Kulonga 7 - Baibo Busansulushi Bwa Libuku Ili

¹ Mpomunyaawo Mwaami Lesa wakaamba ayi, “Ntoolengesha ayi ube anga nguLesa kumwaami Falawo, alakwe Aloni mukwanu ananokwaamba kuli nguwe anga ngumulaluki wako.

² Ulyeelete kulwiita Aloni mukwanu shoonse nsheshi nookulwiita, alakwe akalwiite mwaami ayi aleke bene Isilaeli basweemo mucishi cakwe.

³ Sombi ndaakulengesha mwaami kuba shicimpamya, alimwi nabi nkacite shaankamiko ashitondesho sha nkusu shiinji buyani mucishi ca Ijipiti,

⁴ teshi akamunyumfwileewo. Lyalo ndaakuleta mapensho anene abuumbi mucishi ca Ijipiti, akutanjilila shipani sha mikowa ya bantu bangu kuswa mucishi ico.

⁵ Lyalo bene Ijipiti balaakwishiba ayi nebo ndime Mwaami Lesa, ndaakutandabika lyaansa lyangu lyankusu pali mbabo alimwi akukusha bene Isilaeli mucishi cabo.”

⁶ Mpeeke Mose aAloni bakacita kweelana aMwaami Lesa bwakabalasha

⁷ Paciindi ico ndibakaamba amwaami Falawo, Mose wakalinga kucite myaaka ili 80 lakwe Aloni wakalinga kucite myaaka ili 83.

Nkooli yakwe Aloni

⁸ Kuswawaawo Mwaami Lesa wakaambila Mose aAloni ayi,

⁹ “Na mwaami amwaambile ayi muliyubulule kwiinda mukucita caankamiko, ulwiite Aloni ayi anyamune nkoli yakwe akwiiwaala panshi kunembo lya mwaami, lyalo itokwaaluka nsoka.”

¹⁰ Mpomunyaawo Mose aAloni bakaya kumwaami Falawo akucita kweelana aMwaami Lesa mbwaakabaambila. Aloni wakawaala nkoli yakwe panshi kunembo lya mwaami abacinenenene bakwe. Mpeeke yakaaluka nsoka.

¹¹ Lyalo mwaami alakwe wakeeta basankwa basongo alimwi abeshimampelampela. Abalo kwiinda munkusu shabo bakacita bweenka ubo.

¹² Bakawaala nkoli shabo panshi, inkoli isho shakaaluka nsoka. Sombi nkoli yakwe Aloni yakamina nkoli shabo.

¹³ Nacibi boobo mwaami Falawo wakatolelela kuba shicimpamya, alimwi kweelana abwakaamba Mwaami Lesa, wakakaka kunyumfwila Mose aAloni.

Mwaalu wa maanshi kwaaluka bulowa

¹⁴ Kuswawaawo Mwaami Lesa wakaambila Mose ayi, “Mwaami uyu ngushicimpamya alimwi utookasha bantu ayi baye.

¹⁵ Ono ukaye ukakumanaakwe macuunsa ciindi ncaaitamo kuMulonga wa Nailo. Unyamune ankooli iyo yakalinga yaaluka nsoka, umulindilile muloombe lwa mulonga.

¹⁶ Ukamwaambile ayi, ‘Mwaami Lesa, Lesa wa bene Ebulu, wakantuma kwisa mukukulwiita ayi uleke bantu bakwe banooya kwaamba ayi bakamulambile muluyanga. Sombi abobulya webo toona kunyumfwa.

¹⁷ Ono bulya Mwaami Lesa waamba ayi mutooshiba mbwaabete kwiinda musheesho nsheshi acite. Amubone ono ntokuuma nkoli iyi pamaanshi a mumulonga, lyalo maanshi aya atokwaaluka bulowa.

¹⁸ Inswi shoonse shitoofwa alimwi mumulonga munanoonunka cakwaamba ayi bene Ijipiti teshi banonwamo maanshi.’ ”

¹⁹ Mpomunyaawo Mwaami Lesa wakaambila Mose ayi, “Ambila Aloni anyamune nkoli yakwe akwiitandabika pamilonga yoonse, tulonga twakupanga alimwi amyaala yoonse muIjipiti. Maanshi oonse atokwaaluka bulowa, alimwi mucishi coonse mutooba bulowa, amumankubala alimwi amunongo sha mabwe shoonse.”

²⁰ Mpeeke Mose aAloni bakacita kweelana abwakabaambila Mwaami Lesa. Pameenso a mwaami Falawo alimwi abacinenenene bakwe, Aloni wakatandabika nkoli yakwe akuyuuma pamaanshi muMulonga wa Nailo. Lyalo maanshi oonse mumulonga akaaluka bulowa.

²¹ Inswi shoonse mumulonga shakafwa, alimwi shakalinga kununka cibiibi cakwaamba ayi bene Ijipiti bakaalilwa kunwaamo. Mucishi coonse ca Ijipiti mwakababo bulowa.

²² Lyalo beshimampelampela ba mwaami Falawo abalo bakacita mbomunya ubo kwiinda munkusu shabo. Mpeeke mwaami taakwe kucilekaawo cimpamya cakwe. Kweelana abwakaamba Mwaami Lesa, mwaami Falawo wakakaka kunyumfwila Mose aAloni.

²³ Sombi ncaakacita, nkupilulukabo akuboolela kuŋanda yakwe cakutayeeyaawo aceeco cakacitika.

²⁴ Kuswawaawo bene Ijipiti boonse bakatalika kukaba muloombe lwa mulonga, kunoyandoola maanshi akunwa, ceebo tebakalinga kukonsha kunwa maanshi a mumulonga umo.

²⁵ Lyalo pakeenda nshiku shosanwe alimwi ashobilo kuswa pabushiku Mwaami Lesa ndyaakaleta mwaalu uyo mumulonga.