Joni 16 - Baibo Busansulushi Bwa Libuku Ili

¹ “Ndamulwiita makani aya kwaamba ayi mutakacileeki kushoma.

² Balaakumutanda mushoonde shabo. Ono ciindi cilaakushika bantu beshi bakanoomucaya, ndyeshi bakayeeye ayi batoosebensela Lesa.

³ Balaakucita boobo mukwiinga tababeshi baTa anebo tabenshi.

⁴ Sombi ndamulwiitila limwi shintu ishi ayi ciindi caakushikila mukeebaluke ayi ndakamulwiitaawo kale. “Kumatalikilo nshikwe kumulwiitila limwi makani aya ceebo ndakalingaanu.

Milimo ya Mushimu Usalashi

⁵ Bulya ntooya kuli wooyo wakantuma, nakubi boobo taakuuwo nabi womwi pakati kanu utoonjipusha nkoontooya.

⁶ Myoyo yanu yoongumana ceebo ndamulwiita makani aya.

⁷ Ntoomulwiita calushinisho ayi ncibotu abuumbi kuli ndimwe kwaamba ayi nje. Mukwiinga na mbule kuya Mucafwi teshi akese kuli ndimwe. Sombi na nje, ndaakumutuma kuli ndimwe.

⁸ Lyalo aakwisa Mucafwi uyo, ulaakushinina bamucishi shakubisha, shabululami alimwi ashaboomboloshi bwakwe Lesa.

⁹ Ulaakubashinina pacikani cakubisha ceebo tabashomi muli ndime.

¹⁰ Ulaakubashinina pacikani ca bululami ceebo ntooya kuli baTa, uko nkweshi mukabule kumbona alimwi.

¹¹ Ulaakubashinina pacikani ca boomboloshi mukwiinga Satana muleli wa pacishi ca panshi woomboloshekwa kale.

¹² “Ndicite maswi akumwaambila aanji, sombi inga tamwaatambuli cakusangalala pacecino ciindi.

¹³ Ono Mushimu wiisha lushinisho pakwisa, lyalo ulaakumutanjilila mushintu shoonse shalushinisho. Ceebo teshi akaambe shaakwe mwiine, sombi ulaakusansulula sheesho nshaakanyumfwa kuli baTa alimwi akumulwiita shintu nsheshi shikese kunembo.

¹⁴ Ulaakundetela bulemu mukwiinga ulaakubwesa maswi angu akumusansulwita.

¹⁵ Shoonse sha baTa nshaangu. Nceceeco ncendaambila ayi Mushimu ulaakubwesu maswi angu akumusansulwita.

Buumba alimwi akusangalala

¹⁶ “Muciindi ciniini citoosa teshi mukamboneewo, sombi paakwiinda acimwi ciindi ciniini, mulaakumbona.”

¹⁷ Mpomunyaawo bashikwiiya bakwe bamwi bakatalika kwiipushanya ayi, “Anu cikani ici cilaambanshi? Batootwaambila ayi, ‘Muciindi ciniini citoosa teshi mukamboneewo, sombi paakwiinda acimwi ciindi ciniini mulaakumbona.’ Peculu lya waawo baamba ayi, ‘Mukwiinga ntooya kuli baTa.’

¹⁸ Anu maswi aya akwaamba ayi, ‘Muciindi ciniini’ alaambanshi? Tatucishi ncebatokwaamba.”

¹⁹ Jesu wakeshiba ayi batooyanda kumwiipusha, aboobo wakabaambila ayi, “Sa mutokwiipushanya pacikani ncendaamba ayi, ‘Muciindi ciniini citoosa teshi mukamboneewo, sombi paakwiinda acimwi ciindi ciniini mulaakumbona?’

²⁰ Ntoomulwiita calushinisho ayi mwebo mulaakulila akuungumana, sombi bamucishi balaakusangalala. Mulaakuungumana, sombi kuungumana kwanu kulaakuba kusangalala.

²¹ Na walutundu uli pakati mumala mwabuka, ulapenshekwa ceebo ciindi cakupenga kwakwe cashikila. Sombi na wapulukaamo ulalubaako akupenga kwakwe ceebo ulasangalala ayi mwaana washalwa mucishi.

²² Amwebo mbweeke ubo, bulya mulyuungumene mumyoyo. Sombi ndaakumubona alimwi, lyalo mulaakusangalala abuumbi. Kusangalala uko, taaku muntu eshi akakukusheewo pali ndimwe.

²³ “Pabushiku ubo taaku nceshi mukansenge. Ntoomulwiita calushinisho ayi baTa balaakumupa cili coonse nceshi mukasenge muliina lyangu.

²⁴ Kushikila asunu, tamuna kusengaawo kale muliina lyangu. Ono kamusenga, munanootambula kwaamba ayi musangalale cancinencine.

Jesu mbwaakakoma bubi bwa mucishi ca panshi

²⁵ “Ndamwaambila shintu ishi mumapinda. Nakubi boobo ciindi cilaakushika ndyeshi nkabule kwaambila mumapinda, sombi ndaakumusansulwita cakutashisa shapali baTa.

²⁶ Pabushiku ubo, mulaakusenga muliina lyangu. Nshintokwaamba ayi ndaakumusengelaako kuli baTa

²⁷ ceebo baTa beene balimusuni. Balimusuni ceebo mulinsuni alimwi mwakashoma ayi ndakaswa kuli Lesa.

²⁸ Ncakwiila ndakaswa kuli baTa akwisa mucishi ca panshi, alimwi bulya ntooswa mucishi akuboolela kuli baTa.”

²⁹ Lyalo bashikwiiya bakwe bakaamba ayi, “Ncakwiila ono mutokwaamba cakutashisa tamutokwaambila mumapinda.

³⁰ Ono tweshiiba ayi mulishi shintu shoonse alimwi taakuuwo aceebo muntu nceenga wamwiipushisha. Aboobo twashooma ayi mwakaswa kuli Lesa.”

³¹ Jesu wakabeepusha ayi, “Sa mwashooma ono?

³² Ciindi cilaakushikila, ncakwiila cashikila kale cakupalanganishikwa kuya mwanu mwanu. Lyalo mulaakunshiyabo neenka. Sombi nshibete neenka mukwiinga baTa bali anebo lyoonse.

³³ Ndamwaambila makani aya kwaamba ayi mube aluumuno mukushoma muli ndime. Mucishi ca panshi mulaakupenshekwa. Nakubi boobo amukalike myoyo, bubi bwa mucishi cino ndabukoma.”