Joni 21 - Baibo Busansulushi Bwa Libuku Ili

Jesu mbwaakaboneka kubashikwiiya bosanwe abobilo

¹ Kuswawaawo Jesu wakaboneka alimwi kubashikwiiya kuLweenge lwa Tibelyasi. Ono mbulya mbocakalinga.

² Simoni Pita, Tomasi wiitwa ayi Mpuundu, Natanaelo wa kundabala ya Kana muGalili, bana bakwe Sebedi abashikwiiya bamwi bobilo, boonse bakalinga kubungene pantu pomwi.

³ Simoni Pita wakaambila bashikwiiya bamwi ayi, “Ntooya mukucaya nswi.” Balo bakakumbula ayi, “Tutooya soonse.” Aboobo bakanyamuka baya abwaato. Nakubi boobo taaku nswi nshibakacaya mashiku oonse ayo.

⁴ Ndibwakaca, Jesu wakeemikana kuloombe lwa lweenge, sombi bashikwiiya bakwe tabakwe kumwishiba.

⁵ Lyalo wakabeepusha ayi, “Mwebo basaankwa, sa mwacayaawo?” Balo bakamukumbula ayi, “Tau, tatukwe kucayaawo.”

⁶ Mpomunyaawo wakabaambila ayi, “Amuwaale koombe kululyo lwa bwaato, mulacaya.” Aboobo bakakawaala kulubasu ulo. Mpeeke bakaalilwa kukakwelela mubwaato ceebo mwakacatwa nswi shiinji abuumbi.

⁷ Lyalo shikwiiya uyo Jesu ngwaakalinga kusunishi wakaambila Pita ayi, “MBaami!” Pita ndyaakanyumfwa ayi mBaami, wakafwala cakufwala cakwe ca peculu (ceebo wakalinga wacipa) akuliwaala mumaanshi.

⁸ Balo bashikwiiya bamwi bakacaala mubwaato kabaya bukwela koombe kakalinga kuswite nswi. Tebakalinga kulaale aloombe, pakalingabo mpashi ntaamwa mwaanda.

⁹ Ndibakashika petala bakabona mulilo wa makalangasha, kapayokwa nswi alimwi palubasu bulya pakalinga shinkwa.

¹⁰ Lyalo Jesu wakaamba ayi, “Amulete nswi shimwi nshimwaswa mukucaya.”

¹¹ Mpomunyaawo Simoni Pita wakenjila mubwaato akukwelela koombe petala, kakaswite nswi shinene shinene mwaanda amakumi osanwe alimwi ashotatwe. Nakubi kwaamba ayi shakafula boobo, koombe takakwe kupasuka.

¹² Mpeeke Jesu wakabaambila ayi, “Kamwisa tulye.” Pabashikwiiya boonse, taaku wakayeeya kwiipusha ayi, “Anu ndimwe baani?” Ceebo bakeshiba ayi nguMwaami.

¹³ Aboobo Jesu wakabwesa shinkwa akubaabila. Ashalo nswi isho wakacita mbomunya ubo.

¹⁴ Linkanda ili lyakaba ndyatatu Jesu kuboneka kubashikwiiya bakwe kuswa bushiku mbwaakabushikwa kuswa kubafu.

Jesu mbwaakeepusha Pita

¹⁵ Ndibakamana kulya, Jesu wakeepusha Pita ayi, “Simoni omwanaakwe Joni, sa ulinsuni kwiinda mbobansuni boonse aba?” Pita wakakumbula ayi, “Ee Nkambo, mulishi kwaamba ayi ndimusuni.” Jesu wakamwaambila ayi, “Kosanina mbelele shangu shaana.”

¹⁶ Jesu wakeepusha Pita lwabili ayi, “Simoni omwanaakwe Joni, sa ulinsuni?” Alakwe wakakumbula ayi, “Ee Nkambo, mulishi kwaamba ayi ndimusuni.” Lyalo Jesu wakamwaambila ayi, “Kweembela mbelele shangu.”

¹⁷ Jesu wakeepusha lyatatu ayi, “Simoni omwanaakwe Joni, sa ulinsuni?” Mpomunyaawo Pita wakoongumana mukwiinga Jesu wakamwiipusha lyatatu ayi, “Sa ulinsuni?” Lyalo wakaamba ayi, “Nkambo, mwebo mulishi shintu shoonse nkokwaamba ayi mulishi ayi ndimusuni!” Jesu wakamwaambila alimwi ayi, “Kosanina mbelele shangu.

¹⁸ Ntookulwiita calushinisho ayi, ndiwakalinga mwanike wakalinga kufwala omwiine akuya nkowakalinga kusuni. Ono waakucembela ulaakutandabikabo maansa, lyalo muntu umwi ulaakukufwalika akukutola nkootasuni.”

¹⁹ (Mukwaamba boobo Jesu wakalinga kutondesha lufu lweshi lukafwe Pita akuletela bulemu Lesa.) Lyalo wakaambila Pita ayi, “Nkonkele!”

Jesu ashikwiiya umwi

²⁰ Pita ndyaakacebukila kwisule, wakabona shikwiiya uyo Jesu ngwaakalinga kusunishi keesa, shikwiiya uyu ngowooyo wakayaamina Jesu pabushiku ndibakalinga kulya mulalilo alimwi akwiipusha ayi, “Ngani eshi amwaabe noBaami?”

²¹ Ndyaakamubona, Pita wakeepusha Jesu ayi, “Nkambo, ino alakwe musankwa uyu, mbuyani?”

²² Jesu wakakumbula ayi, “Ino na kaansuni kwaamba ayi uyu anoolibo muumi kushikila nkese, sa ngumulandu wako uyo? Nkonkelebo!”

²³ Aboobo mpuwo yakanyumfwika kubashoma muli Jesu boonse ayi shikwiiya uyo teshi akafwe. Sombi Jesu taakwe kwaamba ayi teshi akafwe, sobwe. Wakaamba ayi, “Ino na kaansuni kwaamba ayi uyu anoolibo muumi kushikila nkese, sa ngumulandu wako uyo?”

²⁴ Shikwiiya uyo ngowakapa bukamboni pashintu ishi alimwi ngowakashilemba. Aboobo tulishi kwaamba ayi bukamboni bwakwe mbwalushinisho.

Cakweelaako

²⁵ Ono nkoshili ashimwi shiinji isho Jesu nshaakacita. Nicakaba cakulemba shoonse neenga mabuku ashini akalembwe abula musena mucishi ca panshi.