Joshuwa 24 - Baibo Busansulushi Bwa Libuku Ili

Joshuwa mbwaakaamba abantu kuShekemu

¹ Mpeeke Joshuwa wakabunganya mikowa yoonse ya bene Isilaeli kuShekemu. Wakeeta bamaloba, bamatanjilili, boomboloshi alimwi abacinenenene ba muIsilaeli. Lyalo bakesa beemikana kunembo lyakwe Lesa.

² Joshuwa wakaambila bantu boonse ayi, “Mwaami Lesa, Lesa wa bene Isilaeli waamba ayi, ‘Kalekale bamashali banu bakulukulu bakalinga kwikala kwitala lya Mulonga wa Yufuletisi kabalambila balesa bamwi. Womwi wa bamashali banu abo nguTela, ishi Abulaamu aNawoli.

³ Lyalo ndakabwesa Abulaamu, mushali wanu mukulukulu, kuswa mucishi cili kwitala lya Mulonga wa Yufuletisi akumutanjilila kuya mucishi coonse ca Kenani. Ndakamupa bamulunyungu lwakwe baanji. Ndakamupa Isaki,

⁴ Isaki ndakamupa Jakobo aEsau. Esau ndakamupa cishi ca tulundu ca Edomu, sombi Jakobo mushali wanu mukulukulu wakaya kuIjipiti abana bakwe.

⁵ Pesule ndakatuma Mose aAloni kuIjipiti. Ndakapensha bene Ijipiti kwiinda mushintu isho nshendakacita uko. Mboboobo nebo mbondakamukushaamo mucishi ico.

⁶ Bamashali banu bakulukulu ndindakabakusha muIjipiti, bene Ijipiti bakabakonkela abashilumamba mushikoci sha maaki alimwi apamaaki a nkondo. Sombi bamashali banu bakulukulu ndibakashika kuloombe lwa Lweenge Lusalala,

⁷ bakandilila ayi mbacaafwe. Lyalo ndakabika munshinshe pakati kabo abene Ijipiti. Mpeeke ndakalengesha Lweenge kukunka calunteente pali mbabo akubalobya. Mulishi ncendakacita kubene Ijipiti. Mwakekala muluyanga ciindi cilaamfu.

⁸ “ ‘Lyalo ndakamuleta mucishi ca bene Amoli abo bakalinga kwikala kwicwe lya Mulonga wa Joodani. Bakamulwana, sombi ndakabaaba mumaansaanu ayi mubakoome. Ndakalinga kuya cibanyonyoola kunembo lyanu tibili mwakabwesa cishi cabo coonse.

⁹ Balaki mwanaakwe Sipo, mwaami wa cishi ca Moabu, ndyaakalibambila kumulwana, wakatumya nkombe kuli Balaamu mwanaakwe Beyo ayi ese amushingane.

¹⁰ Sombi nshikwe kunyumfwila Balaamu, aboobo wakamupa coolwe peculu lya coolwe, mpeeke ndamupulusha kuswa mumaansaakwe.

¹¹ “ ‘Mpeeke mwakasubuka Mulonga wa Joodani akushika kuJeliko. Bene Jeliko bakamulwana, mbweeke bwakacita bene Amoli, bene Pelisi, bene Kenani, bene Iti, bene Gegashi, bene Ifi alimwi abene Jebusi. Nakubi boobo ndakabaaba mumaansaanu ayi mubakoome.

¹² Ndakabatumina maamfu kunembo lyanu kwaamba ayi atandaanye bamaami bobilo bene Amoli. Teshi mipeeni yanu nabi buta shakalengesha ayi bakomwe, sobwe.

¹³ Munshila iyo ndakamupa cishi ico ncemutakwe kusebensela amandabala anene ngomutakwe kuyaka. Mulekalaamo akunoolya minyansa alimwi amaolifi nshemutakwe kushanga.’ ”

¹⁴ Lyalo Joshuwa wakatolelela ayi, “Anu ono kamulemeka Mwaami Lesa akumusebensela cakushomeka munshila shoonse. Amusowe balesa bakalinga kulambila bamashali banu bakulukulu muMesopotamya amuIjipiti. Lyalo musebenselebo Mwaami Lesa.

¹⁵ Ono na tamusuminite kusebenselabo Mwaami Lesa, amusale sunu nobeene uyo ngweshi munoosebensela, na mbalesa abo bakalinga kulambila bamashali banu bakulukulu mucishi ca Mesopotamya, nabi na mbalesa ba bene Amoli abo bene cishi ncemutekwikalaamo. Sombi nebo abamuŋanda yangu, tulanoosebenselabo Mwaami Lesa.”

¹⁶ Mpeeke bantu bakakumbula ayi, “Calo cakufutatila Mwaami Lesa kwaamba ayi tusebensele balesa bamwi, taceelete akunyumfwika pakati kesu!

¹⁷ NguMwaami Lesa, Lesa wesu wakatukusha pantu pomwi abamashali besu bakulukulu kuswa muIjipiti, mucishi cabusha alimwi ngowakacita shaankamiko shilya mumeenso esu. Wakatulama mulweendo lwesu loonse alimwi apakati ka mishobo imwi yoonse motwakeenda.

¹⁸ NguMwaami Lesa wakatanda mishobo imwi yoonse kunembo lyesu kubikaako abene Amoli abo bakalinga kwikala mucishi cino. Anu aswebo tunanoosebenselabo Mwaami Lesa mukwiinga nguLesa wesu.”

¹⁹ Mpomunyaawo Joshuwa wakaambila bantu ayi, “Mpashi kusebensela Mwaami Lesa cikamuyumine. Mukwiinga lakwe nguLesa usalalite, ucite busuba, aboobo teshi akalekelele bwaashu bwanu alimwi ashibiibi shanu.

²⁰ Na mukafutatile Mwaami Lesa akusebensela balesa beensu, ulaakukalala akucita cintu ciyoosha pali ndimwe. Ulaakumunyonyoola nakubi kwaamba ayi lyoonse wakalinga kumucitila shintu shibotu.”

²¹ Sombi bantu bakaambila Joshuwa ayi, “Sobwe! Tunanoosebenselabo Mwaami Lesa.”

²² Lyalo Joshuwa wakaamba ayi, “Mwebo nobeene mwalibeta bakamboni kwaamba ayi mwasala kusebensela Mwaami Lesa.” Abalo bakakumbula ayi, “Ee, tuli bakamboni.”

²³ Mpeeke Joshuwa wakaamba ayi, “Ono anu amusowe balesa beensu bali pakati kanu, akupa myoyo yanu kuMwaami Lesa, Lesa wa bene Isilaeli.”

²⁴ Abalo bakamwaambila ayi, “Tunanoosebensela Mwaami Lesa akumunyumfwila.”

²⁵ Munshila iyo Joshuwa wakapanga cipangano kubantu abo pabushiku ubo alimwi kuShekemu kweenka uko wakabapa milawo amilasho yakukonkela.

²⁶ Milawo iyo Joshuwa wakeelemba muLibuku lya Milawo yakwe Lesa. Mpeeke wakabwesa libwe linene akuliimika munshaacisamu ca mubanga pafwaafwi amusena usalalite wa Mwaami Lesa.

²⁷ Lyalo wakaambila bantu boonse ayi, “Amubone! Libwe ili lyaba kamboni kuli ndiswe. Lyanyumfwa maswi oonse aamba Mwaami Lesa kuli ndiswe. Lilaakumushinina na mukabule kushomeka kuMwaami Lesa, Lesa wanu.”

²⁸ Kuswawaawo Joshuwa wakaambila bantu ayi baye mwabomwabo.

Joshuwa aEliyasa mbobakafwa

²⁹ Shintu isho ndishakeenda, musebenshi wa Mwaami Lesa Joshuwa mwanaakwe Nani wakafwa kaacite myaaka ili 110.

³⁰ Bakamubika mucishi cakwe mwiine kuTimunati Sela mucishi ca tulundu ca Efuleemu kumatwa a Kalundu ka Gaashi.

³¹ Bene Isilaeli bakasebensela Mwaami Lesa kushikila Joshuwa abamaloba bakacaalaawo ndibakamana kufwa. Bamaloba abo bakabona ameenso shoonse Mwaami Lesa nshaakacitila bene Isilaeli,

³² Mafuwa akwe Josefu, ayo bene Isilaeli ngobakakusha kuIjipiti, akabikwa kuShekemu, mukapansha ka cishi Jakobo nkaakoola amaali asilifa ali mwaanda, kuswa kubana bakwe Amoli ishi Shekemu. Musena uyo wakaba cishi ca bamulunyungu lwakwe Josefu.

³³ Alakwe Eliyasa mwanaakwe Aloni wakafwa akubikwa kuGibiya, ndabala iyo yakalinga mucishi ca tulundu ca Efuleemu iyo yakapekwa kuli Fineyasi mwanaakwe musankwa.