Jobo 9 - Baibo Busansulushi Bwa Libuku Ili

Jobo mbwaakakumbula

¹ Mpeeke Jobo wakakumbula ayi,

² “Ee, ndishi kwaamba ayi mbocibete ubo. Sombi muntubo inga walulama buyani kunembo lyakwe Lesa?

³ Ngani weenga wakonsha kupikishanya anguwe? Lesa inga weepusha miipusho ili cuulu yeenga yaala kukumbula.

⁴ Lesa nguMusongo alimwi nguShinkusu. Taaku weenga wamupikisha akuswitilila.

⁵ Ngootenkaanya tulundu cakubula kucenjesha alimwi ngoosandamuna tulundu mubukali bwakwe.

⁶ Lesa ulatenkaanya cishi ca panshi cino alimwi ulalengesha macinko a ncico kutenkaana.

⁷ Lesa ulicite nkusu shakukasha lisuba ayi litaswi, alimwi akukasha nyenyeenshi ayi shitaboneki.

⁸ Lakwe eenka ngowakafungulula liculu alimwi ngookonsha kulyatoola maaba a palweenge.

⁹ Lesa ngowakalenga nyenyeenshi shoonse, nkokwaamba ayi shilya shiitwa ayi Beya, Olyoni, Puleiyadesi anyenyeenshi sha kumalenge.

¹⁰ Ulacita shitondesho sha nkusu sha kwiculu shiyumu kwishiba ashaankamiko shitakonsheki kubelengwa.

¹¹ “Lesa uleenda pafwaafwi anebo kwakutamubonawo. Tulapusanaakwe, sombi nebo kwakutamunyumfwa.

¹² Ulabwesa coonse ncaasuni kwakubula aumukasha. Anu ngani weenga wamwiipusha ayi, ‘Utoocitaanshi?’

¹³ Lesa na wakalala kale taabooli pesule. Lakwe ulalengesha abacafwi bakwe Laabu shinshimwe ulya kufukama mukumulemeka.

¹⁴ Ino inga ndapikishanya buyani anguwe? Ngamaswinshi ngweenga ndasebensesha pakwaamba anguwe?

¹⁵ Nabi nshicite mulandu nshikoonshi kukumbula Lesa, sombi kumukombelelabo kwaamba ayi anyumfwile nkumbu.

¹⁶ Nabi na wansuminisha ayi ŋambe, nshintooshoma ayi inga wanyumfwa maswi angu.

¹⁷ Ceebo ulandokesha mfula ya muyoba akufusha shilonda shangu pataapu cikani.

¹⁸ Ncakwiila tanshiiliwo musena, sobwe, sombi ulamfushisha mapensho ciindi coonse.

¹⁹ Na ngamakani akusebensesha nkusu, lakwe nguShinkusu shiindaawo. Na ngamakani akutolana kunkuta, anu ngani weenga waya mukumwiita?

²⁰ Nabi kaantacite mulandu, maswi angu alo alanyumfwika kuba a bubeshi. Nabi kaantacite kampenda lakwe ulancanina kampenda.

²¹ Nabi nshicite mulandu, taaku ncentooyeeya. Ncakwiila buumi bwangu ndabucimwa abuumbi.

²² Ceebo shoonse shilyeelenebo. Nceceeco nceŋambila ayi ulanyonyoola batacite mulandu abacite boonse.

²³ Muntu utacite mulandu ndyaafwa, Lesa ulaseka mapensho a muntu uyo.

²⁴ Cishi na capekwa mumaansa abantu babiibi, Lesa ulacala meenso a boomboloshi ayi bataboni. Ono na teshi nguwe wakacicita, ingayi ngani weenga wacita boobo?

²⁵ “Nshiku shangu sheenda lubilo kwiinda muntu shikucica, shafwambaana kweenda kwakubula acibotu ncendabonaawo.

²⁶ Sheenda lubilo anga mbwaato bwa mabuba. Sheendabo anga ngucikupwi usuni kufupula cakulya.

²⁷ Na ndaamba ayi, ‘Andubeko matongooshi angu, nsangalale alimwi akusekaseka,’

²⁸ mapensho angu aya alatolelela kunjoosha ceebo ndeshiba kale ayi Lesa teshi akandekeleleewo.

²⁹ Ono mboompetwe kale mulandu, noopengelanshi kutondesha ayi nshicite kampenda?

³⁰ Nabi ndasamba asoopo ayi ntube, na ndasamba amusamu wakusamba kumaansa,

³¹ Lesa ulaakungwaala mucikanda ca matombe cakwaamba ayi ashakufwala shangu shilaakusaya pamubili.

³² “Lesa naalinga muntu neenga ndamukumbula, neenga twatolana kunkuta mukupikishanyaakwe.

³³ Ono taaku ukonsha koombolosha cikani cesu. Ncakwiila taaku ukonsha koombolosha Lesa anebo.

³⁴ Taaku muntu weenga wakusha musako wakwe Lesa pamubili wangu. Ee, kwaamba ayi bukali bwakwe butakanjooshiwo tubili.

³⁵ Lyalo ndyeshi nkaambe kwakubula boowa. Ono mbuli pacecino ciindi taaku nceenga ndaamba.