Jobo 17 - Baibo Busansulushi Bwa Libuku Ili

¹ Moyo wangu watyongooka, nshiku shangu shaceyeshekwa. Ee, cuumbwe citoonindila.

² Ncakwiila beshikucelebula banshinguluka, meenso angu atoobonabo shalunkutwe nshebatoocita kuli ndime.

³ “NobaLesa bangu, amusuminishe maswi angu alushinisho. Taaku aumwi weenga wancafwa mucikani ici.

⁴ Aba bantu mwakabacala tulango twabo. Ono mutabasuminishi kwaamba ayi bankoome.

⁵ Na muntu waaba mubye ceebo cakuyanda maali, bana bakwe mbweshi bakapengeleemo akufwa nsoni.

⁶ “Lesa wanengesha kuba cintu ceelete kusekwa kumuntu uli woonse. Bulya bantu balanshipilabo mate kumeenso.

⁷ Aalo meenso angu acalikabo anga ndi moofu ceebo ca buumba. Mikono yangu amyeendo yamana kukunyanga.

⁸ Abo balyaamba ayi balashomeka balakankamana ceebo ca sheeshi. Boonse batooŋamba ayi nshishomeki kuli Lesa.

⁹ Abo balyaamba ayi balalemekwa batooya ciindaawo kushinisha ayi baliluleme.

¹⁰ Sombi nabi boonse beemikana kunembo lyangu, pakati kabo taaku nabi womwi ngweenga ndacaana ayi ngumusongo.

¹¹ “Nshiku shangu shitokwiinda ayalo miyeeyo yangu yaala. Kulangila kwangu kwamana.

¹² Sombi beensuma balaamba munshinshe ayi ngamalumwi. Balaamba ayi mumuni uli pafwaafwi, sombi ndishi ayi ndishiite mumunshinshe.

¹³ Ono nceentoolangilabo nkuya mumusena wa bafu. Uko ndaakoona mumunshinshe.

¹⁴ Ndaakutumba cuumbwe ayi bata akutumba mapila eshi akanoondya ayi bama nabi ayi nankashi.

¹⁵ Ono kulangila kwangu kuli kuli? Ngani ukubweneewo kulangila kwangu?

¹⁶ Sa kulaakuya anebo mucuumbwe? Sa ndushinisho ndaakuya andulo mubulongo?”