Kulonga 9 - Baibo Busansulushi Bwa Libuku Ili

Mwaalu wakufwa shifubwa

¹ Mwaami Lesa wakaambila Mose ayi, “Koya kumwaami Falawo ukamulwiite ayi Mwaami Lesa, Lesa wa bene Ebulu waamba ayi, ‘Leka bantu bangu baye kwaamba ayi bakanambile.

² Na ukake kubaleka alimwi ayi baye,

³ ndaakukupa mulandu kwiinda mukuleta bulwashi bubiibi pashifubwa shako shoonse, nkokwaamba ayi maaki ako, mbongolo, ngamela, ŋombe, mbelele alimwi ampongo.

⁴ Sombi ndaakupansaanya pakati ka shifubwa sha bene Isilaeli alimwi asha bene Ijipiti. Aboobo taaku cifubwa nabi comwi ca bene Isilaeli ceshi cikafwe.

⁵ Nebo neMwaami Lesa ndabamba bushiku bwa ciilo kwaamba ayi ndyeshi nkacite ceeci.’ ”

⁶ Ingayi bushiku bwakaboolaawo, Mwaami Lesa wakacita kweelana ambwaakaamba. Mpeeke shifubwa shoonse sha bene Ijipiti shakamana kufwa, sombi taaku cifubwa nabi comwi ca bene Isilaeli cakafwa.

⁷ Kuswawaawo mwaami Falawo wakeepusha cakacitika, abalo bantu bakamulwiita ayi taaku cifubwa nabi comwi ca bene Isilaeli cafwa. Sombi mwaami Falawo wakacita cimpamya akukasha bene Isilaeli kuya.

Mwaalu wa shuute

⁸ Mpomunyaawo Mwaami Lesa wakaambila Mose aAloni ayi, “Mumunyumbi amutapulemo milota iyo Mose njeshi akawaale mwiculu kunembo lya mwaami Falawo.

⁹ Ilaakuululukila mucishi coonse ca Ijipiti anga ndusuko lupelekete. Mpeeke mucishi coonse bantu abanyama balaakuba ashuute isho shiba shipwaloonda.”

¹⁰ Aboobo bakabwesa milota mumunyumbi akwiimikana kunembo lya mwaami Falawo. Kuswawaawo Mose wakeewaala mwiculu, lyalo yakaaluka shuute isho shakaba shipwaloonda pabantu alimwi abanyama.

¹¹ Beshimampelampela boonse cakaala kuya kuli Mose ceebo bakalinga kuswitebo shuute pamibili bweenka mbuli bene Ijipiti bamwi boonse.

¹² Sombi Mwaami Lesa wakalengesha ayi mwaami Falawo abe shicimpamya, alimwi kweelana abwakaamba Mwaami Lesa, Falawo wakakaka kunyumfwila Mose aAloni.

Mwaalu wa mfula ya mabwe

¹³ Kuswawaawo Mwaami Lesa wakaambila Mose ayi, “Ciilo macuunsacuunsa, ukaye ukakumane aMwaami Falawo akumwaambila ayi Mwaami Lesa, Lesa wa bene Ebulu waamba ayi, ‘Leka bantu bangu baye kwaamba ayi bakanambile.

¹⁴ Ono na ukake, ntootuma myaalu yangu yoonse iindaawo pali ndiwe, bacinenenene bako alimwi abantu bamucishi cako. Ntoocita boobo kwaamba ayi wishibe ayi taaku aumwi uli mbuli ndime mucishi ca panshi coonse.

¹⁵ Nindakamupa mulandu kwiinda mukuleta mwaalu wa bulwashi pali ndiwe alimwi abantu bako bamucishi, naakwiinga noonse mwakanyonyoolwabo kalekale.

¹⁶ Sombi kwaamba ayi muboneshe nkusu shangu alimwi ayi liina lyangu linyumfwike mucishi coonse ca panshi, ndamuleka ayi munoocili boomi.

¹⁷ Nacibi boobo webo ucicitebo cimpamya alimwi ucikaka kuleka bantu bangu ayi baye.

¹⁸ Aboobo paciindi ceenka cino ciilo, ndaakuleta mfula ya mabwe inene abuumbi, iyo itana kulokaawo mucishi ca Ijipiti.

¹⁹ Ono ambila bantu ayi shifubwa ashintu shimwi shoonse shilibo pansengwe bashibike mumaanda. Balyeelete kucita boobo ceebo mfula ya mabwe iyo ilaakulokela bantu alimwi ashifubwa shilibo pansengwe. Lyalo bantu abo balaakufwa pantu pomwi ashifubwa isho shoonse.’ ”

²⁰ Mpeeke bacinenenene bamwi ba mwaami Falawo bakaloonda ceebo ca maswi ayo akaamba Mwaami Lesa. Aboobo bakaleta akwinjisha basha babo alimwi ashifubwa shabo mumaanda.

²¹ Nacibi boobo bamwi tabakwe kubikako maano kumaswi akabacenjesha Mwaami Lesa. Balo bakashiya basha alimwi ashifubwa shabo pansengwe.

²² Mpomunyaawo Mwaami Lesa wakaambila Mose ayi, “Tambika lyaansa lyako kwiculu, lyalo mfula ya mabwe itooloka mucishi coonse ca Ijipiti. Itoolokela bantu, shifubwa alimwi ashishango shoonse shili mumyuunda.”

²³ Aboobo Mose wakatambika nkooli yakwe kwiculu, mpeeke Mwaami Lesa wakalengesha ayi imfula italike kukalooka alimwi akubeka mucishi. Lyalo Mwaami Lesa wakatuma

²⁴ mfula ya mabwe inene abuumbi alimwi akubeka kwakakumanabo cishi coonse. Imfula iyo yakakomena abuumbi kwiinda mfula shoonse shakalinga kuloka mucishi ca Ijipiti.

²⁵ Mucishi coonse ca Ijipiti, imfula ya mabwe iyi yakanyonyoola shintu shoonse shakalinga pansengwe, kubikaawo abantu boonse alimwi ashifubwa. Yakanyonyoola shishango shoonse shakalinga mumyuunda alimwi akuponsoola shisamu shoonse.

²⁶ Sombi musena wa Gosheni, umo mwakalinga kwikala bene Isilaeli, ngomusena weenkabo mutakwe kuloka mfula ya mabwe.

²⁷ Mpomunyaawo mwaami Falawo wakeeta Mose aAloni akubaambila ayi, “Paciindi cino, ndabiisha. Mwaami Lesa uliluleme, sombi nebo abantu ba mucishi cangu tulilubite.

²⁸ Amupaile kuMwaami Lesa! Twapeenga abuumbi kukukalooka kwa mfuula ya mabwe iyi. Ntoomulwitilisha ayi ntoomuleka munooya, tamweelete kunoocishiite.”

²⁹ Alakwe Mose wakamwaambila ayi, “Paciindi ceenka ico nceshi nswe mundabala inene ino, ntootambika maansaangu akupaila kuMwaami Lesa. Lyalo kukalooka kutoomana alimwi teshi kubewo mfula ya mabwe kwaamba ayi mwishibe ayi cishi ca panshi nca Mwaami Lesa.

³⁰ Sombi ndishi kwaamba ayi mwebo abacinenenene banu abobulya tamuna kutalika kuloonda Mwaami Lesa.”

³¹ Butonje alimwi abale shoonse shakanyonyooka, ceebo bale wakalinga kupite abwalo butonje bwakalinga kucite buluba.

³² Sombi taaku witi wakanyonyooka ceebo ulaceelwa kupya.

³³ Kuswawaawo Mose wakaswaako kumwaami Falawo, alimwi akuswa mundabala inene umo. Lyalo wakatambika maansaakwe akupaila kuMwaami Lesa. Mpeeke kukalooka, mabwe alimwi amfuula shoonse shakamana.

³⁴ Ono mwaami Falawo ndyaakabona kukalooka, mabwe alimwi amfuula shamana, wakabisha alimwi. Lakwe alimwi abacinenenene bakwe bakatolelela cimpamya.

³⁵ Aboobo kweelana aMwaami Lesa mbwaakaamba kwiinda muli Mose, Falawo wakakaka kuleka bene Isilaeli ayi baye.