Joshuwa 14 - Baibo Busansulushi Bwa Libuku Ili

Cishi ca kwicwe lya Mulonga wa Joodani mbocakabaanishikwa

¹ Ono shishi isho bene Isilaeli nshebakapekwa ayi nshinebo mucishi ca Kenani nsheeshi: Eliyasa mupailishi, Joshuwa mwanaakwe Nani alimwi abamatanjilili ba shipani sha mikowa ya bene Isilaeli mbobakabaabanya.

² Shishi ishi shakapekwa kumikowa yosanwe ayone alimwi amusa kwiinda mukuuma cisolo, kweelana aMwaami Lesa mbwaakashomesha Mose.

³ Mose wakalinga wapa kale mikowa yobilo alimwi amusa cishi ico cakalinga kwicwe lya Mulonga wa Joodani ayi ncinebo. Sombi bene Lefi taakwe kubapawo cishi ayi ncinebo.

⁴ Bamulunyungu lwakwe Josefu bakaba mikowa yobilo, nkokwaamba ayi wakwe Manase alimwi aEfuleemu. Bene Lefi tabakwe kupekwa cipansha ca cishi, sombibo mandabala anene akwikalaamo acite mafulo a shifubwa shabo.

⁵ Munshila iyo bene Isilaeli bakabaanya cishi kweelana aMwaami Lesa mbwaakaambila Mose.

Kalebu mbwaakapekwa ndabala inene ya Ebuloni

⁶ Ono bamwi bamumukowa wakwe Juda bakaya kuli Joshuwa kuGilugala. Mpeeke Kalebu mwanaakwe Jefune mwine Kenisi wakamwaambila ayi, “Mulishi Mwaami Lesa mbwaakaambila Mose muntu wakwe kuKadeshi Baniya pali ndimwe anebo.

⁷ Ndakalinga kucite myaaka makumi one Mose, musebenshi wa Mwaami Lesa, ndyaakantuma kuswa kuKadeshi Baniya ayi nkasense cishi cino. Pakuboola, ndakaleta maswi kuli nguwe kweelana akubona kwangu.

⁸ Sombi bamakwesu bamwi mbondakayaabo, bakalengesha bantu boowa. Nacibi boobo, nebo ndakakonkela Mwaami Lesa amoyo wangu woonse.

⁹ Paceebo ceeci Mose wakanshomesha cakulumbila ayi, ‘Cishi ico ncewalyataamo cilaakuba caako alimwi abana bako lyoonse, mukwiinga wakonkela Mwaami Lesa wangu amoyo wako woonse.’

¹⁰ Ono amubone, kweelana abwakanshomesha Mwaami Lesa, wandama kwa myaaka ili makumi one alimwi ayosanwe kuswa ndyaakaambila Mose makani aya. Ico cakalinga ciindi bene Isilaeli ndibakalinga kwiindaana muluyanga. Amunangilishe, bulya ndakumanya myaaka makumi osanwe aotatwe alimwi ayosanwe!

¹¹ Asunu bulya, nebo ndi muyumubo bweenka mbondakalinga Mose ndyaakantuma, alimwi ndibo wandangala nabi kuya kunkondo bweenka mbondakalinga kataanshi.

¹² Anu amumpe cishi ca tulundu ici Mwaami Lesa ncaakanshomesha pabushiku bulya. Mwebo nobeene mwakanyumfwa ayi nkokuli basankwa bapolomene beetwa ayi bene Anaki, alimwi mandabalaabo anene ali mumalinga anene. Sombi munkusu sha Mwaami Lesa mwiine, ndaakubatandaamo kweelana ambwaakaamba.”

¹³ Lyalo Joshuwa wakapa coolwe Kalebu mwanaakwe Jefune akumupa ndabala inene ya Ebuloni ayi njaakwe.

¹⁴ Aboobo kuswa ciindi ico ndabala inene ya Ebuloni abobulya njakwe Kalebu mwanaakwe Jefune mwine Kenisi mukwiinga wakakonkela Mwaami Lesa, Lesa wa bene Isilaeli amoyo wakwe woonse.

¹⁵ Kalekale cishi ca Ebuloni cakalinga kwiitwa ayi Kilyati Aaba. Muntu wakalinga kwiitwa ayi Aaba wakalinga muntu ulemekwa abuumbi pakati ka bantu bapolomene beetwa ayi bene Anaki. Kuswawaawo inkondo yakaluba mumeenso a bantu boonse mucishi ico.