Joshuwa 19 - Baibo Busansulushi Bwa Libuku Ili

Cishi cakapekwa bamumukowa wakwe Simyoni

¹ Ono mukowa wakwe Simyoni ngowabili kupekwa cishi cinebo, kweelana ashipani shabo kwiinda mukuuma cisolo. Cishi cabo cakalinga mukati ka cishi cakapekwa bamumukowa wakwe Juda.

² Mukati ka manyinsa a ncico mwakalinga ndabala ya Biyasheba, nabi ayi Sheba, Molada,

³ Asali, Shuwa, Bala, Esemu,

⁴ Elitoladi, Betulu, Oma,

⁵ Sikilagi, Beti Makaboti, Asali Susa,

⁶ Beti Laboti alimwi aAshaluyemu. Nkokwaamba ayi mandabala anene pantu pomwi akalinga likumi aotatwe, kubikaawo amishi yakalinga kushingulukite mandabala ayo.

⁷ Mandabala amwi anene akalinga Aini, Limoni, Eta alimwi Ashani, nkokwaamba ayi mandabala anene ali one, kubikaawo amishi yakalinga kushingulukite mandabala ayo.

⁸ Mishi mucishi cabo yakalinga kushingulukite mandabala anene ayo yakalinga kushika akuBaalati Biya nabi ayi Lama, kuNegefu. Ici ncecishi bamumukowa wakwe Simyoni ncebakapekwa ayi ncinebo kweelana ashipani shabo.

⁹ Ono ceebo cakwaamba ayi bamumukowa wakwe Juda bakapekwa cishi cinene abuumbi, cimwi cakatimbulwa kuba ca bamumukowa wakwe Simyoni. Aboobo cishi ca bene Simyoni cakalinga mukati ka cishi ca bene Juda.

Cishi cakapekwa bamumukowa wakwe Sebuluni

¹⁰ Ono mukowa wakwe Sebuluni ngowatatu kupekwa cishi cinebo, kweelana ashipani shabo kwiinda mukuuma cisolo. Cishi ncebakapekwa cakalinga kushika akuSalidi.

¹¹ Kuswa kooko nyinsa yakalinga kwiinda kuMalala kumbo, kuya mukweela kuDabesheti alimwi akukalonga kali kwicwe lya Jokineyamu.

¹² Kulubasu lumwi lwa Salidi yakalinga kwiinda kunyinsa ya Kisiloti Taba kwicwe, lyalo caboola kuDabelati alimwi akuya mukushika akuJafya.

¹³ Kuswa kooko yakaya kwicwe mukushika kuGati Efa alimwi aEtikasini. Lyalo yakalanga kulubasu luliiko ndabala ya Niya kunshila iya kuLimoni.

¹⁴ Kulubasu lwakumatwa nyinsa yakalulama kuAnatoni, kuya mukweela kuCinyika ca Ifutayelo.

¹⁵ Mukati ka manyinsa a ncico mwakalinga ndabala ya Katati, Naala, Shimuloni, Idala alimwi aBetileemu. Nkokwaamba ayi mandabala anene pantu pomwi akalinga likumi aobilo, kubikaawo amishi yakalinga kushingulukite mandabala ayo.

¹⁶ Mandabala ayo amishi yakalinga kwaashingulukite akalinga mucishi cakapekwa mukowa wakwe Sebuluni kweelana ashipani shabo.

Cishi cakapekwa bamumukowa wakwe Isaka

¹⁷ Ono mukowa wakwe Isaka ngowane kupekwa cishi cinebo, kweelana ashipani shabo kwiinda mukuuma cisolo.

¹⁸ Mukati ka cishi cabo mwakalinga ndabala ya Jesiliilu, Kesuloti, Shunemu,

¹⁹ Afalayimu, Shiyoni, Anaalati,

²⁰ Labiti, Kishiyoni, Ebesi,

²¹ Lemeti, Eni Ganimu, Eni Aada alimwi Beti Pasesi.

²² Nyinsa yakalinga kwiinda akweela lya Taboli, Shaasuma alimwi Beti Shemeshi, kuya mukweela kuMulonga wa Joodani. Nkokwaamba ayi mandabala anene pantu pomwi akalinga likumi aosanwe ayomwi, kubikaawo amishi yakalinga kushingulukite mandabala ayo.

²³ Mandabala ayo amishi yakalinga kwaashingulukite akalinga mucishi cakapekwa mukowa wakwe Isaka kweelana ashipani shabo.

Cishi cakapekwa bamumukowa wakwe Asha

²⁴ Ono mukowa wakwe Asha ngowasanu kupekwa cishi cinebo, kweelana ashipani shabo kwiinda mukuuma cisolo.

²⁵ Mukati ka cishi cabo mwakalinga ndabala ya Elikati, Ali, Beteni, Akishafu,

²⁶ Alamu Meleki, Amadi alimwi aMishale. Kuya kumbo cakalinga kushika kuKamelo alimwi aShiwoli Libinati.

²⁷ Kuboola kwicwe, nyinsa yakalinga kuya kuBeti Dagoni, akwiinda kweela lya Sebuluni alimwi aCinyika ca Ifutayelo kuya kumatwa kunshila ya kuBeti Emeki aNeiyelo. Yakalinga kutolelela kumatwa akuya kuKabulu,

²⁸ Ebiloni, Lewobu, Aamoni alimwi aKana, kuya mukushikabo akuSidoni.

²⁹ Lyalo yakalinga kuboola kuLama, kuya mukushika kundabala yakalinga kucite lilinga lya Taya. Ono nkokuboola kuOsa kuya mukweela kuLweenge lwa Mediteleniyani. Mukati ka cishi cabo mwakalinga ndabala ya Maalabu, Akisibu,

³⁰ Uma, Afeki alimwi Lewobu. Nkokwaamba ayi mandabala anene pantu pomwi akalinga makumi obilo amandabala obilo, kubikaawo amishi yakalinga kushingulukite mandabala ayo.

³¹ Mandabala ayo amishi yakalinga kwaashingulukite akalinga mucishi cakapekwa mukowa wakwe Asha kweelana ashipani shabo.

Cishi cakapekwa bamumukowa wakwe Nafutali

³² Ono mukowa wakwe Nafutali ngowasanu awomwi kupekwa cishi cinebo, kweelana ashipani shabo kwiinda mukuuma cisolo.

³³ Nyinsa ya ncico yakalinga kuswa kuElefu kwiinda kumubanga uli muSaananimu, akuya kuAdami Nekebu akuJamuniya. Lyalo yakaya kuLakumu kuya mukweela kuMulonga wa Joodani.

³⁴ Kuswa kooko yakalinga kuboola kumbo kuAsinoti Taboli. Lyalo yakaya kuUkoku mukushika kunyinsa ya cishi cakwe Sebuluni kumalenge, njeeyo kucishi ca bamumukowa wakwe Asha kabali kumbo akuya mukushika kuMulonga wa Joodani kwicwe.

³⁵ Mandabala akalinga mumalinga akalinga Sidimu, Saa, Amati, Lakati, Kineleti,

³⁶ Adama, Lama, Asoli,

³⁷ Kadeshi, Edileyi, Eni Asoli,

³⁸ Yiloni, Migidalelo, Olemu, Beti Anati alimwi aBeti Shemeshi. Nkokwaamba ayi mandabala anene pantu pomwi akalinga likumi osanwe aone, kubikaawo amishi yakalinga kushingulukite mandabala ayo.

³⁹ Mandabala ayo amishi yakalinga kwaashingulukite akalinga mucishi cakapekwa mukowa wakwe Nafutali kweelana ashipani shabo.

Cishi cakapekwa bamumukowa wakwe Dani

⁴⁰ Ono mukowa wakwe Dani ngowasanu ayobilo kupekwa cishi cinebo kweelana ashipani shabo kwiinda mukuuma cisolo.

⁴¹ Mukati ka cishi cabo mwakalinga ndabala ya Sola, Eshitaoli, Ili Shemeshi,

⁴² Shaalibini, Aijaloni, Itila,

⁴³ Eloni, Timuna, Ekiloni,

⁴⁴ Eliteke, Gebitoni Baalati,

⁴⁵ Jeyudi, Beni Belaki, Gati Limoni,

⁴⁶ Me Jakoni alimwi aya Lakoni pantu pomwi amusena wakalinga kushingulukite Jopa.

⁴⁷ Bene Dani ndibakanyaikwa cishi cabo, bakaya mukulwana ndabala inene ya Leshemu. Bakaishinguluka, bacaya bantu ba mumo boonse alimwi akwiibwesa ayi njabo. Bakekala mundabala iyo akwiitumba liina limwi ayi Dani, liina lya mushali wabo mukulukulu.

⁴⁸ Mandabala ayo amishi yakalinga kwaashingulukite akalinga mucishi cakapekwa mukowa wakwe Dani kweelana ashipani shabo.

Cishi cakacaalila kupekwa

⁴⁹ Bene Isilaeli ndibakamana kwaabana cishi, bakapaako Joshuwa mwanaakwe Nani, cipansha ca cishi ayi cibe caakwe.

⁵⁰ Lyalo kweelana abwakaamba Mwaami Lesa, bakamupa ndabala inene ya Timunati Sela iyo njaakasenga. Ndabala iyo yakalinga mucishi ca tulundu ca Efuleemu. Joshuwa wakeeyakulula akwikala momunya umo.

⁵¹ Isho nsheshishi Eliyasa mupailishi munene, Joshuwa mwanaakwe Nani alimwi abamatanjilili ba shipani sha mumikowa ya bene Isilaeli nshebakababaanya kwiinda mukuuma cisolo kuShilo ayi beepushe Mwaami Lesa. Bakalinga kucita boobo pamwinjililo wa Tente ya Cipangano. Ubo mbobakamanisha kubaanya cishi ico coonse.