Jona 2 - Baibo Busansulushi Bwa Libuku Ili

Jona mbwaakapaila

¹ Mpeeke mukati munswi, Jona wakapaila kuMwaami Lesa wakwe ayi,

² “NoBaami baLesa, mumapensho angu, ndakapaila kuli ndimwe alimwi mwakanyumfwa. Kuswa mwiine mumusena wa bafu ndakasenga lucafwo, alimwi mwakanyumfwa kusenga kwangu.

³ Mwakangwaala mulweenge, panshi peene pamaanshi. Lyalo mukuuku wakanshinguluka, maaba anu oonse akamfwekelesha.

⁴ Ndakaamba ayi, ‘Ndatandaanishikwa pameenso anu, nakubi boobo, ndaakulangilisha alimwi kuŊanda yanu isalalite.’

⁵ Maanshi ayo akamfwekelesha akanoondesha, lweenge lwakanshinguluka, acitolo cakampombela kumutwi.

⁶ Ndakepila panshi peene patalikila tulundu, mumusena uli anga nintolongo yamuyayaya. Sombi noBaami baLesa bangu, mwakankusha mumusena wa bafu.

⁷ “Ndindakanyumfwa ayi ntooya citula moyo, ndakapaila kuli ndimwe noBaami baLesa, alimwi mwakanyumfwa mupailo wangu muŋanda yanu isalalite.

⁸ “Abo balambila shibumbwabumbwa shitacite ncito, baleendwa nkumbu sheelete kuba shinebo.

⁹ Sombi ndaakubenga mulambu, akwiimba lwiimbo lwakulumba. Ico ncendakamushomesha cakulumbila, ndaakucicita. Ncakwiila lupulusho lulaswabo kuli ndimwe noBaami baLesa.”

¹⁰ Mpomunyaawo Mwaami Lesa wakalwiita nswi ayi ishipile Jona kwitala.