Joni 8 - Baibo Busansulushi Bwa Libuku Ili

Mwanakashi wakacatwa bulale

¹ Lyalo Jesu wakaya kuKalundu ka Olifi.

² Ono macuunsacuunsa wakaboolela kuŊanda yakwe Lesa akwinjila mukati. Bantu baanji bakayoboloka akubungana kuli nguwe, lyalo wakekala panshi akutalika kubeeisha.

³ Mpomunyaawo bafundishi ba Milawo abaFalisi bakenjisha mwanakashi ngobakacata kaacita bulale akumwiimika pakati kabo.

⁴ Lyalo bakaambila Jesu ayi, “Bafundishi, uyu mwanakashi wakacatwa kaacita bulale.

⁵ Ono kweelana aMilawo yakatupa Mose banakashi ba mbuli wooyu balyeelete kucaikwa amabwe. Ino mwebo mutokwaambaawo buyani pacikani ici?”

⁶ Bakeepusha bobulya kwaamba ayi babone pakumupeta mulandu. Sombi Jesu wakakotama akutalika kulemba panshi amunwe.

⁷ Lyalo ndibakatolelela kumwiipusha wakakotamuka akubaambila ayi, “Uyo woonse utakwe kubishaawo pakati kanu, ataangune kumuuma libwe.”

⁸ Mpeeke wakakotama alimwi akulemba panshi.

⁹ Ndibakanyumfwa boobo, bakatalika kuswa womwi womwi, kutalikila kubamanene, kushikila Jesu wacaalabo eenka amwanakashi uyo kaaimfwi peenkaapo.

¹⁰ Jesu wakakotamuka akwiipusha mwanakashi uyo ayi, “Omwanakashi, ino mbali bakuleta? Sa taaku nabi womwi wakupa mulandu?”

¹¹ Mwanakashi uyo wakakumbula ayi, “Taakuuwo Nkambo.” Lyalo Jesu wakaamba ayi, “Anu anebo teshi nkupeewo mulandu. Ono koya, utakacitiiwo cibiibi alimwi!”]

Jesu ngomumuni wa bantu boonse

¹² Jesu wakaambila baFalisi alimwi ayi, “Ndi mumuni umunikila bantu boonse. Uyo woonse unkonkela teshi akeende mumunshinshe napaceyi, sombi ulaakuba amumuni upa buumi.”

¹³ BaFalisi bakamwaambila ayi, “Ubo mbootokwaamba utoolyaambilila, aboobo bukamboni bwako taaku mbobubete.”

¹⁴ Jesu wakakumbula ayi, “Nakubi kwaamba ayi ntoolyaambilila nemwiine, bukamboni bwangu mbwalushinisho mukwiinga ndishiiko nkondakaswa alimwi ankootooya. Sombi mwebo tamwishiiko nkondakaswa ankoontooya.

¹⁵ Mwebo muloombolosha muntu kwiinda mubuntu, sombi nebo nshoomboloshi muntu nabi womwi.

¹⁶ Na ndoombolosha, koombolosha kwangu kuliluleme mukwiinga nshibete neenka, sombi ndyaabaTa abo bakantuma.

¹⁷ MuMilawo yanu mulilembetwe ayi bukamboni bwa bantu bobilo mbwalushinisho.

¹⁸ Ee, ndalicitila bukamboni nemwiine, sombi abalo baTa bakantuma balancitila bukamboni.”

¹⁹ Lyalo bakamwiipusha ayi, “Ino baiso bali kuli?” Jesu wakabakumbula ayi, “Nebo tamwinshi, abaTa tamubeshi. Naakwiinga mwalinga kwishi ndime, abaTa nemwalinga kubeshi.”

²⁰ Jesu wakaamba maswi aya kaali muŊanda yakwe Lesa pafwaafwi amusena pakalinga kubikwa shipo. Sombi taaku wakamucata mukwiinga ciindi cakwe kacitana kushikila.

Jesu mbwaakaamba shakuya kwakwe

²¹ Lyalo Jesu wakaboshaawo kwaamba ayi, “Nebo ntooya, mulaakunangoola, sombi mulaakufwabo mushibiibi shanu. Uko nkoontooya, mwebo inga tamushikiiko.”

²² Paceebo ceeco bamaloba ba baJuda bakatalika kwiipushanya ayi, “Sa nkokwaamba ayi utooya mukulicaya? Ncaatokwaambila ayi, ‘Uko nkoontooya, mwebo tamukoonshi kushikaako.’ ”

²³ Sombi Jesu wakatolelela kubaambila ayi, “Mwebo muli ba panshi pano, nebo ndi wa kwiculu. Mwebo muli ba mucishi ca panshi, sombi nebo nshishi wa mucishi cino, sobwe.

²⁴ Ncendamulwiitila ayi, ‘Mulaakufwabo mushibiibi shanu.’ Na mubule kushoma ayi ndime wooyo ngoontoolyaamba, ncakwiila mulaakufwabo mushibiibi shanu.”

²⁵ Mpomunyaawo bakeepusha Jesu ayi, “Ino ndiwaani?” Jesu wakakumbula ayi, “Ndime wooyo ngoontoomulwiita kuswabo kumatalikilo.

²⁶ Ndicite makani aanji akwaamba, ngeenga ndamoombolosheshaawo, sombi uyo wakantuma ulashomeka alimwi shoonse nshindakanyumfwa kuli nguwe, nshesheesho nshendwiita bantu boonse.”

²⁷ Ono tabakwe kunyumfwa kwaamba ayi utoobalwiita shabaIshi.

²⁸ Aboobo Jesu wakabaambila ayi, “Mwaakwaanjika MwanaaMuntu, ndyeshi mukashibe ayi ndime wooyo ngoontoolyaamba alimwi mulaakwishiba ayi taaku nceencita palwaangu, sombi ndaambabo sheesho shakanjiisha baTa.

²⁹ Uyo wakantuma uli anebo, taakwe kunshiya neenka mukwiinga lyoonse ndacita shimukondelesha.”

³⁰ Ndibakanyumfwa makani aya, bantu baanji bakashoma muli nguwe.

Shabantu baangulukite abasha

³¹ Jesu wakaambila baJuda bakamushoma ayi, “Na mukonkele kwiisha kwangu, ncakwiila mutooba bashikwiiya bangu.

³² Lyalo mulaakwishiba lushinisho, alwalo lushinisho ulo lulaakumwaangulula.”

³³ Balo bakaamba ayi, “Swebo tuli bana bakwe Abulaamu alimwi tatukwe kubaawo kale basha ba muntu uli woonse. Ino inga mwaamba buyani ayi tulaakwaangululwa?”

³⁴ Jesu wakabakumbula ayi, “Ntoomulwiita calushinisho ayi uyo woonse ubisha ngumusha wa cibiibi.

³⁵ Ono musha taakalilili muŋanda ya mwaami wakwe lyoonse, sombi mwaana wa muŋanda.

³⁶ Aboobo na Mwaana wamwaangulula, ingayi mwaangululwa cancinencine.

³⁷ Ndishi kwaamba ayi muli bana bakwe Abulaamu. Nakubi boobo mutoopinga kuncaya mukwiinga maswi angu taanjili mumyoyo yanu.

³⁸ Nebo ndaamba shintu nshindakabona kuli baTa, sombi mwebo mulacita shintu nshemwakanyumfwa kuli ishiwanu.”

³⁹ Balo bakakumbula ayi, “Tuli bana bakwe Abulaamu.” Lyalo Jesu wakabaambila ayi, “Nemwalinga bana bakwe Abulaamu nemwalinga kucita shintu nshaakalinga kucita lakwe.

⁴⁰ Ono mpaapa mutoopinga kuncaya nebo nendamwaambila makani alushinisho ngondakanyumfwa kuli Lesa. Abulaamu taakwe kucitawo shintu sha mushobo uyu, sobwe.

⁴¹ Mwebo mutoocita shintu shakwe ishiwanu nobeene.” Mpomunyaawo balo bakamwaambila ayi, “Tatwishi baana ba mubulale. Tulicitebo ishiwesu womwibo ndondoli, Lesa.”

⁴² Jesu wakabaambila ayi, “Lesa naalinga Ishiwanu naakwiinga kamunsuni mukwiinga ndakesa kokuno kuswa kuli Lesa. Nshikwe kwisabo mukusuna kwangu, sombi nguLesa wakantuma.

⁴³ Ino nceebonshi ncemutoobulila kunyumfwa nshentokwaamba? Sa te nceebo cakwaamba ayi tamusuni kunyumfwa maswi angu?

⁴⁴ Mwebo muli kulubasu lwakwe ishiwanu Satana, aboobo mulisuni kucita sheesho shisuni ishiwanu. Lakwe wakalinga mucayi kuswa kumatalikilo. Taana kucitawo kale shalushinisho mukwiinga muli nguwe taamu lushinisho. Na waamba sha bubeshi ingayi waamba mbwaabete mukwiinga ngumubeshi alimwi ngoishi wa bubeshi.

⁴⁵ Sombi nebo ndaamba shalushinisho paceebo ceeco tamusuni kunshoma.

⁴⁶ Ngani pakati kanu apa weenga wanshinina ayi ndakabisha? Taakuuwo. Ono na ntokwaamba calushinisho ceebonshi tamutoonshoma?

⁴⁷ Mukwiinga uyo woonse uli muli Lesa ulanyumfwa shaamba Lesa. Aboobo mwebo ncemutanyumfwili ceebo tamubete muli Lesa.”

Jesu mbwaakaamba shakwe Abulaamu

⁴⁸ Mpomunyaawo baJuda bakamwiipusha ayi, “Sa tatukwe kwaamba calushinisho nditwalinga twaamba ayi uli mwine Samaliya alimwi ayi ulicite shikaswa?”

⁴⁹ Jesu wakakumbula ayi, “Nshicite shikaswa, sobwe. Ndalemeka baTa, sombi mwebo mulanyansha.

⁵⁰ Nebo nshitoolipa bulemu nemwiine, sombi nkwaali umpa bulemu uyo ngweshi akoomboloshe.

⁵¹ Ntoomulwiita calushinisho ayi uyo woonse ucita bwaamba maswi angu teshi akafwewo.”

⁵² Mpomunyaawo bakamwaambila ayi, “Ono twashinisha ayi ulicite shikaswa. Mukwiinga Abulaamu abalaluki bakafwa. Ono webo inga waamba buyani ayi na muntu uli woonse

⁵³ wacita bwaamba maswi angu teshi akafwewo. Sa webo uli munene kwiinda ishiwesu Abulaamu nabi balaluki bakafwa? Anu utooyeeya ayi ndiwaani?”

⁵⁴ Jesu wakakumbula ayi, “Ono na ntoolipa bulemu nemwiine, ingayi bulemu bwangu taaku mbobubete. Nebo mbaTa abo beenka mbomwaamba ayi ngoLesa wanu, mbobampa bulemu.

⁵⁵ Nakubi kwaamba ayi mwebo tamumwishi, nebo ndimwishi alimwi na ndaamba ayi nshimwishi, nkokwaamba ayi ndaba mubeshi bweenka mbuli ndimwe. Ono nebo ndimwishi alimwi ndacita bwaamba liswi lyakwe.

⁵⁶ Ishiwanu Abulaamu wakasangalala kwaamba ayi ulaakubona bushiku bwakwisa kwangu, ncakwiila wakabubona alimwi wakakondwa.”

⁵⁷ Mpeeke baJuda bakaamba ayi, “Webo toona kukwanisha amyaaka makumi osanwe inga waamba buyani ayi wakamubona Abulaamu?”

⁵⁸ “Ntoomulwiita calushinisho ayi Abulaamu kaatana kushalwa, nebo kaandiiko kale.”

⁵⁹ Lyalo ingayi banyumfwe boobo bakabwesa mabwe ayi baume Jesu, sombi wakabayuba akuloboka kuswa muŊanda yakwe Lesa.