Kulonga 4 - Baibo Busansulushi Bwa Libuku Ili

Lesa mbwaakapa Mose nkusu shikankamika

¹ Lyalo Mose wakakumbula Mwaami Lesa ayi, “Ndaakucita buyani na bene Isilaeli bakabule kunshoma akunyumfwila, alimwi na bakaambe ayi tamukwe kuboneka kuli ndime?”

² Lakwe Mwaami Lesa wakamwiipusha ayi, “Nciinshi ico ncoocite mulyaansa?” Mose wakakumbula ayi, “Ninkoli.”

³ Mwaami Lesa wakaamba ayi, “Iwaale panshi.” Ono Mose ndyaakeewaala panshi, yakaaluka nsoka. Mpeeke wakaloonda akucicako lubilo.

⁴ Mpomunyaawo Mwaami Lesa wakaambila Mose ayi, “Kotama wiibwesele kuluminso.” Alakwe Mose wakakotama akwiicata, lyalo mulyaansa lyakwe yakaaluka nkoli alimwi.

⁵ Mwaami Lesa wakaamba ayi, “Anu ukacite bobulya kubene Isilaeli kwaamba ayi bakashome ayi Mwaami Lesa, Lesa wa bamashali babo bakulukulu, Lesa wakwe Abulaamu, Isaki alimwi aJakobo, wakaboneka kuli ndiwe.”

⁶ Mwaami Lesa wakaambila Mose alimwi ayi, “Bika lyaansa lyako mucakufwala.” Mose wakacita kweelana ambwaakaambilwa. Ono ndyaakalikushaamo, kucana lyaansa lyaboolabo tuu, kushiloonda shamanata.

⁷ Lyalo Mwaami Lesa wakaamba ayi, “Boosha lyaansa mucakufwala alimwi.” Alakwe wakacita bweenkoobo, pakulikushaamo lyakababo kabotu bweenka mbuli mubili wakwe woonse.

⁸ Mpeeke mwaami Lesa wakaamba ayi, “Na bakabule kukushoma nabi kusumina kwiinda mucaankamiko cakutaanguna, nkokwaamba ayi balaakusumina kwiinda muli ceeci cabili.

⁹ Ono na bakabule kukushoma waakumana kucita shaankamiko shobilo ishi, akukaka kukunyumfwila, ukatekule maanshi muMulonga wa Nailo akwaatila panshi. Maanshi ayo, alaakwaaluka bulowa.”

¹⁰ Sombi Mose wakaamba ayi, “NoBaami baLesa nebo kuswabo kalekale nshaambiwo kabotu, alimwi ampomwatalikila kwaamba anebo, poonse nshintokwaambawo kabotu. Ndacelwa kuposha shikani alimwi ndicite kamaama.”

¹¹ Lyalo Mwaami Lesa wakamwaambila ayi, “Ino ngani upa muntu mulomo? Ngani ulengesha ayi ashinke matwi nabi kuba cibuulu? Alimwi ngani ulengesha ayi anoobona nabi ayi abe moofu? Sa teshi ndime neMwaami Lesa?

¹² Anu webo, koya bulya bweenka! Ndaakukucafwaako kwaamba alimwi ndaakukulwiita ashakwaamba.”

¹³ Sombi lakwe Mose wakakumbula ayi, “Sobwe noBaami baLesa, ndakombelela amutume umwi.”

¹⁴ Lyalo Mwaami Lesa wakakalalila Mose, akumwaambila ayi, “Ino mbuyani mukwanu Aloni mwine Lefi? Ndishi kwaamba ayi lakwe inga waamba kabotu. Cino ciindi uli munshila ayi ese abonane awebo alimwi utoosangalala abuumbi pakukubona.

¹⁵ Inga wabandikaakwe akumulwiita shakwaamba. Noonse nobilo ndaakumucafwaako kwaamba alimwi ndaakumulwiita shakucita.

¹⁶ Lakwe ngweshi ukanokwaambilaako kubantu. Ono webo ulaakuba anga nguLesa ceebo ulaakunoomulwiita shakwaamba.

¹⁷ Nyamuna nkoli iyi uyaayo mukwiinga njeshi ukanoocitishako shaankamiko.”

Mose mbwaakaboolela kucishi ca Ijipiti

¹⁸ Kuswawaawo Mose wakaboola kuli Jetulo mupongoshi wakwe musankwa, akumwaambila ayi, “Ndamukombelela ayi munsuminishe kuboolela kucishi ca Ijipiti mukubona bamakwesu na bacili boomi.” Jetulo wakasumina, akumulasha ayi eendebo kabotu.

¹⁹ Mose ndyaakalinga kucili mucishi ca Midyani, Mwaami Lesa wakamwaambila ayi, “Boolela kucishi ca Ijipiti mukwiinga boonse abo bakalinga kusuni kukucaya bakamana kufwa.”

²⁰ Mpeeke Mose wakanyamuna bakaakwe alimwi abana bakwe basankwa akubatantika pambongolo. Mpeeke wakanyamuka akuboolela kuIjipiti. Wakanyamuna ankooli iyo Lesa njaakamwaambila ayi atolelele.

²¹ Mwaami Lesa wakaambila Mose alimwi ayi, “Ono bulya mbootoboolela kuIjipiti, ulyeelete kucita pameenso a mwaami Falawo shaankamiko shoonse nshendakakubonesha. Sombi ndaakulengesha mwaami kuba shicimpamya akukaka kusuminisha bantu ayi baye.

²² Anu webo ulyeelete kumulwiita ayi nebo neMwaami Lesa ndaamba ayi, ‘Isilaeli ngomwanaangu musankwa wakwiiya.

²³ Ndakakulwiita ayi uleke mwanaangu musankwa aye kwaamba ayi akanambile, sombi webo wakakaka. Ono bulya ntoocaya mwanaako musankwa wakwiiya.’ ”

²⁴ Ndibakalinga kookesha pamusena umwi pakunooya kuIjipiti, Mwaami Lesa wakakumana aMose akuyanda kumucaya.

²⁵ Sombi Sipola mukaakwe, wakabwesa libwe likolete akupalula mwanaakwe, alimwi akucatisha Mose kumyeendo acikanda ico akwaamba ayi, “Uli ibaangu ceebo ca bulowa.”

²⁶ Wakaamba boobo ceebo cakupalulwa, mpeeke alakwe Mwaami Lesa wakapulusha Mose.

²⁷ Paciindi ici, Mwaami Lesa wakalinga waambila Aloni ayi, “Koya muluyanga ucinshe Mose.” Mpeeke wakaya mukumukumanishisha pakalundu kasalalite. Ndyaakamukumanya, wakamufyonta mukumwaansha.

²⁸ Lyalo Mose wakalwiita Aloni shoonse Mwaami Lesa nshaakamutuma ayi aambe alimwi ashaankamiko shoonse nshaakamulasha ayi akacite.

²⁹ Lyalo Mose aAloni bakaya kuIjipiti akubunganya bamatanjilili boonse ba bene Isilaeli.

³⁰ Aloni wakabalwiita shoonse Mwaami Lesa nshaakaambila Mose, alakwe Mose wakacita shaankamiko shoonse pameenso a bantu boonse.

³¹ Mpomunyaawo bakashoma. Ono ndibakanyumfwa ayi Mwaami Lesa wakesa akubona mbuli mbobakalinga kupenshekwa bunene, bakafukama akumulambila.