Jobo 34 - Baibo Busansulushi Bwa Libuku Ili

¹ Lyalo Eliyu wakaamba ayi,

² “Amunyumfwe nsheentooyanda kwaamba nobasongo, mukutike nsheshi ŋambe nomucite lushibo.

³ Ceebo matwi ngaanyumfwa maswi bweenka mulaka mboonyumfwa shakulya.

⁴ Atulisalile sobeene ico ncetubwene ayi cililuleme. Cili kuli ndiswe kwaamba ayi tulisalile cintu cibotu.

⁵ “Jobo utokwaamba ayi, ‘Nebo nshicitewo mulandu, sombi Lesa lakwe wakaka kuŋombolosha cabululami.

⁶ Nakubi kwaamba ayi ndiluleme lakwe utooŋamba ayi ndi mubeshi. Nakubi kwaamba ayi nshicitewo mulandu mifwi yakwe itoonjasa ayi mfwe.’

⁷ “Ngani wakabonawo kale muntu uli anga nguJobo? Ncakwiila Jobo taalemeki Lesa napaceyi.

⁸ Lakwe ulisunene abamucita shibi, ee, ulisuni kweenda abeshikubisha.

⁹ Jobo ulaamba ayi, ‘Anu nimpindunshi iliimo mukukonkela shiyanda Lesa?’

¹⁰ “Ono amunkutike nomucite lushibo. Ndushinisho Lesa taakoonshi kucita cibiibi, ee, inga tacicitiki Shinkusu shoonse kuluba.

¹¹ Lesa ulalambula muntu kweelana amilimo yakwe alimwi ulacitila muntu ico cimweelete.

¹² Taceelete akuyeeyekwa kwaamba ayi Lesa inga wabisha nabi ayi Shinkusu shoonse inga woombolosha cakutalulama.

¹³ Ngani wakamupa nkusu shakweendelesha cishi? Sa kuliwo wakapa Lesa bwaami bwa cishi ca panshi coonse?

¹⁴ Na Lesa mwiine wasuna kwaamba ayi akushe muuya wakwe upa buumi,

¹⁵ ncakwiila bantu inga bafwa alimwi akuboolela kubulongo boonse.

¹⁶ “Na mulicite lushibo, amunyumfwe sheeshi. Mukutike nsheshi ŋambe.

¹⁷ Sa ncakwiila uyo upatite bululami inga weendelesha? Sa webo utoopa mulandu Lesa Shinkusu shoonse ululeme?

¹⁸ Lesa ngowaambila bamaami ayi, ‘Taaku mbomubete,’ akwaambila bacinenenene ayi, ‘Muli bamucita shibi.’

¹⁹ Lesa taafuninini banaabaami, nabi kufuninina babile akulyatilila bakandu ceebo boonse ngowakabalenga amaansaakwe.

²⁰ Bantu balapulumukilwabo lufu nabi pakati ka mashiku nkufwa. Balatenkaanishikwabo, lyalo balashimingana. Lesa ulakushawo beshinkusu cakutamuyuminaawo.

²¹ “Meenso akwe alabona nshila sha muntu shoonse. Ndushinisho lakwe ulabona moonse mobalyata.

²² Taakuuwo munshinshe nabi musena ushiya mbi uko bamucita shibi nkweenga bayubila Lesa.

²³ Taciyandiki kuli Lesa kubamba ciindi muntu ncaaelete kuya mukoomboloshelwaawo.

²⁴ Lesa taaku ngwaaipusha pakukusha bamatanjilili pashuuna shabo. Ncakwiila ulabakusha akubikawo bamwi pamisena yabo.

²⁵ Ceebo lakwe ulishishi nshebacita, ulabawisha akubanyonyoola pakati ka mashiku.

²⁶ Bamucita shibi ulabapa mulandu ceebo ca shibiibi shabo. Ndushinisho ulabapa mulandu bantu kababweneeko

²⁷ ceebo cakuleka kumukonkela alimwi akunyansha milawo yakwe.

²⁸ Bakalengesha bakandu kulilila Lesa alakwe wakanyumfwa kulila lucafwo kwabo.

²⁹ Na woongulusha, anu ngani ukonsha kumutongooka? Na wabafutatila ngani weenga wapekwa coolwe?

³⁰ Ncakwiila mishobo yoonse taaku nceenga yacita kukasha beshikulyatilila batashomi Lesa kulela bamwi boonse.

³¹ “Sa webo Jobo wakalyaambililawo kale kuli Lesa ayi, ‘Ndakabisha, sombi teshi nkabooshewo tubili?’

³² Sa wakasengawo kale Lesa ayi akutondeshe shilubo shako akusumina ayi teshi ukabishewo tubili?

³³ Ino Lesa inga wakulambula buyani mbuli mboosuni, na webo wakaaka kusanduka kuswa kushibiibi shako? Webo ndiwe weelete kusala, kuteshi ndime, sobwe. Ono tulwiite mbootooyeeya.

³⁴ “Bantu bacite lushibo inga basumina, basongo abo batoonyumfwa nsheentokwaamba inga baamba ayi,

³⁵ ‘Jobo utokwaambabo cakubula lushibo, maswi akwe taakuuwo ambwaabete.’

³⁶ Inga cambotela na Jobo watolelela kusunkwa kushikila kumeelelesho ceebo cakwaamba bweenka bwaamba bamucita shibi.

³⁷ Amulange, pashibiibi shakwe ucinungawo bwaashu. Utoocobola Lesa soonse katunyumfwiteeko.”