Joshuwa 17 - Baibo Busansulushi Bwa Libuku Ili

Cishi cakapekwa kumusa wa mukowa wakwe Manase

¹ Ono cipansha comwi ca cishi cakalinga kumbo lya Mulonga wa Joodani cakapekwa kubamwi bamulunyungu lwakwe Manase mwaana musankwa wakwiiya wakwe Josefu. Makiya, uyo wakalinga mushali mukulukulu wa bene Gilyadi, wakalinga mwaana wakwiiya wakwe Manase. Wakapekwa Gilyadi alimwi aBashani kwicwe lya Mulonga wa Joodani ceebo wakalinga kucishi bumbi nkondo.

² Bamumukowa wakwe Manase bamwi bakapekwa cishi ico kumbo lya Mulonga wa Joodani kweelana ashipani shabo. Nkokwaamba ayi Abiyesa, Eleki, Asilyelo, Shekemu, Efeli alimwi aShemida. Anu aba mbobasankwa bamwi bamulunyungu lwakwe Manase mwanaakwe Josefu kweelana ashipani shabo.

³ Ono Selofeyadi wakashalwa kuli Efeli, Efeli wakashalwa kuli Gilyadi, Gilyadi wakashalwa kuli Makiya, Makiya wakashalwa kuli Manase. Uyo Selofeyadi taakalinga kuciteewo baana basankwa, sombibo banakashi. Meena abo ngaaya. Maala, Nowa, Ogila, Miluka alimwi aTesa.

⁴ Mpomunyaawo bakaya kuli Eliyasa mupailishi, Joshuwa mwanaakwe Nani alimwi abamatanjilili bamwi akwaamba ayi, “Mwaami Lesa wakaambila Mose ayi akatupe cishi cinesu, bweenka mbuli bamakwabesu.” Aboobo Joshuwa wakabapa cishi cinebo, bweenka mbuli bamakwababo baishi wabo kweelana abwakaamba Mwaami Lesa.

⁵ Nceceeco Manase ncaakapetwa shipansha likumi sha cishi kwiilika paGilyadi alimwi aBashani kwicwe lya Mulonga wa Joodani.

⁶ Mukwiinga baana banakashi bamumukowa wakwe Manase bakapekwa cishi cinebo kweelana abwakapekwa baana basankwa, cishi ca Gilyadi cakapekwa kubamulunyungu lwakwe Manase bamwi.

⁷ Anu cishi cakwe Manase cakalinga kutalikila kuAsha kuya kuMikimetati kwicwe lya Shekemu. Kuswa kooko nyinsa yakaya kulubasu lwakumalenge kushika akushinguluka bantu ba kuEni Tapuwa.

⁸ Cishi cakalinga kushingulukite ndabala ya Tapuwa ncakwe Manase, sombi ndabala iine ya Tapuwa, munyinsa yakwe Manase, yakalinga ya bene Efuleemu.

⁹ Lyalo nyinsa yakatolelela kulubasu lwakumalenge lya kalonga ka Kana. Kwakalinga mandabala a bene Efuleemu ayo akalinga kusenkenebo amandabala a bene Manase, sombi nyinsa yakwe Manase yakalinga kumatwa lya kalonga akuya mukweela muLweenge lwa Mediteleniyani.

¹⁰ Ono kulubasu lwakumalenge cishi cakalinga cakwe Efuleemu, akwalo kumatwa cakalinga cakwe Manase. Anu cishi cakwe Manase cakalinga kweela kuLweenge lwa Mediteleniyani kumbo, akuya kucakwe Asha kumatwa alimwi acakwe Isaka kulubasu lwakwicwe.

¹¹ Ono mucishi cakwe Isaka alimwi acakwe Asha, Manase wakalinga kucitilemo ndabala ya Beti Shani, Ibuleyamu pantu pomwi abantu ba mundabala ya Doli ili muloombe lwa Lweenge, Endoli, Taanaki alimwi aMegido, kubikaawo amishi ishingulukite mandabala ayo.

¹² Nacibi boobo bene Manase bakaalilwa kubwesa mandabala anene aya, aboobo bene Kenani bakatolelela kwikalaamo.

¹³ Sombi bene Isilaeli ndibakaba bunene ankusu, bakacikonsha kusebensesha bene Kenani cabusha, nakubi kwaamba ayi bakaalilwa kubatandaamo boonse.

Bene Efuleemu alimwi amusa wa mukowa wa bene Manase mbobakasenga cishi acimwi

¹⁴ Kuswawaawo bamulunyungu lwakwe Josefu bakaambila Joshuwa ayi, “Ceebonshi mwatupabo cipansha comwi ca cishi ayi ncinesu? Swebo tuli baanji abuumbi mukwiinga Mwaami Lesa wakatupa coolwe.”

¹⁵ Mpeeke Joshuwa wakabakumbula ayi, “Na mwafula cakwaamba ayi cishi ca tulundu ca bene Efuleemu caceya, anu amuye musokole luundu luli mucishi ca bene Pelisi alimwi aca bene Lefaimu.”

¹⁶ Balo bakakumbula ayi, “Cishi ca tulundu caceya kuli ndiswe. Sombi bene Kenani boonse abo bekala mushinyika balicite shikoci sha nshimbi, nkokwaamba ayi abaabo bekala kundabala ya Beti Shani alimwi amishi ya njiyo abaabo bekala muCinyika ca Jesiliilu.”

¹⁷ Sombi Joshuwa wakaambila bamulunyungu lwakwe Josefu aba, nkokwaamba ayi bene Efuleemu alimwi abene Manase ayi, “Ncakwiila muli baanji alimwi muli bayumu abuumbi. Teshi mubebo acipansha comwi ca cishi,

¹⁸ sombi cishi ca tulundu acalo cilaakuba cinenu, nacibi kwaamba ayi nduundubo. Mulaakusokola kuswa kweela akweela. Nabi bene Kenani balicite shikoci sha nshimbi alimwi mbayumu, mwebo inga mwabatanda mucishi umo.”