Joshuwa 5 - Baibo Busansulushi Bwa Libuku Ili

¹ Ono bamaami boonse bene Amoli kumbo lya Joodani, alimwi abamaami bene Kenani muloombe lwa Lweenge lwa Mediteleniyani bakanyumfwa ayi Mwaami Lesa wakayumya Mulonga wa Joodani kushikila bene Isilaeli boosubuka. Mpeeke boonse bakaloonda abuumbi ankusu shoonse shakulwana abene Isilaeli shakabula.

Kupalulwa kuGilugala

² Kuswawaawo Mwaami Lesa wakaambila Joshuwa ayi, “Fula shibeshi kuswa kumabwe akupalula bene Isilaeli.”

³ Aboobo Joshuwa wakacita kweelana abwakaamba Mwaami Lesa, akupalula bene Isilaeli kumusena wiitwa ayi Gibiyati Alaloti.

⁴ Wakacita boobo mukwiinga boonse abo bakaswa mucishi ca Ijipiti nkokwaamba ayi basankwa bakalinga kucite myaaka isuminishikwa kuba shilumamba, bakafwita muluyanga pakunooswa mucishi ca Ijipiti.

⁵ Bantu boonse bakaswa mucishi ca Ijipiti bakapalulwa, sombi boonse bakashalilwa muluyanga mulweendo tebakalinga kupalwitwe.

⁶ Bene Isilaeli bakeendaana muluyanga kwamyaaka ili makumi one, kushikila basankwa boonse bakalinga kucite myaaka isuminishikwa kuba shilumamba ndibakamana kufwa, ceebo tabakwe kunyumfwila Mwaami Lesa. Mukwiinga Mwaami Lesa wakabashomesha cakulumbila ayi cishi muli bubile abulongo bubotu ico ncaakashomesha bamashali babo bakulukulu ayi ulaakutupa, teshi bakaciboneewo.

⁷ Paceebo ceeco wakabusha bana babo mumusena wabo. Joshuwa wakapalula baana abo mukwiinga tabakwe kupalulwa munshila.

⁸ Ono mushobo woonse ndiwakamana kupalulwa, bakalinga kwikalabo mumisumba kushikila shiloonda shoosha.

⁹ Mpeeke Mwaami Lesa wakaambila Joshuwa ayi, “Pabushiku bwasunu, ndamukusha musebaanyo wakuba basha mucishi ca Ijipiti.” Nceceeco musena uyo ncebakalinga kuwiitila ayi Gilugala. Liina ilyo asunu nkolicili.

¹⁰ Ingayi macolesha pabushiku bwalikumi ashone mumweenshi uyo kabacili mumisumba kuGilugala kushinyika sha ndabala ya Jeliko, bakasekelela bushiku bwa Pasika bwakwiibaluka kusotokela.

¹¹ Bushiku bwakaboolaawo, mbobushiku bwakutaanguna kulya shakulya shimwi mucishi ca Kenani. Bakalya cimaande alimwi ashakulya shili anga ngamaila shakukanga.

¹² Kuswawaawo mana akacileka kuloka. Mpeeke tekwakalingaawo mana mucishi ca bene Isilaeli alimwi. Lyalo bakalinga kulyabo shakulya sha mucishi ca Kenani.

Joshuwa amuntu wakalinga kucite mupeeni

¹³ Ono Joshuwa ndyaakalinga pafwaafwi andabala ya Jeliko, wakabona muntu kunembo lyakwe kaacite mupeeni mulyaansa. Joshuwa wakaya kuli nguwe akumwiipusha ayi, “Sa uli kulubasu lwesu nabi kulubasu lwa balwani besu?”

¹⁴ Lakwe wakakumbula ayi, “Nshibete kulubasu lwanu nabi kulubasu lwa balwani banu, sombi nebo ndi mutanjilili wa bashilumamba ba Mwaami Lesa.” Lyalo Joshuwa wakafubama mukumulambila akumwiipusha ayi, “Nkambo, ino ngamaswinshi ngomwaletela ndime nemusebenshi wanu?”

¹⁵ Mutanjilili wa bashilumamba ba Mwaami Lesa ulya wakakumbula Joshuwa ayi, “Fuula nkwabilo shako ceebo pamusena mpooimfwi palisalalite.” Alakwe Joshuwa wakacita mbomunya ubo.