Jobo 8 - Baibo Busansulushi Bwa Libuku Ili

Biludadi mbwaakakumbula

¹ Mpomunyaawo Biludadi mwine Shuwa wakakumbula ayi,

² “Utootola ciindi cilaamfu buyani kooamba makani a mushobo uyu? Maswi ako alibo anga ncipuupu cinene.

³ Sa Lesa uloombolosha cakunyengelela? Sa Shinkusu shoonse ulaalilwa kucita shiluleme?

⁴ Bana bako bakabishisha Lesa, aboobo wakabapa mulandu kweelana akubisha kwabo.

⁵ Ono na webo usandukile kuli Lesa, akumukombelela Shinkusu shoonse ayi akunyumfwile nkumbu,

⁶ na ulashomeka alimwi ulisalalite, ncakwiila lakwe ulaakukucafwa, akukuboosha mbowakalinga pakataanshi.

⁷ Buboni bwako boonse bulya bwakanyonyooka bulaakuceya ceebo Lesa ulaakukupa buboni buunji munshiku shitoosa.

⁸ “Ukeepushe shabusongo bwa bakulukulu akuyeeya mwakeenda bamashali besu bakulukulu.

⁹ Swebo tulibo bacilo, aboobo taaku ncetwishi, nshiku shesu pacishi ca panshi shilibo anga ncimfule ciindilite.

¹⁰ Bakulukulu basongo abakwiishe, ukutikishe balo mbobakalinga kwaamba.

¹¹ Matete taakoonshi kuswa pataapu maanshi, alimwi taakoonshi kumena pataapu katoonto.

¹² Na maanshi ayuma, alo ngwaataanshi kuyuma alayuma kaacili aniini cakwaamba ayi inga taatimbulwi akusebenseshekwa.

¹³ Mbweeke ubo mbocibete kubantu baluba Lesa. Mbweeke ubo kulangila kwa bantu bateshi Lesa mbokuloba.

¹⁴ Balashoma mucintu citacite nkusu ee, cintu cilibo anga ngutandafube wa shimutangatanga.

¹⁵ Na bashimpila kutandafube balawa. Ncakwiila nabi baucatilila buyani tookoonshi kubacafwa kwiimikana.

¹⁶ “Bali anga ninsaku imena meensa akubalilwa lumwi, ee, bali anga ninsaku imena mumuunda woonse

¹⁷ akupombela miyanda ya njiyo kumabwe. Ilacatilila cankusu kulibwe lyomwi alyomwi.

¹⁸ Ono na nsaku iyo yatumoonwaamo, taaku ukonsha kwishiba ayi nsaku iyo yakalingaamo.

¹⁹ Ncakwiila buumi bwa njiyo bulamana. Lyalo shishango shimwi shilamenaamo.

²⁰ “Ndushinisho Lesa teshi akakake muntu ushomeka alimwi teshi akacafwewo muntu ucita shibiibi.

²¹ Ulaakukulengesha kuseka cakusangalala alimwi. Ncakwiila ulaakukulengesha koolobesha cakukondwa.

²² Sombi ulaakulensha nsoni abo bakupatite aalo maandaabo alaakumana kumwayuluka.”