Joshuwa 13 - Baibo Busansulushi Bwa Libuku Ili

Shishi shakacaalaawo kubwesekwa

¹ Ono Joshuwa ndyaakacembela, Mwaami Lesa wakamwaambila ayi, “Webo wacembela abuumbi, sombi cishi ciciyandika kubwesekwa cicilibo cinene.

² Cishi ico cakalinga cacaalaako nceeci: cishi coonse ca bene Filisiti alimwi aca bene Geshuli

³ ico ciswa kuMulonga wa Shiwo kwicwe lya cishi ca Ijipiti, kuya mukushika akuEkiloni kulubasu lwakumatwa, coonse cakalinga ca bene Kenani, cishi ca bamaami bosanwe ba bene Filisiti, nkokwaamba ayi Gasa, Ashidodi, Ashikeloni, Gati alimwi aEkiloni pantu pomwi aceeco ca bene Afi

⁴ kumalenge. Cishi coonse ca bene Kenani kuswa kucishi ca bene Sidoni ca Ala kuya mukushika akuAfeki, cishi ca bene Amoli,

⁵ alimwi acishi ca bene Gibali. Cishi coonse ca Lebanoni kulubasu lwakwicwe, kuswa kuBaali Gadi munshaaKalundu ka Elimoni, kuya mukushika akumwinjililo wa Amati.

⁶ Kubaabo boonse bekala kucishi ca tulundu kuswa kuLebanoni akushika kuMisilefoti Maimu, nkokwaamba ayi bene Sidoni boonse, nebo nemwiine ndaakubatanda mucishi kunembo lya bene Isilaeli. Cishi ici ulyeelete kucibaanya bene Isilaeli kweelana ambondakulwiita.

⁷ Ono bulya, baanya mikowa iyi ili yosanwe ayone alimwi amusa wa mukowa wakwe Manase cishi ici ayi cibe cinebo.”

Cishi ca kwicwe lya Mulonga wa Joodani mbocakabaanishikwa

⁸ Mpeeke mukowa wakwe Lubeni, Gadi alimwi amusa wa mukowa wakwe Manase kabali bapekwa kale cishi ico Mose musebenshi wa Mwaami Lesa ncaakabapa. Cishi ici cakalinga kwicwe lya Mulonga wa Joodani.

⁹ Cakalinga kutalikila kuAlowa, mweela Cinyika ca Anoni, alimwi andabala inene ili pakati ka cinyika ico, kubikaawo acitunta coonse ca Medeba kuya mukushika akuDiboni,

¹⁰ pantu pomwi amandabala anene oonse a mwaami Sioni wa bene Amoli, uyo wakalinga kulela kuEshiboni kushikila akunyinsa ya bene Amoni.

¹¹ Mucishi cabo ici, mwakalinga aGilyadi, cishi ca bene Geshuli aca bene Maaka, Kalundu koonse ka Elimoni alimwi acishi ca Bashani coonse tibili akundabala ya Saleka.

¹² Nkokwaamba ayi cishi coonse ca mwaami Ogi uyo wakalinga kulela kuAshitaloti aEdileyi mucishi ca Bashani. Anu Ogi ngowakacaalawobo eenka pabene Lefaimu. Ncakwiila Mose wakakoma bantu aba akubwesa cishi cabo.

¹³ Sombi bene Isilaeli tabakwe kutanda bene Geshuli alimwi abene Maaka. Balo asunu bacikala abene Isilaeli.

¹⁴ Ono Mose taakwe kupawo mukowa wa bene Lefi cishi ayi cibe cinebo, mukwiinga milambu yakutenta ipekwa Mwaami Lesa, Lesa wa bene Isilaeli, ncecipansha cabo kweelana aMwaami Lesa mwiine mbwaakabashomesha.

Cishi cakapekwa bene Lubeni

¹⁵ Mpomunyaawo Mose wakapa bene Lubeni cishi cimwi kweelana ashipani shabo ayi ncinebo.

¹⁶ Cishi cabo cakalinga kutalikila kuAlowa, mweela Cinyika ca Anoni, alimwi andabala inene ili pakati ka cinyika ico pantu pomwi acitunta coonse cishingulukite Medeba.

¹⁷ Cishi ico kubika aEshiboni alimwi amandabala anene oonse ali pacitunta mukati, nkokwaamba ayi Diboni, Bamoti Baali, Beti Baalimeyoni,

¹⁸ Jaasi, Kedemoti, Mefaati,

¹⁹ Kilyataimu, Sibuma, Seleti Shaya pakalundu kaniini mucinyika,

²⁰ Beti Peyo, inkunamo sha Kalundu ka Pisiga alimwi a Beti Jeshimoti.

²¹ Mwakalinga amandabala anene oonse pacitunta alimwi acishi coonse ca mwaami Sioni wa bene Amoli, uyo wakalinga kulela kuEshiboni. Ncakwiila Mose wakamukoma alimwi abamaami bene Midyani, nkokwaamba ayi nguEfi, Lekemu, Suli, Ulu alimwi aLeba. Boonse aba bakalinga kweendelesheshako mwaami Sioni cishi.

²² Pabantu abo bene Isilaeli mbobakacaya, pakalinga shikulotela Balaamu, mwanaakwe Beyo.

²³ Anu Mulonga wa Joodani wakalinga njenyinsa ya cishi ca bene Lubeni kulubasu lwakumbo. Mandabala anene ayo alimwi amishi ya ngawo shakapekwa kubene Lubeni ayi nshinebo kweelana ashipani shabo.

Cishi cakapekwa bene Gadi

²⁴ Ono Mose wakapa bene Gadi cishi cimwi kweelana ashipani shabo ayi ncinebo.

²⁵ Cishi cabo cakalinga nguJasa, mandabala anene oonse a muGilyadi, musa wa cishi ca Amoni kuya mukushika kuAlowa pafwaafwi aLaba.

²⁶ Cakalinga kuswa kuEshiboni kuya kuLamati Misipa alimwi aBetonimu, akuswa kuMaanaimu kuya mukushika akunyinsa ya Lodeba.

²⁷ MuCinyika ca Joodani nindabala ya Beti Alamu, Beti Nimula, Sakoti alimwi aSafoni pantu pomwi alubasu lwakacalaako lwa cishi ca mwaami Sioni wa kuEshiboni. Nyinsa yabo kulubasu lwakumbo nguMulonga wa Joodani kuya mukushika akumatwa lya Lweenge lwa Galili.

²⁸ Mandabala anene ayo alimwi amishi ya ngawo shakapekwa kubene Gadi ayi nshinebo kweelana ashipani shabo.

Cishi cakapekwa musa wa mukowa wakwe Manase

²⁹ Mpeeke Mose wakapa musa wa mukowa wakwe Manase cishi cimwi kweelana ashipani shabo ayi ncinebo.

³⁰ Cishi cabo cakalinga kutalikila kuMaanaimu kubikaawo acishi coonse ca Bashani, buleelo boonse bwa mwaami Ogi wa kuBashani pantu pomwi amishi yoonse ili makumi osanwe awomwi ya kuJeya muBashani.

³¹ Mucishi cabo mwakalinga amusa wa Gilyadi pantu pomwi aAshitaloti alimwi aEdileyi, ayo akalinga ngomandabala anene a mwaami Ogi wa kuBashani. Cishi coonse ici cakapekwa kumusa wa bamulunyungu lwakwe Makiya mwanaakwe Manase.

³² Anu mboboobo Mose mbwaakabaanya cishi cakalinga kwicwe lya Jeliko alimwi aMulonga wa Joodani ndyaakalinga mushinyika sha Moabu.

³³ Ono Mose taakwe kupawo mukowa wa bene Lefi cishi ayi cibe cinebo mukwiinga balo cipansha cabo nguMwaami Lesa, Lesa wa bene Isilaeli, kweelana aMwaami Lesa mbwaakabashomesha mwiine.