Kulonga 10 - Baibo Busansulushi Bwa Libuku Ili

Mwaalu wa nsoshi

¹ Lyalo Mwaami Lesa wakaambila Mose ayi, “Koya kumwaami Falawo. Ndalengesha lakwe alimwi abacinenenene bakwe kuba beshicimpamya ayi ncite shaankamiko pakati kabo.

² Alimwi ndalengesha kuba beshicimpamya kwaamba ayi mukalwiite kabotu bana banu alimwi abamashikulu banu mbuli bene Ijipiti mbobakaboneka buluya kwiinda mushaankamiko shendakacita. Mpeeke mwebo noonse mulaakwishiba ayi ndime Mwaami Lesa.”

³ Aboobo Mose aAloni bakaya kumwaami Falawo mukumulwiita ayi, “Mwaami Lesa, Lesa wa bene Ebulu waamba ayi, ‘Nciindi cilaamfu buyani nceshi ukake kunyumfwila ndime? Leka bantu bangu baye bakanambile.

⁴ Na utolelele kukaka, ndaakuleta nsoshi mucishi cako ciilo.

⁵ Kulaakuba shiinji abuumbi cakwaamba ayi shilaakukumana panshi poonse. Shilaakulya shoonse isho shitakwe kunyonyoolwa kumfula ya mabwe, kubikaawo ashisamu shoonse shakacaala.

⁶ Nsoshi isho shilaakukumanabo maandaako a bwaami oonse, maanda a bacinenenene bako boonse alimwi amaanda a bantu boonse bamucishi cako. Shilaakukankamika citana kubonaawo abamashali banu bakulukulu.’ ” Kuswawaawo Mose aAloni bakapiluluka akuswaako kuli Falawo.

⁷ Mpomunyaawo bacinenenene bakwe Falawo bakamwaambila ayi, “Nciindi cilaamfu buyani muntu uyu nceshi atole kaatuletela mapensho? Amubaleeke bene Isilaeli baye, kwaamba ayi bakalambile Mwaami Lesa, Lesa wabo. Sa abobulya tamutoobona ayi cishi ca Ijipiti canyonyooka?”

⁸ Paceebo ceeci Mose aAloni bakabooshekwa kuli Falawo. Lyalo wakabaambila ayi, “Anu inga mwaya mwalambila Mwaami Lesa, Lesa wanu. Sombi mbaani mbweshi bakaye?”

⁹ Mose wakamukumbula ayi, “Soonsebo tulaakuya, pantu pomwi abanike alimwi abamacembele. Tulaakutola abana besu basankwa abanakashi, mbelele, mpongo alimwi aŋombe shesu shoonse mukwiinga tulaakuya mukusekelela ayi tulemeke Mwaami Lesa, Lesa wesu.”

¹⁰ Mpeeke mwaami Falawo wakaamba ayi, “Na nkamuleeke ayi mutole banakashi alimwi abana banu, ingayi Mwaami Lesa wamupa coolwe cikankamika! Sombi nshikoonshi, mukwiinga caboneka patuba ayi mutooyanda kutwaalukila.

¹¹ Ndakaasha! Na mboboobo, kutooyabo basankwa bamanene mukulambila Mwaami Lesa.” Kuswawaawo Mose aAloni bakakushikwa kumwaami Falawo.

¹² Mpomunyaawo Mwaami Lesa wakaambila Mose ayi, “Tandabika lyaansa lyako pacishi ca Ijipiti kwaamba ayi nsoshi shise. Shitoosa mukulya shishango shoonse mumyuunda, shoonse isho shitakwe kunyonyooka kumfula ya mabwe.”

¹³ Aboobo Mose wakatandabika nkoli yakwe pacishi ca Ijipiti. Mpeeke Mwaami Lesa wakalengesha kwaamba ayi muuwo wakwicwe utalike kupuupila cishi ico malumwi alimwi amashiku oonse. Ndibwakaca, muuwo uyo wakaleta nsoshi.

¹⁴ Nsoshi isho shakesa mushipanshapansha, akwikala pacishi coonse. Shakalinga nsoshi shiinji abuumbi isho shitana kubonekawo kale, alimwi sheshi shikabule kubonekaawo.

¹⁵ Lyalo shakakumanabo panshi poonse, mpeeke panshi pakaboolabo mbi. Shakalya ashishango shoonse shakapuluka kumfula ya mabwe, kulita kumwi ashisepo shakalinga kushisamu. Taaku matewu akacaala kushisamu ashishango mucishi coonse ca Ijipiti.

¹⁶ Lyalo mwaami Falawo wakeetila Mose aAloni mulubilo akwaamba ayi, “Ndabiisha kuMwaami Lesa, Lesa wanu alimwi akuli ndimwe.

¹⁷ Ono amundekelele alimwi cibiibi cangu, alimwi mumpailileeko kuMwaami Lesa, Lesa wanu kwaamba ayi akushe mwaalu uleta lufu uyu wancitikila.”

¹⁸ Mpomunyaawo Mose wakashiya mwaami Falawo, akuya mukupaila kuMwaami Lesa.

¹⁹ Alakwe Lesa wakaalula muuwo wakwicwe kuba muuwo wakumbo uyo wakapupa cankusu akutola nsoshi shoonse muLweenge Lusalala. Anu taaku nsoshi nabi yomwi yakacaala mucishi ca Ijipiti.

²⁰ Sombi Mwaami Lesa wakalengesha ayi mwaami Falawo abe shicimpamya, aboobo wakakasha kwaamba ayi bene Isilaeli baye.

Mwaalu wa munshinshe

²¹ Mpeeke Mwaami Lesa wakaambila Mose ayi, “Tandabika lyaansa lyako mwiculu, kwaamba ayi mucishi coonse ca Ijipiti mube munshinshe ulemu.”

²² Aboobo Mose wakatandabika lyaansa lyakwe mwiculu, lyalo mucishi coonse ca Ijipiti mwakaba munshinshe ulemu abuumbi kwanshiku shotatwe.

²³ Bene Ijipiti tebakalinga kubonana nabi kuswa mumaanda kwanshiku shotatwe isho. Sombi balo bene Isilaeli bakalingabo mumumuni mumisena umo mobakalinga kwikala.

²⁴ Mpomunyaawo mwaami Falawo wakeeta Mose akumwaambila ayi, “Ono kamuya mukalambile Mwaami Lesa, muye abanakashi alimwi abana banu. Sombi mbelele, mpongo, alimwi aŋombe shanu shilyeelete kucaala.”

²⁵ Sombi Mose wakakumbula ayi, “Nkokwaamba ayi mulyeelete kutupa banyama bakuya mukubenga milambu amilambu yakutenta kuMwaami Lesa, Lesa wesu.

²⁶ Sobwe, swebo tulaakutola abanyama mbotufubite boonse, taaku mbweshi tukashiyeewo. Mukwiinga ndiswe sobeene sotweelete kusala banyama beelete kupa Mwaami Lesa, Lesa wesu mukumulambila. Ncakwiila, katutana kushika kooko, inga tatwishibi banyama bayandika kubenga milambu kuli nguwe.”

²⁷ Sombi Mwaami Lesa wakalengesha ayi Falawo abe shicimpamya. Aboobo wakakasha bene Isilaeli kuya.

²⁸ Kuswawaawo mwaami Falawo wakaambila Mose ayi, “Swa waawa! Nshisuni kukubona lyobilo! Bushiku bwakukubona, bulaakuba ndolufu lwako!”

²⁹ Alakwe Mose wakakumbula ayi, “Mwaamba kabotu, teshi mukambonewo lyobilo.”