Kulonga 35 - Baibo Busansulushi Bwa Libuku Ili

Milawo ya pabushiku bwakookesha bwa Cibelu

¹ Mpomunyaawo Mose wakabunganya bene Isilaeli boonse akubaambila ayi, “Mwaami Lesa waamba ayi mwebo mulyeelete kunookonkela milawo iyi,

² Munshiku shosanwe abomwi mulyeelete kusebensa milimo yanu, sombi bushiku bwasanu ashobilo, mbushiku busalalite bwakookesha, bubengetwe kuli ndime neMwaami Lesa, Lesa wanu. Uyo woonse weenga wasebensa milimo pabushiku ubu, ulyeelete kucaikwa.

³ Pabushiku ubu bwakookesha, tamweelete kukunka nabibo mulilo mumaanda anu.”

Shipo sha muTente ya Cipangano

⁴ Mose wakaambila bene Isilaeli boonse ayi, “Mwaami Lesa waamba ayi mulyeelete kukonkela milawo iyi.

⁵ Amupe cipo kuMwaami Lesa. Uyo woonse usuni kucita boobo, ulyeelete kuleta cipo ca golodi, silifa nabi bulonse,

⁶ booya bwa mbelele buboneka anga ndiculu, bufubelafubela abusalalabo pyu, shisani shibotu shiteshimite, booya bwa mpongo,

⁷ shipaya sha mbelele shisankwa isho nshebakaalula mushobo usalala, shipaya shimwi shibotu abuumbi, ashisamu sha mulombe,

⁸ mafuta a olifi a mumalampi, tununkila kabotu twa mumafuta akunanika bantu alimwi amutununkila kabotu pakutenta.

⁹ Ulyeelete kutambula mabwe asalala amabwe amwi amakwebo a cakufwala ca mupailishi munene ciitwa ayi efodi alimwi acakufwala cakwe ca pacaamba.

Shintu sha muTente ya Cipangano

¹⁰ “Bacishi milimo boonse balyeelete kwisa mukupanga shintu shoonse shaamba Mwaami Lesa. Mbuli

¹¹ Tente, cakufwekaawo ca ndilyo, cakufweka peculu, shakukobekesha alimwi ashintu shamakonko one sha ndilyo, mbaalo, shisamu alimwi ashapanshi sha nshisho,

¹² Libokoshi lya Cipangano, shisamu shakunyamwishaako sha ndilyo, cifwekesho alimwi acisani cakushitilisha,

¹³ tebulu alimwi ashisamu shakunyamwishaako sha njiyo alimwi ashintu sha ncico shimwi shoonse, ashimaande shakapekwa kuli Lesa.

¹⁴ Balyeelete kupanga cakubikawo malampi alimwi ashintu sha ncico, malampi alimwi amafuta a ngawo,

¹⁵ cipaililo cakutentelawo tununkila kabotu alimwi ashisamu shakucinyamwishaako sha ncico, mafuta akunanika, tununkila kabotu pakutenta, cisani cakushitilisha kumwinjililo wa Tente,

¹⁶ cipaililo ca milambu yakutenta alimwi acili anga nguseefwa ca bulonse ca ncico, shisamu shakucinyamwishaako alimwi ashintu sha ncico shoonse, mbale ifongomene yakusambilaamo acapanshi ca ncico,

¹⁷ shisani shakubika mweela lubansa, shisamu sha ndulo, shapanshi alimwi acisani cakushitilisha pamwinjililo wa mulushito lushitilishitwe,

¹⁸ mpoopo alimwi antaambo sha Tente alimwi asha kulushito.

¹⁹ Balyeelete kutunga shakufwala shibotu abuumbi isho bapailishi nsheshi bakanoofwala pakusebensa mulimo wa bupailishi muMusena Usalalite nkokwaamba ayi shakufwala shisalalite shakwe Aloni alimwi abana bakwe basankwa.”

Bantu mbobakaleta shipo shabo

²⁰ Lyalo bene Isilaeli boonse bakoonduluka,

²¹ alimwi boonse abo bakasuna kucita bwakabalwiita Mose, bakaleta cipo kuMwaami Lesa cakupangisha Tente ya Cipangano. Bakaleta shoonse shakalinga kuyandika pamilimo yakulambila alimwi akupanga shakufwala sha bupailishi.

²² Basankwa abanakashi boonse abo bakasuna kuleta cipo, bakaleta mapiini akulibotesha, masikiyo, ninga, shakufwala munshingo alimwi amishobo ipusenepusene ya makosa a golodi akushibenga ayi ncipo cakutambeeka kuMwaami Lesa.

²³ Abo boonse bakalinga kucite booya bwa mbelele buboneka anga ndiculu, bufubelafubela alimwi abusalalabo pyu, shisani shibotu shiteshimite, booya bwa mpongo, shipaya sha mbelele shisankwa isho nshebakaalula mushobo usalala, shipaya shimwi shibotu abuumbi, bakashileta.

²⁴ Aboobo boonse bakalinga kukonsha kubenga silifa nabi bulonse, bakaleta shipo shabo kuMwaami Lesa. Abalo abo bakalinga kucite shisamu sha mulombe sheenga shasebensa kumulimo uli woonse, bakashileta.

²⁵ Mpeeke boonse banakashi bakalinga kucishi milimo yakoosa busalu bakaleta busalu bwa booya bwa mbelele buboneka anga ndiculu, bufubelafubela alimwi abusalalabo pyu, busalu bwakutungisha shisani shibotu shiteshimite isho mbobakoosa.

²⁶ Bakoosa abusalu bwa booya bwa mpongo.

²⁷ Balo bamatanjilili ba bene Isilaeli bakaleta mabwe eetwa ayi kanelyani amabwe amakwebo amwi akubika paefodi alimwi apacakufwala pacaamba.

²⁸ Bakaleta atununkila kabotu mubuyani alimwi amafuta a olifi a mumalampi, a mumafuta akunanika alimwi amutununkila kabotu pakutenta.

²⁹ Boonse bene Isilaeli abo bakasuna kubenga, bakaleta shipo shabo kuMwaami Lesa kwaamba ayi basebenseshe kumilimo iyo njaakaambila Mose ayi bakacite.

Bayaki bacite lushibo ba Tente ya Cipangano

³⁰ Mpomunyaawo Mose wakaambila bene Isilaeli ayi, “Mwaami Lesa wasala Besalelo mwanaakwe Uli, uyo mushikulu wakwe Elu kuswa mumukowa wakwe Juda.

³¹ Lesa mwiine wakamwisusha Mushimu wakwe akumupa lushibo, busongo alimwi amaano a kwishiba milimo ili yoonse ya buyaki,

³² Nkokwaamba ayi busongo bwakuyeeyela bweenga bwaba cintu cibotu akucipanga agolodi, silifa, alimwi abulonse.

³³ Ndamupa abusongo bwakutimbula kabotu mabwe alimwi akwaabamba mpwaaelete, kubesa shisamu, alimwi akucita milimo imwi yoonse ya buyaki.

³⁴ Mwaami Lesa wakapa Besalelo alimwi aOolyabu mwanaakwe Ayisamaki kuswa mumukowa wakwe Dani busongo bwakwiisha bamwi lushibo lwabo lwa buyaki.

³⁵ Wakabapa lushibo lwa muncito shipusenepusene isho shicita beshikutala pashintu shiyumu, beshikuyeeyela bweenga bwaba cintu cibotu, abaabo beshikutunga booya bwa mbelele buboneka anga ndiculu, bufubelafubela alimwi abusalalabo pyu, shisani shibotu shiteshimite, alimwi ashakufwalabo shimwi shoonse. Bantu bobilo aba balakonsha kucita milimo ili yoonse, alimwi mbeshikuyeeyela bweenga bwaba cintu cibotu.