Jobo 23 - Baibo Busansulushi Bwa Libuku Ili

Jobo mbwaakakumbula

¹ Lyalo Jobo wakakumbula ayi,

² Asunu ncitongookilabo Lesa ceebo lyaansa lyakwe lyandemena nabi ntootongela.

³ Nendalinga kwishi nkweenga ndamucana akwishiba bwakuya kooko nkwaabete,

⁴ naakwiinga ndaya mukwaamba mulandu wangu kunembo lyakwe. Ncakwiila naakwiinga ndalipikishisha cankusu nemwiine.

⁵ Ndisuni kwishiba lakwe mwiine nceenga wankumbula akunyumfwa ico mwiine nceenga wandwiita.

⁶ Sa naakwiinga waya mukunkakila ankusu shakwe shiinji? Sobwe, naakwiinga wakutika nceenga ndaamba.

⁷ Ndi muntu ululeme, ncakwiila naakwiinga ndaya mukupikishanya anguwe uko alakwe naakwiinga waya mukuŋambila ayi nshicite mulandu.

⁸ “Ono nabi ndulame kwicwe, lakwe taako. Nabi ndulanshe kumbo, teshi mucaneeko akwalo.

⁹ Na utoosebensa kulubasu lwakumatwa, nshimuboniiwo. Na wapilulukila kulubasu lwakumalenge akwalo nshimuboniiwo.

¹⁰ Sombi lakwe ulishi mboonyenda, Aakumana kunsunka, ulaakucana ayi ndisalalite anga ngugolodi wiine wiine.

¹¹ Myeendo yangu ilakonkelabo muntaamwa shakwe. Ndeenda munshila yakwe cakutapambookaawo, napaceyi.

¹² Nshina kusuulawo kale milawo yakwe. Ndakonkela maswi akwe kwiinda shintu shimwi shoonse mubuumi bwangu.

¹³ “Anu ngani weenga wakonsha kupilulula Lesa? Lakwe ulacita kulilabo nshaasuni mwiine.

¹⁴ Ulaakuncita bweenka mbuli mbwaabambite pali ndime, Ulicite miyeeyo aimwi iinji njaabambite kucita pali ndime.

¹⁵ Nceceeco ncentutumina kunembo lyakwe. Ee, na ndayeeya shoonse ishi, ndamuloonda abuumbi.

¹⁶ Lesa wantontosha mushiso. Shinkusu shoonse ulanoondesha abuumbi.

¹⁷ NguLesa unoondesha, kuteshi munshinshe. Ncakwiila kuteshi nabibo munshinshe ushiya mbi umfwekeleshete pameenso.