonkene.

⁴ Ndacita boobo kwaamba ayi mushibe lushinisho lwa sheesho shoonse nshimwakeeshikwa.

Kwaambilisha kwa kushalwa kwakwe Joni Mubombeki

⁵ Munshiku isho mwaami Elodi ndyaakalinga kulela cishi ca Judeya, kwakalinga mupailishi wakalinga kwiitwa ayi Sekaliya, mulikoto lya bapailishi lyakwe Abija. Wakalinga kweebete Lisabeti wa mulunyungu lwakwe Aloni.

⁶ Boonse bobilo bakalinga bantu baluleme pameenso akwe Lesa, abo bakalinga kukonkela Milawo asheesho shoonse Lesa nshaakalinga kuyanda ayi bacite.

⁷ Sombi tebakalinga kucitewo mwaana mukwiinga Lisabeti taakalinga kushala alimwi baalinga bacembela.

⁸ Bumwi bushiku Sekaliya wakalinga kucita ncito yakwe yabupailishi muŊanda yakwe Lesa, bulishi bwakwe ndibwakashika.

⁹ Ono kweelana ambobakalinga kucita bapailishi, bakooma cisolo ico cakawita Sekaliya kwaamba ayi aye muŊanda yakwe Lesa mukutenta tununkila kabotu pacipaililo.

¹⁰ Sekaliya ndyaakalinga kutenta tununkila kabotu, likoto lya bantu lyakalinga pansengwe kalipaila.

¹¹ Mpeeke munjelo wakwe Lesa wakaboneka kaaimfwi kulubasu lwalulyo lwa cipaililo pakalinga kutentelwa tununkila kabotu.

¹² Sekaliya ndyaakabona munjelo wakakankamana akuloonda.

¹³ Sombi munjelo uyo wakamwaambila ayi, “Utaloondi Sekaliya, Lesa wanyumfwa kupaila kwako, aboobo mukaako Lisabeti ulaakushala mwaana musankwa uyo ngweshi ukatumbe ayi Joni.

¹⁴ Ulaakukondwa akusangalala alimwi abantu baanji abalo balaakusekelaamo ceebo cakushalwa kwakwe.

¹⁵ Mwaana uyo ulaakunoocite bulemu bunene kuli Lesa alimwi teshi akanwewo waini nabi shimwi shikola. Lakwe ulaakushalwa kaaswite Mushimu Usalashi.

¹⁶ Ulaakuboosha bene Isilaeli baanji kuMwaami Lesa wabo.

¹⁷ Joni ulaakuya kunembo lya Mwaami alimwi ulaakunoocite nkusu mbuli shakalinga kucite mulaluki mukulukulu Elija. Ulaakuleta lunyumfwano pakati ka baana abamaishiwabo alimwi. Ulaakusandula bantu batanyumfwi kwaamba ayi babe amiyeeyo mbuli ya baluleme. Ulaakubamba bantu bakwe Lesa ayi banoolibambite kumusebensela.”

¹⁸ Sekaliya wakeepusha munjelo ayi, “Ino ndaakwishiba buyani ayi ici ncalushinisho? Mukwiinga nebo ndacembela alakwe mukaangu wacembela.”

¹⁹ Munjelo uyo wakakumbula ayi, “Nebo ndime Gabuliyelo wiimikana pameenso akwe Lesa. Lakwe ngowantuma ayi nse nkulwiite makani abotu aya.

²⁰ Sombi tookwe kushoma makani aya eshi akacitike ciindi caakushika. Paceebo ceeco utooba cibuulu kushikila bushiku ubo shaakucitika shoonse nshindakwaambila.”

²¹ Ciindi coonse ici bantu bakalinga kulindilila Sekaliya akukankamana ayi na nciinshi camucelesha kuswa muŊanda yakwe Lesa.

²² Ndyaakaswaamo, taakalinga kucikonsha kwaamba akuli mbabo. Aboobo bantu bakeshiba kwaamba ayi Lesa kuli ncaamubonesha, lyalo wakatalika kwaambisha maansa kaalibo ngucibuulu.

²³ Ndyaakamanisha bulishi bwakwe muŊanda yakwe Lesa, Sekaliya wakaya kumishaabo.

²⁴ Ndipakeendabo nshiku shiniini Lisabeti mukaakwe Sekaliya wakamita. Lyalo wakalishisa keekalabo muŋanda kwa myeenshi yosanwe kaamba ayi,

²⁵ “Lesa ono wanyumfwila nkumbu wankusha nsoni pameenso a bantu.”

Kwaambilisha kwa kushalwa kwakwe Jesu

²⁶ Mumweenshi wasanu awomwi kuswa kukumita kwakwe Lisabeti, Lesa wakatuma Gabuliyelo mundabala inene ya mucishi ca Galili iyo yakalinga kwiitwa ayi Nasaleti.

²⁷ Wakaya kumwanakashi wakalinga kwiitwa ayi Maliya utana kukumanaawo amusankwa. Maliya uyu wakalinga kumamikitwe kumusankwa wiitwa ayi Josefu uyo wa mulunyungu lwakwe Defedi.

²⁸ Munjelo ndyaakashika kuli Maliya wakamwaansha ayi, “Waboneka, webo noocite coolwe kuli Lesa. Lesa uli andiwe.”

²⁹ Sombi Maliya wakapenshekwa abuumbi mumoyo pamakani aya, alimwi wakaliipusha mumoyo wakwe ayi, “Nkwaansha buyani uku?”

³⁰ Mpomunyaawo munjelo wakamwaambila ayi, “Utaloondi Maliya, mukwiinga Lesa wakubeta luse.

³¹ Ulaakumita akushala mwaana musankwa uyo ngweshi ukatumbe ayi Jesu.

³² Uyu mwaana ulaakuba mulemu alimwi ulaakunokwiitwa ayi Mwanaakwe Lesa wa kwiculu Wiindaawo. Mwaami Lesa ulaakumupa bwaami bweenka bwakalinga kucite Defedi ishi mukulukulu.

³³ Ulaakuba mwaami wa mushobo wakwe Jakobo alimwi bweene bwakwe teshi bukamaneewo.”

³⁴ Lyalo Maliya wakeepusha munjelo ayi, “Ino ici inga cacitika buyani nebo nenteshiiwo amusankwa?”

³⁵ Munjelo wakakumbula ayi, “Mushimu Usalashi ulaakwisa pali ndiwe ankusu shakwe Lesa wiindaawo shilaakukufwekelela. Aboobo mwaana usalalite eshi akashalwe, ulaakunokwiitwa ayi Mwanaakwe Lesa.

³⁶ Te ulimwishi mukwanu Lisabeti ulya walinga kwaambwa ayi taashali? Alakwe bulya ulicite lifumo lya myeenshi yosanwe awomwi lya mwaana musankwa.

³⁷ Mukwiinga kuli Lesa taaku ciyumu.”

³⁸ Mpeeke Maliya wakakumbula ayi, “Acicitike kweelana ambomwaamba mukwiinga nebo ndimusebenshi wakwe Lesa.” Lyalo munjelo uyo wakamushiya.

Maliya mbwaakafwakashisha Lisabeti

³⁹ Ndipakeenda nshiku shiniinibo, Maliya wakanyamuka lweendo cakufwambaana kuya mundabala yakalinga mutulundu mucishi ca Judeya.

⁴⁰ Wakenjila muŋanda yakwe Sekaliya akwaansha Lisabeti.

⁴¹ Mpeeke Lisabeti ndyaakanyumfwabo kwaansha kwakwe Maliya, mwaana ngwaakalinga kumitite wakanyanyaala mumala. Lyalo Lisabeti wakasushikwa Mushimu Usalashi.

⁴² Mpomunyaawo wakoolobesha aliswi lya peculu ayi, “Ulicite coolwe ciinda pabanakashi boonse. Awooyo ngweshi ukashale ulicite coolwe.

⁴³ Anu ncoolwe cinene buyani ici kuli ndime kwaamba ayi mfwakashilwe banyina Mwaami wangu?

⁴⁴ Mukwiinga ndiwaŋanshabo mwaana mumala wanyanyaala cakusangalala.

⁴⁵ Ulicite coolwe mukwiinga wakashoma kwaamba ayi makani ngowakaambilwa kuswa kuli Lesa ncakwiila alaakucitika.”

Lwiimbo lwakwe Maliya lwakulumbaisha

⁴⁶ Lyalo Maliya wakaamba ayi, “Ndalumba Mwaami mumoyo wangu,

⁴⁷ Ndisangalete abuumbi ceebo cakwe Lesa Mupulushi wangu

⁴⁸ mukwiinga wayeeya kuliceesha kwangu nemusebenshi wakwe. Kuswa sunu mashalane oonse alaakunoonjitabo ayi ucite coolwe

⁴⁹ mukwiinga wa shintu shinene nshaancitila Lesa Shinkusu shoonse. Liina lyakwe lilisalalite.

⁵⁰ Nkumbu shakwe shili pali boonse abo bamulemeka kuswa kulishalane limwi kushikila kulishalane limwi.

⁵¹ Lyaansa lyakwe lyacita shintu sha nkusu shikankamika. Wamwaya bantu bacite miyeeyo yakulisumpula mumyoyo yabo.

⁵² Wakusha baami beshinkusu shiinji pashuuna sha bwaami, akusumpula baabo baliceesha.

⁵³ Wapa bafwite nsala shintu shiinji shibotu, akuboosha babile maansabo.

⁵⁴ Wasunga cipangano ncaakashomesha bakulukulu, wacafwa Isilaeli musebenshi wakwe.

⁵⁵ Taakwe kuluba kucitila nkumbu Abulaamu alunyungu lwakwe kushikila muyayaya.”

⁵⁶ Maliya wakekala aLisabeti myeenshi yotatwe keeyanda kukwana. Kuswawaawo wakaboolela kumishaabo.

Kushalwa kwakwe Joni Mubombeki

⁵⁷ Ndicakashika ciindi ceelete, Lisabeti wakapulukaamo mwaana musankwa.

⁵⁸ Bashimukobonyina abamakwabo ndibakanyumfwa mbuli Lesa mbwaakacitila nkumbu shiinji Lisabeti bakasekelela pantu pomwi anguwe.

⁵⁹ Mwaana ulya ndyaakakwanisha nsondo abushiku bomwi bakesa mukumupalula. Bakalinga kusuni akwaamba ayi bamutumbe liina lyakwe ishi lya Sekaliya,

⁶⁰ sombi banyina bakakaka akwaamba ayi ulyeelete kwiitwa ayi Joni.

⁶¹ Bantu bakakumbula ayi, “Taakuuwo shikamukowa wako ucite liina ili!”

⁶² Lyalo bakaambisha kumaansa kwiipusha baishi liina ndibakalinga kusuni kutumba mwaana.

⁶³ Mpomunyaawo Sekaliya wakasenga cakulembelaawo akulemba ayi, “Liina lyakwe nguJoni.” Ici cakakankamika bantu boonse.

⁶⁴ Amanebo kulemba boobo wakacikonsha kwaamba alimwi akutalika kulumbaisha Lesa.

⁶⁵ Bantu boonse bakalinga kwikala pafwaafwi bakaloonda abuumbi. Lyalo shoonse ishi shintu shakanyumfwika mucishi coonse ca tulundu twa muJudeya.

⁶⁶ Bantu boonse bakanyumfwa cikani ici bakalinga kuciyeeya mumyoyo akuliipusha ayi, “Mwaana uyu ulaakubanshi?” Mukwiinga cakaboneka ayi nkusu shakwe Lesa shakalinga pali nguwe.

Sekaliya mbwaakalaluka

⁶⁷ Mpeeke Sekaliya, ishi wakesushikwa Mushimu Usalashi akulaluka ayi,

⁶⁸ “Atulumbaishe Mwaami Lesa wa bene Isilaeli mukwiinga wesa mukufwakashisha bantu bakwe akubapulusha.

⁶⁹ Watupa Mupulushi ucite nkusu kuswa mulunyungu lwakwe Defedi musebenshi wakwe.

⁷⁰ Kweelana ambwaakaamba kwiinda mubalaluki bakwe basalalite bakulukulu ayi

⁷¹ ulaakutupulusha kuswa kubalwani besu, nkokwaamba ayi kunkusu sha baabo boonse batupatite.

⁷² Wakaamba ayi ulaakunyumfwila nkumbu bamashali besu bakulukulu alimwi teshi akalubeeko cipangano cakwe cisalalite.

⁷³ Wakashomesha cakulumbila kuli ishiwesu Abulaamu ayi

⁷⁴ ulaakutupulusha kuswa kubalwani kwaamba ayi tumusebensele cakubula boowa

⁷⁵ akweenda pameenso akwe katusalalite akululama nshiku shoonse sha buumi bwesu.

⁷⁶ Webo omwanaangu ulaakwiitwa ayi ndiwe mulaluki wakwe Lesa wa kwiculu Wiindaawo, mukwiinga webo ulaakululamikila Mwaami nshila, lakwe kaatana kwisa.

⁷⁷ Ulaakushibisha bantu bakwe kwaamba ayi balaakupulushikwa kwiinda mukulekelelwa shibiibi shabo.

⁷⁸ Lesa wesu uliswite nkumbu ulaakutupa mumuni uli mbuli wa kumuyamaca.

⁷⁹ Ulaakumunikila baabo bashiite mumunshinshe amucimfule ca lufu, akututanjilila munshila ya luumuno.”

⁸⁰ Lyalo mwaana uyo Joni wakakula akushimpa mumushimu. Wakekala muluyanga kushikila bushiku ubo mbwaakalitondesha patuba kubantu ba muIsilaeli.