Jobo 4 - Baibo Busansulushi Bwa Libuku Ili

Elifasi mbwaakakumbula

¹ Mpeeke Elifasi mwine Temani wakakumbula Jobo ayi,

² “Ino umwi na kaasuni kubandika andiwe, sa inga wamukalalila? Nebo cangalila kutolelela kuumuna.”

³ Yeeya webo mbowakeeisha bantu baanji, alimwi ambowakayuminisha bantu balefukite.

⁴ Maswi ako akakalika myoyo abo batalantanta, ee, wakayuminisha baabo bakalinga kusuni kuwa.

⁵ Ono webo sunu mapensho ndyaakupolela watyongola. Ncakwiila mapensho akucitikila, sombi waloonda abuumbi.

⁶ Sa kulambila Mwaami Lesa kwako kwakubula kampenda takukupi kushoma? Sa lushomo lwako talukoonshi kukukalika caamba?

⁷ “Ono yeeya, ngani wakalobawo kale kaatacite mulandu? Nkuli bantu baluleme nkobakanyonyoolwaawo?

⁸ Kweelana ambondakacibona, balya bashanga bubi, balatebula bubi. Mbweeke ubo abalo bashanga mapensho, balatebula mapensho.

⁹ Lesa ulabanyonyoola anga ncipuupu cinene ncakwiila bukali bwakwe bulabalobya.

¹⁰ Bamucita shibi balabuluma mbuli nkalamu, sombi Lesa ulaboomusha akubatyoloola meeno.

¹¹ Bamucita shibi balaloba bweenka mbuli nkalamu itoobula kuluma banyama ayi ilye, abalo bana babo bamucita shibi balapalangana.

¹² “Mubushishi ndakanyumfwa liswi. Matwi angu akanyumfwa kutepeta kwa ndilyo.

¹³ Ishi shakacitika ciindi ndindalinga kulota mashiku, ciindi bantu ndiboona twakufwa akutalika kulota.

¹⁴ Lyalo boowa bwakancata, mpeeke ndakatutuma. Boowa ubo bwakalengesha mafuwa angu kutontola.

¹⁵ Mpeeke muuwo uniini wakeenda kumeenso angu cakwaamba ayi misusu yangu yakanyanyaala kuboowa.

¹⁶ Kunembo lyangu kwakeemikana cintu, sombi ndakaalilwa kucishiba na nciinshi. Kwakoomuna tontolo, lyalo ndakanyumfwa liswi.

¹⁷ Liswi ilyo lyakaamba ayi, ‘Sa muntubo inga walulama kwiinda Lesa? Sa muntu inga weendaawo kubula kampenda pali wooyo wakamulenga?

¹⁸ Lesa taashomi basebenshi bakwe ba kwiculu, ncakwiila baanjelo bakwe ulabacanina shilubo.

¹⁹ Ino inga ceela kuli kubantu bakaswa kubulongo, abo bakaswabo kulusuko bashanyonwabo anga nkabambala?

²⁰ Muntu inga kaali muumi macuunsa, sombi macolesha wafwa. Ono na wafwa ulafukilwa akulubilwabo limwi.

²¹ Sa te buumi bwabo bulamana cakwaamba ayi balafwa kabatacite busongo.’