Kulonga 26 - Baibo Busansulushi Bwa Libuku Ili

Tente ya Cipangano

¹ “Ono ukapange Tente ya Cipangano ashisani shibotu shiteshimite shili likumi, apo patungitwe booya bwa mbelele buboneka anga ndiculu, bufubelafubela alimwi abusalalabo pyu. Mukataleewo shintu shicite mapapaminwa shiitwa ayi bakelebu.

² Shisani ishi shilyeelete kunoolibo mushobo womwi mubulaamfu amubufwaafwi. Shilyeelete kuba mamita ali 12 mubulaamfu amamita ali 2 mubufwaafwi.

³ Kuswawaawo ukanunganye shisani shili shosanwe kwaamba ayi cikabe cisani comwi, ashalo shimwi shili shosanwe ukashiciite mbomunya ubo.

⁴ Kweela kwa lubasu lomwi lwa cisani cinene ukatungileko mwakukobeka acisani ca mushobo wa liculu. Ukacite bweenka ubo akucisani cinene cimwi.

⁵ Mucisani cakutaanguna ico cakununga, ukatungileko mwakukobeka muli makumi osanwe, akwalo kucisani cakununga cabili, ukatungileko mwakukobeka muli makumi osanwe bweenka mbuli citaanshi.

⁶ Alimwi ukapange shakukobekesha sha golodi shili makumi osanwe shakucatanishishako shisani shobilo ishi ayi cibe comwi.

⁷ “Lyalo ukapange acakufweka Tente ca shisani sha booya bwa mpongo shili likumi alimwi acomwi.

⁸ Shoonse shilyeelete kunokweelenebo, mubulaamfu shilyeelete kuba mamita ali 13 alimwi mubufwaafwi shikabe mamita ali 2.

⁹ Kuswawaawo ukatunge shisani shosanwe kwaamba ayi cibe comwi, ashalo shili shosanwe acomwi shikabe cisani comwi. Ono cisani casanu acomwi ukacipete mankanda obilo panembo lya Tente ya Cipangano.

¹⁰ Ukabike mwakukobeka muli makumi osanwe kweela kwa cisani cakweelaako kuceeco citaanshi, alimwi amwakukobeka muli makumi osanwe kweela kwa cisani cakweelaako kuceeco cabili.

¹¹ Mpeeke ukapange shakukobekesha sha bulonse shili makumi osanwe akwinjisha sha mwakukobeka umo kwaamba ayi shisani shobilo isho shibe cakufweka paTente comwi.

¹² Ukaleleeshe musa wa cisani cakweelaako kwisule lya Tente ya Cipangano.

¹³ Ono masentimita ali 50 eendilila kulaampa kucisani comwi acomwi, alyeelete kunooleleela mweela Tente kwaamba ayi anooifweka.

¹⁴ “Ono mukapange shakufweka paTente ya Cipangano ashimwi shobilo. Cimwi cikabe ca cipaya ca mbelele isankwa akucaalula kuba cisalala, acalo cimwi cikabe ca cipaya cibotu ayi cikabe cakufweka peculu.

¹⁵ “Kuswawaawo ukapange shintu shamakonko one sha cisamu ca mulombe ayi shikabe sha kuTente iyo.

¹⁶ Shintu isho shoonse shilyeelete kuba mamita ali 4 mubulaamfu, alimwi amasentimita ali 66 mubufwaafwi,

¹⁷ alimwi shilyeelete kunoocite shakwiimikaninaako shobilo. Shamakonko one shoonse isho shilyeelete kunoocite shakwiimikaninaako isho.

¹⁸ Kulubasu lwa kumalenge, ukabikeko shamakonko one shili makumi obilo,

¹⁹ alimwi ashapanshi sha nshisho sha silifa shili makumi one, nkokwaamba ayi pacamakonko one comwi palyeelete kuba shapanshi shobilo, comwi acomwi panshi lya cakwiimikaninaako comwi acomwi.

²⁰ Kulubasu lwa kumatwa lya Tente akwalo ukabikeko shamakonko shili makumi obilo,

²¹ alimwi ashapanshi sha silifa shili makumi one, nkokwaamba ayi shapanshi shobilo pacamakonko comwi.

²² Ono kwisule lya Tente ya Cipangano kulubasu lwa kumbo ukabikeeko shamakonko shosanwe acomwi,

²³ alimwi ashamakonko shobilo shamumakonko a Tente.

²⁴ Shintu shamakonko one shamumakonko a Tente isho, shilyeelete kunungilwa panshi akuya mukucatanishikwa apeculu. Shamakonko shobilo isho sheshi shikanoopanga makonko obilo a Tente shilyeelete kuba mbomunya ubo.

²⁵ Nkokwaamba ayi kulaakuba shamakonko one shili shosanwe ashotatwe alimwi ashapanshi sha nshisho sha silifa shili likumi ashosanwe acomwi isho sheshi shikabe shobilo pacamakonko comwi.

²⁶ “Kuboolaawo ukapange mbalo shili likumi ashosanwe sha cisamu ca mulombe, mbaalo shosanwe shikabe kushamakonko sha kulubasu lomwi lwa Tente ya Cipangano,

²⁷ shimwi shosanwe shikabe sha kulubasu lumwi, ashalo shosanwe shimwi shikabe kushamakonko sha kulubasu lwa kumbo, nkokwaamba ayi kwisule lya Tente.

²⁸ Mbaalo ya pakati ka shamakonko yalo, ilyeelete kuswa kweela akweela lya Tente.

²⁹ Shamakonko isho ukashinanike golodi alimwi akupanga nkobeko sha golodi akushicatanisha ashamakonko one kwaamba ayi shicate mbalo, isho sheshi shikananikwe golodi ashalo.

³⁰ Tente iyi mukeeyaake kweelana ambondakakubonesha pakalundu.

³¹ “Ukatunge acisani cakushitilisha citeshimite cibotu, ukacituunge abooya bwa mbelele buboneka anga ndiculu, bufubelafubela alimwi abusalalabo pyu. Ukatungileewo shintu shicite mapapaminwa shiitwa ayi bakelebu.

³² Mpeeke ukacikobeke kushisamu shone sha mulombe isho shinanikitwe golodi, shicite shakukobekesha alimwi shili musha panshi shone sha silifa.

³³ Cisani ici cakushitilisha ukacikobeke kumundando wa shakukobekesha muciluli ca Tente, ono kwisule lya cisani ici, ukabikeko Libokoshi lya Cipangano umo muli mabwe apampamene obilo. Cisani ici cilaakupansaanya Musena Usalalite alimwi aMusena Usalalite Wiindaawo.

³⁴ PaLibokoshi lya Cipangano, ukabikewo cifwekesho ico.

³⁵ Ono pansengwe lya Musena Usalalite Wiindaawo, ukabike tebulu kulubasu lwa kumatwa lya Tente, alimwi akubika cakubikawo malampi kulubasu lwa kumalenge.

³⁶ “Apalo pamulyango wa Tente ukatungilewo cisani cakushitilisha ca nsalu iteshimite ibotu, itungitwe abooya bwa mbelele bwa mushobo wa liculu, bufubelafubela alimwi abusalalabo pyu, alimwi akutungilawo shimwi shakwiibotesha.

³⁷ Cisani cakushitilisha ici, ukacipangile shisamu shosanwe sha mulombe shinanikitwe golodi alimwi shicite ashakukobekesha sha golodi. Ukapange ashapanshi shosanwe sha bulonse sha shisamu ishi.