Joni 7 - Baibo Busansulushi Bwa Libuku Ili

Jesu abanandumi shakwe

¹ Kuswawaawo Jesu wakalinga kweendabo mucishi ca Galili. Taakalinga kusuni kuya mucishi ca Judeya mukwiinga bamaloba ba baJuda bakalinga kuyanda kumucaya.

² Ono ciindi cakusekelela kwa baJuda ca Shimpaka cakalinga pafwaafwi.

³ Aboobo banandumi shakwe bakamwaambila ayi, “Swaako kuno uye kuJudeya kwaamba ayi bashikwiiya bako bakabone shaankamiko nshoocita.

⁴ Taaku muntu ushisa ncaatoocita na kaasuni kupuka. Ono kweelana ambootoocita anu leka bantu boonse bakwishibe!”

⁵ (Banandumi shakwe bakaamba boobo ceebo abalo tebakalinga kumushoma.)

⁶ Jesu wakabaambila ayi, “Ciindi cangu ceelete tacina kushikila, sombi mwebo ciindi cili coonse cili kabotu.

⁷ Mwebo bantu ba mucishi ca panshi tabamupatiteewo, sombi nebo balimpatite mukwiinga lyoonse ndabaambila ayi micito yabo njibiibi.

⁸ Anu mwebo kamuya mukusekelela uko, nebo teshi njeeko mukwiinga ciindi cangu ceelete tacina kushikila.”

⁹ Ndyaakamana kwaamba boobo, wakacaala muGalili.

Jesu mbwaakaya kulibungano lya kusekelela kwa Shimpaka

¹⁰ Banandumi shakwe ndibakaya mukusekelela, Jesu alakwe wakaya, kaaya ciyubayuba.

¹¹ Ndibakalinga kusekelela uko, bamaloba ba baJuda bakalinga kuyandoola Jesu kabaamba ayi, “Anu uli kuli?”

¹² Mpeeke palya pakalinga shakuŋuŋuna shiinji pali nguwe. Bamwi bantu bakalinga kwaamba ayi, “Ngumuntu kabotu.” Ingayi bamwi ayi, “Sobwe, utoolubya bantu.”

¹³ Sombi taaku wakaamba pali Jesu pameenso a bantu ceebo ca kuloonda bamaloba ba baJuda.

¹⁴ Kusekelela ndikwakashika pakati napakati, Jesu wakaya kuŊanda yakwe Lesa akutalika kwiisha.

¹⁵ Bamaloba ba baJuda bakakankamana abuumbi akwaamba ayi, “Ino muntu uyu ulishi buyani shintu shoonse ishi nabi taana kuyaawo amukushiiya.”

¹⁶ Jesu wakakumbula ayi, “Kwiisha uku teshi kwangu, sobwe, sombi kulaswa kuli baTa abo bakantuma.

¹⁷ Aboobo uyo woonse usuni kucita buyanda Lesa, ulaakwishiba na kwiisha kwangu uku kulaswa kuli Lesa nabi kuli ndime nemwiine.

¹⁸ Muntu waambabo shaakwe ulisuni kulemekwa mwiine. Sombi uyo usuni kwaamba ayi uyo wakamutuma alemekwe, ngooshomeka alimwi taamu bubeshi muli nguwe.

¹⁹ Te Mose wakamupa Milawo? Ono taaku muntu nabi womwi pakati kanu ukonkela Milawo iyo. Ceebonshi mutooyanda kuncaya?”

²⁰ Bantu baanji bakakumbula ayi, “Ulicite shikaswa webo! Ngani utooyanda kukucaya?”

²¹ Jesu wakakumbula ayi, “Ndakacita caankamiko comwi, noonse mwakakankamana.

²² Mose wakamupa mulawo ayi munoopalula bana banu basankwa (nabi tookwe kuswa kuli Mose, sombi wakaswa kubakulukulu) aboobo mulapalula mwaana musankwa pabushiku bwakookesha bwa Cibelu.

²³ Ino ono na mwaana musankwa ulapalulwa pabushiku bwakookesha kwaamba ayi mulawo wakwe Mose utatyolwi, inga mwankalalila buyani mukwiinga ndashilika mubili wa muntu woonse pabushiku bwa Cibelu?

²⁴ Amucileeke koombolosha kwiinda mukulanga muntu mbwaabete, mutalike koombolosha kweelana amulandu mboobete.”

Sa Jesu ngoUsalitwe wakwe Lesa?

²⁵ Mpomunyaawo bantu bamwi ba kuJelusalemu bakeepusha ayi, “Sa uyu teshi ngowooyu beendeleshi ngobatooyanda kucaya?

²⁶ Amubone ngooyu utokwaamba patuba alimwi taaku ancebatokwaambaawo. Sa nkokwaamba ayi aba bantu balishi ayi ngoUsalitwe wakwe Lesa?

²⁷ Sombi swebo tulishiiko uyu muntu nkwaaswa. Ono Usalitwe wakwe Lesa ndyeshi akese, taaku ngweshi akashibe nkweshi akaswe.”

²⁸ Mpomunyaawo Jesu kaaciisha muŊanda yakwe Lesa wakoolobesha ayi, “Ee, mulinshi! Ankondakaswa koonse mulishiiko. Sombi nshikwe kwisabo palwaangu, sobwe. Uyo wakantuma ulashomeka, ono mwebo tamumwishi.

²⁹ Nebo ndimwishi mukwiinga ndakaswa kuli nguwe alimwi ngowakantuma.”

³⁰ Ingayi banyumfwe boobo bakeelesha kumucata, sombi taaku wakacikonsha mukwiinga ciindi cakwe kacitana kushikila.

³¹ Nakubi boobo bantu baanji mulikoto lilya bakashoma muli Jesu, bakaamba ayi, “Na akese Usalitwe wakwe Lesa, sa ulaakucita shaankamiko kwiinda sheeshi nshaacita muntu uyu?”

Mbobakatuma bantu mukucata Jesu

³² Mpomunyaawo baFalisi bakanyumfwa bantu kabaŋuŋuna makani aya pali Jesu. Lyalo baFalisi abamatanjilili ba bapailishi bakatuma beshikulindilila kuŊanda yakwe Lesa ayi bakacate Jesu.

³³ Jesu wakaamba ayi, “Ndanooli amwebo kwa ciindi ciniinibo kaantana kuya kuli wooyo wakantuma.

³⁴ Ono mulaakunangoola, sombi teshi mukancane alimwi uko nkweshi nkanoobete teshi mukashikeeko.”

³⁵ Mpeeke baJuda bakatalika kulyaamboosha beene ayi, “Ino nkuli nkwaatooyanda kuya uyu muntu uko nkweshi tukabule kumucana? Sa utooyanda kuya kubamakwabesu abo bakapalanganina kubaGiliki akwiisha baGiliki?

³⁶ Ino nciinshi ncaalinga kwaamba ndyaamba ayi, ‘Mulaakunangoola, sombi teshi mukancane,’ aceeco ncaamba ayi, ‘Uko nkweshi nkabe mwebo inga tamukoonshi kushikaako?’ ”

Tulonga twa maanshi apa buumi

³⁷ Pabushiku bwakweelaako, bushiku bunene kwiinda nshiku shoonse shamukusekelela uko, Jesu wakanyamuka woolobesha ayi, “Na kuli muntu unyumfwite nyotwa ese kuli ndime anwe.

³⁸ Kweelana ambokulembetwe muMalembo akwe Lesa ayi, ‘Uyo woonse ushoma muli ndime tulonga twa maanshi apa buumi butamaani tulaakukunka kuswa mumoyo wakwe.’ ”

³⁹ Ndyaakaamba boobo, wakalinga kwaamba Mushimu Usalashi uyo ngweshi bakatambule abo boonse bashoma muli nguwe. Paciindi ico kabatana kutambula Mushimu Usalashi mukwiinga Jesu kaatana kwinjila mubulemu bwakwe.

Bantu mbobakapansaana

⁴⁰ Bamwi bantu ndibakanyumfwa maswi akwe aya, bakaamba ayi, “Uyu muntu ncakwiila ngomulaluki ulya!”

⁴¹ Bamwi bakaamba ayi, “Uyu muntu ngoUsalitwe wakwe Lesa,” sombi bamwi bakalinga kwiipusha ayi, “Sa Usalitwe wakwe Lesa ulaakuswa kuGalili?

⁴² Sa Malembo akwe Lesa taambi ayi, ‘Usalitwe wakwe Lesa ulaakuswa mulunyungu lwakwe Defedi alimwi ulaakushalilwa mundabala ya Betileemu umo mwakalinga kwikala mwaami Defedi?’ ”

⁴³ Paceebo ceeco bantu bakapansaana ceebo cakwe Jesu.

⁴⁴ Bamwi bakalinga kusuni kumucata, sombi bakaalilwa.

Shakutashoma kwa bamaloba ba baJuda

⁴⁵ Ono beshikulindilila kuŊanda yakwe Lesa ndibakaboola kubamatanjilili ba bapailishi abaFalisi abo bakabeepusha ayi, “Tamukwe kumuletelanshi?”

⁴⁶ Balo bakakumbula ayi, “Tatuna kubonaawo kale muntu waamba mbuli woolya, sobwe.”

⁴⁷ Sombi baFalisi bakaamba ayi, “Ono ubo wamubeca kale amwebo.

⁴⁸ Sa mulishiwo mweendeleshi pakati kesu nabi muFalisi wakashoma muli nguwe? Taakuuwo!

⁴⁹ Sombi bantu abo bateshi Milawo yakwe Mose, Lesa wabashinganya kale.”

⁵⁰ Mpomunyaawo Nikodemasi, wakalinga waya kuli Jesu lutaanshi, womwi wa mulikoto lyabo wakabeepusha ayi,

⁵¹ “Sa Milawo yesu ilasuminisha kupa mulandu muntu kaatana koomboloshekwa akwishiba ncaacita?”

⁵² Balo bakamukumbula ayi, “Sa awebo uli wa kuGalili? Calula muMalembo akwe Lesa, utoocana kwaamba ayi taaku mulaluki uswa kuGalili.” [

⁵³ Mpeeke boonse bakoonduluka kuya kumaandaabo.