Kulonga 40 - Baibo Busansulushi Bwa Libuku Ili

Mbobakayaka akubenga Tente ya Cipangano kuMwaami Lesa

¹ Mwaami Lesa wakaambila Mose ayi,

² “Pabushiku butaanshi mumweenshi wakutaanguna, ukayake Tente ya Cipangano.

³ Ukabikeemo Libokoshi lya Cipangano, umo muli Milawo ili Likumi akubikako cisani ca kushitilisha kunembo lya ndilyo.

⁴ Ukenjishemo tebulu akubikawo shintu sha njiyo. Kuswawaawo ukenjishe cakubikawo malampi, mpeeke ukabikeewo amalampi.

⁵ Lyalo ukabike cipaililo ca golodi cakutentelawo tununkila kabotu kunembo lya Libokoshi lya Cipangano, akukobeka cisani cakushitilisha pamulyango wa Tente.

⁶ Ono kunembo lya Tente, ukabikeko cipaililo cakutentelawo milambu.

⁷ Ingayi pakati lya Tente alimwi acipaililo ukabikewo mbale ifongomene yakusambilaamo akwisushamo maanshi.

⁸ Ukayake lushito kushingulusha Tente, alimwi akukobeka cisani cakushitilisha pamulyango wa lushito.

⁹ “Lyalo ukabenge Tente alimwi ashintu sha ndilyo shoonse kuli ndime neMwaami Lesa kwiinda mukushinanika mafuta asalalite, aboobo Tente ilaakunoosalalite.

¹⁰ Kuswawaawo ukabenge cipaililo alimwi ashintu sha ncico shoonse kuli ndime kwiinda mukushinanika mafuta asalalite, lyalo cilaakunoosalalite cakumaninina.

¹¹ Ukabenge mbale ifongomene yakusambilaamo alimwi acapanshi ca njiyo munshila njemunya iyo.

¹² “Ono ndyeshi ukalete Aloni alimwi abana bakwe basankwa pamulyango wa Tente ya Cipangano, akubalwiita ayi basambe cakulisalasha kweelana amulawo.

¹³ Ukafwalike Aloni shakufwala sha bupailishi akumunanika mafuta asalalite alimwi akumubenga kuli ndime, kwaamba ayi akansebensele mulimo wa bupailishi.

¹⁴ Alimwi ukalete bana bakwe basankwa akubafwalika minjila.

¹⁵ Ukabananike bweenka mbweshi ukananike ishiwabo kwaamba ayi bakansebensele mulimo wa bupailishi. Kunanikwa uko kulaakulengesha ayi bakanoolibo bapailishi lyoonse.”

¹⁶ Mpomunyaawo Mose wakacita shoonse kweelana abwakamwaambila Mwaami Lesa.

¹⁷ Aboobo pabushiku butaanshi mumweenshi wakutaanguna, ono mumwaaka wabili kuswa ndibakaswa mucishi ca Ijipiti, Tente ya Cipangano yakayakwa.

¹⁸ Mose wakabikako shapanshi sha ndilyo, shintu shamakonko one, mbaalo alimwi ashisamu sha ndilyo.

¹⁹ Wakafungulwitawo cakufwekaawo paTente alimwi akufwekawo ca peculu kweelana abwakamwaambila Mwaami Lesa.

²⁰ Kuswawaawo wakabwesa mabwe apampamene obilo akwaabika muLibokoshi lya Cipangano. Wakenjisha shisamu shakunyamwisha munkobeko sha Libokoshi lya Cipangano, akubika cifwekesho ca nkumbu pali ndilyo.

²¹ Lyalo wakenjisha Libokoshi ilyo muTente akukobeka cisani cakushitilisha. Mukucita boobo, wakashitilisha Libokoshi lya Cipangano kweelana abwakamwaambila Mwaami Lesa.

²² Mpeeke wakenjisha tebulu muTente ya Cipangano, weebika kulubasu lwa kumatwa pansengwe lya cisani cakushitilisha,

²³ alimwi akubikawo shimaande shipekwa kuMwaami Lesa, kweelana ambwaakamwaambila mwiine.

²⁴ Lyalo wakenjisha cakubikawo malampi muTente, kulubasu lwa kumalenge kacilangene atebulu.

²⁵ Mpeeke wakanyasha malampi pameenso a Mwaami Lesa kweelana ambwaakamwaambila mwiine.

²⁶ Wakabika acipaililo ca golodi muTente, kunembo lya cisani cakushitilisha,

²⁷ akutentelawo tununkila kabotu kweelana abwakamwaambila Mwaami Lesa.

²⁸ Lyalo wakakobeka cisani cakushitilisha pamulyango wa Tente,

²⁹ alimwi mpekaawo kunembo lya cisani cakushitilisha, wakabikawo cipaililo cakutentelawo milambu. Pali ncico, wakatentelaawo mulambu wakutenta alimwi acipo ca fulaulo kweelana abwakamwaambila Mwaami Lesa.

³⁰ Kuswawaawo wakabika mbale ifongomene yakusambilaamo pakati lya Tente alimwi acipaililo, akwisushamo maanshi.

³¹ Mpeeke Mose, Aloni alimwi abana bakwe basankwa mobakalinga kusamba kumaansa alimwi akumyeendo

³² lyoonse pakwinjila muTente apakuya kucipaililo, bakasamba kweelana abwakamwaambila Mwaami Lesa.

³³ Alimwi Mose wakayaka lushito kushingulusha Tente alimwi acipaililo, akukobeka cisani cakushitilisha pamulyango wa lushito. Anu ubo mbwaakamanisha milimo yoonse.

Likumbi paTente ya Cipangano

³⁴ Mpeeke likumbi lyakafwekelesha Tente ya Cipangano akwiisusha bulemu bwa Mwaami Lesa.

³⁵ Paceebo ceeci Mose wakaalilwa kwinjila muTente ya Cipangano mukwiinga likumbi lyakaselukila peenka apo paTente akwiisusha abulemu bwa Mwaami Lesa.

³⁶ Anu mulweendo lwabo loonse, bene Isilaeli bakalinga kulongabo na likumbi lyaswaawo paTente.

³⁷ Sombi na likumbi kalicili paTente, tebakalinga kulonga.

³⁸ Likumbi lya bulemu bwa Mwaami Lesa lyakalinga kuba paTente ya Cipangano malumwi, alimwi bakalinga kubona mulilo mulikumbi ciindi ca mashiku mulweendo lwabo loonse.