Jowelo 1 - Baibo Busansulushi Bwa Libuku Ili

¹ Aya ngamaswi akaswa kuMwaami Lesa ayo akesa kuli Jowelo mwanaakwe Petuwelo.

Cisoshi mbocakesa mukulya shishango

² Amunyumfwe nobamaloba, amukutike mwebo nomwikala mucishi ca Juda. Sa camushobo wooyu cakacitikawo kale mubuumi bwanu nabi mubuumi bwa bamashali banu bakulukulu?

³ Amulwiite bana banu makani aya, bana banu bakalwiite baana babo, abalo baana babo bakalwiiteko lishalane litoosa.

⁴ Shishango shakacaala kucisoshi cimwi, nsoshi shinene shakesa mukushilya. Shishango shakacaala kunsoshi shinene, twana twa nsoshi twakesa mukushilya. Shishango shakacaala kutwana twa nsoshi, Nsoshi shimwibo shakesa mukushilya.

⁵ Amubuke mulile mwebo nobacakolwa! Amulile mwebo nobeshikunwa waini mukwiinga minyansa yakupangisha waini upya, yanyonyoolwa cakumaninina.

⁶ Cisoshi calwana cishi cesu anga ndikoto lya bashilumamba. Ncakwiila anga mbashilumamba bacite nkusu alimwi baanji cakutabelengeka. Meeno a ncico alikoletebo anga nga nkalamu.

⁷ Canyonyoola shisamu shesu sha minyansa akulya shisamu shesu sha nkuyu. Shalya mapapu oonse a shisamu shesu sha minyansa kushikila misampi yoonse yacaalabo tuu.

⁸ Nobantu amulile anga ngumulindu wafwala masaka mukulila musankwa wakamumamikila uyo wafwa.

⁹ Shipo sha fulaulo asha cakunwa teshi shinoobonekawo muŊanda yakwe Lesa. Bapailishi boonse batoolila ncakwiila batoolila boonse basebensela pameenso a Mwaami Lesa.

¹⁰ Myuunda yacaalabo tuu. Bulongo butoolila myuunda ceebo shili anga ngamaila shanyonyooka. Shisamu sha minyansa asha nkuyu shafwa. Ashalo shisamu sha maolifi shoonse shayuma.

¹¹ Mwebo nobalimi amuungumane. Ee, amuungumane mwebo nomulima minyansa. Amuungumane ceebo witi alimwi abale, ee, ceebo shishango shoonse shanyonyoolwa mumyuunda.

¹² Ncakwiila shisamu sha minyansa asha nkuyu shamana kuyuma, kubikaawo ashisamu sha mapomegilaneti, tupukupuku ashisamu sha maapo, nkokwaamba ayi shisamu shoonse sha myuunda shamana kufwa. Ee, kusangalala kwa bantu kwalobelela.

¹³ Amufwale masaka akutalika kulila, mwebo nobapailishi nomusebensela kushipaililo! Amuceshe kulila kamufwete masaka mwebo nomusebensela pameenso a Mwaami Lesa wangu ceebo shipo shafulaulo asha cakunwa teshi shinoobonekawo muŊanda yakwe.

¹⁴ Amwaambilishe ayi mbushiku bwakulikasha kulya akwiita bantu ayi babungane pantu pomwi. Amwiite bamaloba abantu boonse bekala mucishi ca Juda kwaamba ayi baye kuŊanda yakwe Lesa, Lesa wanu kuya mukulila kuli nguwe.

¹⁵ Ncakwiila bushiku buyoosha butoosa. Ee, bushiku bwa Mwaami Lesa buli pafwaafwi. Ubo mbobushiku Mwaami Lesa Shinkusu shoonse bweshi akalete lunyonyooko.

¹⁶ Amubone shakulya shanyonyoolwa kutulangilisha ameenso esu. Kusangalala akukondwa shamana muŊanda yakwe Lesa?

¹⁷ Shili anga ngamaila shamana kufwa mubulongo buyumu. Taaku shili anga ngamaila shakubika kubutala. Paceebo ceeco matala oonse atoonyonyookabo.

¹⁸ Ŋombe shitoolila kunsala ceebo mumafulo a nshisho taamu bwiisu. Ashalo mbelele shapenga abuumbi.

¹⁹ NoBaami baLesa, ndamulilila! Lumwi lwatenta mafulo anga ngumulilo ukali. Ashalo shisamu shapya abuumbi kulumwi.

²⁰ Ncakwiila abanyama bamuluundu batoomulilila mukwiinga tulonga toonse twamana kuyuma. Aalo mafulo amana kupya kulumwi.