Jobo 22 - Baibo Busansulushi Bwa Libuku Ili

Elifasi mbwaakakumbula

¹ Lyalo Elifasi mwine Temani wakakumbula ayi,

² “Ino muntu ulicite ncitonshi kuli Lesa? Nabi musongo, nincitonshi njaacite kuli nguwe?

³ Anu nkusangalalanshi nkwaacanaamo Shinkusu shoonse mukululama kwanu? Anu nimpindunshi njaacanaamo na nshila shanu tashicite tumpenda?

⁴ “Sa nceebo cakumuloonda ncecilengesha ayi anookukalalila? Sa ulaakushinina akukupa mulandu ceebo ca cikani ico?

⁵ Sobwe, ulacita boobo ceebo ca shibiibi shako shiinji. Ncakwiila nceebo ca shibiibi shako shitamaani.

⁶ Ceebo ca nkongole icite mukwanu, wakacatilaamo cintu cakwe. Wakamunyaya shakufwala akumushiya matakosha.

⁷ Wakalinga kwiima maanshi akunwa bantu balemete akwiima cakulya bantu bafwite nsala

⁸ nabi wakalinga muntu shinkusu uyo wakalinga kucite cishi, ee, wakalinga muntu ulemekwa uyo wakalinga kwikala pali ncico.

⁹ Wakalinga kukaka kucafwa bamukalubinje alimwi wakalinga kupensha bana banshiwa.

¹⁰ Nceceeci ncewateyelwa mikoti koonse koonse, alimwi cakuteengashila boowa bunene bwakucata.

¹¹ Munshinshe wakufwekelesha cakwaamba ayi inga tooboni. Wapila mumapensho anga mumaanshi aanji.

¹² “Sa Lesa taabete mwiculu lya maculu akulanga panyenyeenshi isho shili mwiculu mwiine?

¹³ Sombi uleepusha ayi, ‘Ino Lesa nciinshi nceeshi? Sa inga wakonsha koombolosha mumakumbi ashiya mbi mwaabete?

¹⁴ Ulayeeya ayi makumbi ashiya mbi alamushinkilisha kwaamba ayi ataboni. Ee, kumushinkilisha kubona ndyaaya ceenda peculu lya makumbi ayo.’

¹⁵ “Sa unanoocilibo munshila ikulukulu, nshila iyo yakeendamo bamucita shibi bakulukulu?

¹⁶ Ciindi cabo cakufwa kacitana kushikila, bakalobeshekwa amuyoba.

¹⁷ Bakakaka Lesa akumwaambila ayi, ‘Tuleke sobeene! Ino Shinkusu shoonse inga wacitanshi kuli ndiswe?’

¹⁸ Sombi lakwe ngowakasusha maanda abo ashintu shibotu. Ncakwiila nshikoonshi kwishiba buyeeya bamucita shibi.

¹⁹ Baluleme balasangalala pakubona kunyonyooka kwabo. Bantu batacite mulandu balabawela ndibabona boobo akwaamba ayi,

²⁰ ‘Ncakwiila balwani besu banyonyoolwa, coonse cakacalaawo catentwa kumulilo.’

²¹ “Ono Jobo libombye, cileke kupikishanya aLesa, ingaawo shintu ndyeshi shikweendele kabotu.

²² Usuminebo shitooswa kumulomo wakwe akubika maswi akwe mucaamba cako.

²³ Sandukila kuli Shinkusu shoonse cakulibombya, akuleka kucita shintu shibiibi muŋanda yako.

²⁴ Bona golodi wako anga ndusukobo. Waala golodi wako ubotu wa kuOfa mumulonga.

²⁵ Lyalo Shinkusu shoonse utooba golodi wako ee, utooba silifa wako.

²⁶ Mpeeke ulaakucana kusangalala muli nguwe alimwi ulaakunoocinkite manungo muli nguwe lyoonsebo.

²⁷ Waakunoopaila, ulaakunookunyumfwa. Ulaakucita nshewakashomesha cakulumbila kuli nguwe.

²⁸ Lyalo kulilabo nceenga wasuuna, cilaakunoocitika. Mumuni ulaakumunikila nshila shako.

²⁹ Lesa ulabombya balisumpula alimwi akupulusha balibombya.

³⁰ Ulaakufuna woonse uyo utacite mulandu, awebo ulaakupulushikwa na nshoocita shililuleme.”