Kulonga 25 - Baibo Busansulushi Bwa Libuku Ili

Shipo sha kuTente isalalite

¹ Pesule Mwaami Lesa wakaambila Mose ayi,

² “Ambila bene Isilaeli boonse ayi balete shipo kuli ndime. Ulyeelete kutambula shipo shili shoonse muntu nsheenga waleta mukuyanda kwakwe.

³ Shipo isho nshooelete kutambula shilyeelete kuba, golodi, silifa alimwi abulonse,

⁴ busalu bwa booya bwa mbelele buboneka anga ndiculu, bufubelafubela alimwi abusalalabo pyu, shisani shibotu shiteshimite, booya bwa mpongo,

⁵ shipaya sha mbelele shisankwa isho nshebakaalula mushobo usalala, shipaya shimwi shibotu abuumbi, ashisamu sha mulombe,

⁶ mafuta a olifi a mumalampi, tununkila kabotu twa mumafuta akunanika bantu alimwi amutununkila kabotu pakutenta.

⁷ Ulyeelete kutambula mabwe asalala amabwe amwi amakwebo a cakufwala ca mupailishi munene ciitwa ayi efodi alimwi acakufwala cakwe ca pacaamba.

⁸ Bantu balyeelete kunjakila Tente isalalite kwaamba ayi nkekaale pakati lyabo.

⁹ Mukeeyaake ashiyandika shoonse shamukati bweenka mbuli mbweshi nkakuboneshe.

Libokoshi lya Cipangano

¹⁰ “Bakapange libokoshi lya cisamu ca mulombe, lili masentimita ali 110 mubulaamfu, masentimita ali 66 mubufwaafwi alimwi amasentimita 66 kuya mwiculu.

¹¹ Mulyeelete kulibika golodi wiine wiine peculu alimwi amukati moonse, alimwi akulishingulusha amutika wa golodi mweela.

¹² Mukapangileeko nkobeko shone sha golodi akushicatisha kumyeendo ili yone. Nkokwaamba ayi kulubasu lomwi shobilo akumwi shobilo.

¹³ Mpeeke mukapange shisamu sha mulombe shakunyamwisha mukashinanike golodi pansengwe

¹⁴ akushinjisha mumalyango a nkobeko shili kumbasu isho shobilo sha libokoshi shakulitembeshaako.

¹⁵ Shisamu shilyeelete kunoolibo munkobeko sha libokoshi, kutashikushaamo.

¹⁶ Kuswawaawo mukabike mulibokoshi mabwe obilo apampamene ayo ngweshi nkamupe. Pamabwe obilo ayo, mpopalembetwe milawo.

¹⁷ “Ukapange cifwekesho ca nkumbu ca golodi wiine wiine cicite masentimita ali 110 mubulaamfu alimwi amasentimita ali 66 mubufwaafwi.

¹⁸ Ukapange ashintu shobilo sha golodi wakufula shicite mapapaminwa shiitwa ayi bakelebu,

¹⁹ akushibika comwi kweela cifwekesho acimwi kweela. Shintu shobilo isho shilyeelete kunoocatenebo acifwekesho.

²⁰ Shilyeelete kulangana pacifwekesho, cimwi kweela acimwi kweela, ono mapapaminwa a nshisho alyeelete kunoofungulukite peculu lya cifwekesho.

²¹ Lyalo ukabikemo mabwe apampamene ayo obilo akufwekawo cifwekesho peculu.

²² Ono nebo ndaakunookumana awebo peculu mpomunya apo, alimwi pakati ka shintu shobilo isho pacifwekesho, mpweshi nkakupete milawo yangu yoonse ayi ukalwiite bene Isilaeli.

Tebulu ya shimaande shipekwa kuli Lesa

²³ “Ukapange tebulu ya cisamu ca mulombe yeelete kuba masentimita ali 88 mubulaamfu, masentimita ali 44 mubufwaafwi alimwi aali 66 kuya mwiculu.

²⁴ Ukabike golodi wiine wiine peculu alimwi amutika wa golodi mweela moonse.

²⁵ Alimwi ukapangileeko shamweela shili mamilimita 75, alimwi amutika wa golodi pasheesho shamweela.

²⁶ Ukapangileeko nkobeko shone sha golodi akushibika mumakonko a tebulu umo muli myeendo.

²⁷ Nkobeko isho mweshi mukabe shisamu sha kunyamwisha tebulu, shilyeelete kubeta pafwaafwi ashamweela.

²⁸ Ukapange shisamu sha mulombe akushinanika golodi.

²⁹ Kuswawaawo ukapange mbale, nkomeshi, nongo alimwi mbale shifongomene ayi shoonse shikanoosebenseshekwa pakupa shipo kuli Lesa. Shoonse ishi shilyeelete kuba sha golodi wiine wiine.

³⁰ Tebulu iyi ilyeelete kutulwa kunembo lya Libokoshi lya Cipangano. Apalo peculu patebulu, palyeelete kunoocanika cimaande cipekwa kuli ndime lyoonsebo.

Cakubikawo malampi

³¹ “Lyalo ukapange cakubikawo malampi ca golodi wiine wiine. Capanshi alimwi amunkonti shilyeelete kuba sha golodi wakufula, maluba a kucibotesha, kubikaawo amifuko ya buluba alimwi amatewu amweela, shoonse shilyeelete kunoocatenebo acakubikawo malampi.

³² Ono mumbasu sha cakubikawo malampi ici mukaswe misampi yosanwe awomwi, kulubasu lumwi kukaswe yotatwe, akwalo kumwi yotatwe.

³³ Musampi womwi awomwi wa misampi yosanwe awomwi iyo, ulyeelete kuba amaluba otatwe akuubotesha, ali anga ngamaluba a alumondi, kaacite amifuko ya buluba alimwi amatewu mweela.

³⁴ Kumunkonti wa cakubikawo malampi ukabikeeko maluba one akuubotesha, ali anga ngamaluba a alumondi, kaacite amifuko ya buluba alimwi amatewu mweela.

³⁵ Muunshi lya misampi yotatwe yoonse kulubasu lomwi lomwi ulyeelete kuba mufuko wa buluba womwi.

³⁶ Anu mifuko ya buluba iyi, misampi, alimwi acakubikawo malampi, shilyeelete kubabo cintu comwi ca golodi wiine wiine yakufula.

³⁷ Pacakubikawo malampi, ukapangilewo malampi osanwe aobilo akwaabika peculu cakwaamba ayi akanoomunikila kunembo.

³⁸ Ukapange amano alimwi ambale shiselebete sha ncico sha golodi wiine wiine.

³⁹ Pakupanga cakubikawo malampi alimwi ashintu shimwi shoonse sha kuli ncico, ukasebenseshe makilogilamu a golodi wiine wiine ali 35.

⁴⁰ Ukabikeko maano kwaamba ayi ukapange kweelana ambondakakubonesha pakalundu kano.